ಐಪಿಎಲ್‌ ಆಡಲು ತಾಂಬೆಗೆ ಅರ್ಹತೆ ಇಲ್ಲ!

ಹೊಸದಿಲ್ಲಿ: ಮುಂಬರುವ ಐಪಿಎಲ್‌ ಟಿ20 ಕೂಟದಿಂದ 48 ವರ್ಷದ ಹಿರಿಯ ಕ್ರಿಕೆಟಿಗ ಪ್ರವೀಣ್‌ ತಾಂಬೆ ಹೊರಬಿದ್ದಿದ್ದಾರೆ. ಕೋಲ್ಕತಾ ನೈಟ್‌ರೈಡರ್ ತಂಡಕ್ಕೆ 20 ಲಕ್ಷ ರೂ. ಮೂಲಬೆಲೆಗೆ ಮಾರಾಟವಾಗಿದ್ದ ತಾಂಬೆ ಐಪಿಎಲ್‌ನಲ್ಲಿ ಆಡುತ್ತಿರುವ ಹಿರಿಯ ಕ್ರಿಕೆಟಿಗ ಎನಿಸಿಕೊಂಡಿದ್ದರು. ಆದರೀಗ ಅವರು ನಿಯಮ ಉಲ್ಲಂಘಿಸಿ ವಿದೇಶಿ ಕೂಟಗಳಲ್ಲಿ ಭಾಗವಹಿಸಿ ಸಂಕಟಕ್ಕೆ ಸಿಲುಕಿದ್ದಾರೆ.

“ತಾಂಬೆ ಬಿಸಿಸಿಐ ನಿಯಮಗಳನ್ನು ಉಲ್ಲಂಘಿಸಿ ವಿದೇಶಿ ಕೂಟಗಳಲ್ಲಿ ಭಾಗವಹಿಸಿದ್ದಾರೆ. ನಿವೃತ್ತಿ ಘೋಷಿಸದೆ ವಿದೇಶಿ ಟಿ20 ಸರಣಿಗಳಲ್ಲಿ ಆಡುವುದು ನಿಯಮಬಾಹಿರ. ಹೀಗಾಗಿ ತಾಂಬೆ ಐಪಿಎಲ್‌ನಿಂದ ಅನರ್ಹಗೊಂಡಿದ್ದಾರೆ’ ಎಂದು ಐಪಿಎಲ್‌ ಮುಖ್ಯಸ್ಥ ಬೃಜೇಶ್‌ ಪಟೇಲ್‌ ಹೇಳಿದ್ದಾರೆ. ತಾಂಬೆ 2013ರಿಂದ 2016ರ ತನಕ ರಾಜಸ್ಥಾನ್‌ ರಾಯಲ್ಸ್‌, ಬಳಿಕ ಗುಜರಾತ್‌ ಲಯನ್ಸ್‌, ಸನ್‌ರೈಸರ್ ಹೈದರಾಬಾದ್‌ ತಂಡವನ್ನು ಪ್ರತಿನಿಧಿಸಿದ್ದರು.