IPL ಸೀಸನ್‌ನಲ್ಲಿ ಸಾವಿರ ಸಿಕ್ಸರ್‌ಗಳ ಹ್ಯಾಟ್ರಿಕ್‌

ಚೆನ್ನೈ: ಪಂದ್ಯವೊಂದರಲ್ಲಿ ಸರಾಸರಿ 18 ಸಿಕ್ಸರ್‌, ಪ್ರತೀ 13 ಎಸೆತಗಳಿಗೆ ಒಂದು ಸಿಕ್ಸರ್‌… ಈ ರೀತಿಯಾಗಿ 2024ರ ಐಪಿಎಲ್‌ ಹೊಡಿಬಡಿ ಆಟದಿಂದ ಅಬ್ಬರಿಸಿದೆ. ಪರಿಣಾಮ, ಸತತ 3 ವರ್ಷವೂ ಐಪಿಎಲ್‌ ಸೀಸನ್‌ನಲ್ಲಿ ಸಿಕ್ಸರ್‌ಗಳ ಸಂಖ್ಯೆ ಸಾವಿರದ ಗಡಿ ದಾಟಿದೆ. ಈ ಬಾರಿಯ 60 ಪಂದ್ಯಗಳಲ್ಲಿ (ಕೆಕೆಆರ್‌-ಮುಂಬೈ ಪಂದ್ಯದ ತನಕ) 1,078 ಸಿಕ್ಸರ್‌ಗಳು ಸಿಡಿದಿವೆ.

2023ರ 74 ಪಂದ್ಯಗಳಿಂದ 1,124 ಸಿಕ್ಸರ್‌ ಸಿಡಿದದ್ದು ಐಪಿಎಲ್‌ ದಾಖಲೆಯಾಗಿದೆ. 2022ರ 74 ಪಂದ್ಯಗಳಿಂದ 1,062 ಸಿಕ್ಸರ್‌ ದಾಖಲಾಗಿತ್ತು. ಈ ಬಾರಿ ಇನ್ನೂ 14 ಪಂದ್ಯಗಳಿರುವುದರಿಂದ ಐಪಿಎಲ್‌ ಸೀಸನ್‌ನಲ್ಲಿ ಸಿಕ್ಸರ್‌ಗಳ ನೂತನ ದಾಖಲೆ ನಿರ್ಮಾಣವಾಗುವುದರಲ್ಲಿ ಅನುಮಾನವಿಲ್ಲ.

2023ರಲ್ಲಿ ಸಾವಿರ ಸಿಕ್ಸರ್‌ ಪೂರ್ತಿಗೊಳ್ಳಲು ಬ್ಯಾಟರ್ 15,391 ಎಸೆತ ತೆಗೆದುಕೊಂಡಿದ್ದರು. ಈ ಬಾರಿ 13,079 ಎಸೆತಗಳಲ್ಲೇ ಸಿಕ್ಸರ್‌ಗಳ ಸಂಖ್ಯೆ ಸಾವಿರದ ಗಡಿ ತಲುಪಿದೆ. ಐಪಿಎಲ್‌ ಬ್ಯಾಟಿಂಗ್‌ ಜೋಶ್‌ಗೆ ಇದು ಸಾಕ್ಷಿ. 2009ರಲ್ಲಿ ಕನಿಷ್ಠ 506 ಸಿಕ್ಸರ್‌ ಸಿಡಿದಿತ್ತು (57 ಪಂದ್ಯ).