ಕೋಲ್ಕತಾ ಫಿಲಂ ಫೆಸ್ಟ್‌ನಲ್ಲಿ ಬೆಯಿಲ್‌ ಕೋಲು ಪ್ರದರ್ಶನ

ಉಪ್ಪಿನಂಗಡಿ: ಇಂದ್ರಪ್ರಸ್ಥ ವಿದ್ಯಾಲಯದಲ್ಲಿ ಎರಡನೇ ತರಗತಿಯಲ್ಲಿ ಕಲಿಯುತ್ತಿರುವ ಸಿಮ್ರಿನ್‌, ಸಾನಿಯಾ ಅಭಿನಯದ ಬೆಯಿಲ್‌ ಕೋಲು ಹೆಸರಿನ ಬ್ಯಾರಿ ಭಾಷೆಯ ಚಿತ್ರ ಕೋಲ್ಕತಾ ಇಂಟರ್‌ನ್ಯಾಶನಲ್‌ ಫಿಲಂ ಫೆಸ್ಟಿವಲ್‌ನಲ್ಲಿ ನ. 15ರಂದು ಅಪರಾಹ್ನ 2 ಗಂಟೆಗೆ ಪ್ರದರ್ಶನ ಕಾಣಲಿದೆ.

ಈ ಚಿತ್ರಕ್ಕೆ ಉಪ್ಪಿನಂಗಡಿಯ ರಾಜ್ಯಪ್ರಶಸ್ತಿ ಪುರಸ್ಕೃತ ನಟ ಎಂ.ಕೆ. ಮಠ ಸಂಭಾಷಣೆ ಬರೆದಿದ್ದಾರಲ್ಲದೆ ಮನೆಯ ಯಜಮಾನನಾಗಿ ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದಾರೆ. ಸಂತನು ಗಂಗೂಲಿ ಅವರು ನಿರ್ದೇಶನ ಮಾಡಿದ್ದು, ಮಂಜು ಪಾಂಡವಪುರ ಸಹನಿರ್ದೇಶಕರಾಗಿ ಕೆಲಸ ಮಾಡಿದ್ದಾರೆ. ಪಿ.ವಿ.ಆರ್‌. ಸ್ವಾಮಿ ಛಾಯಾಗ್ರಹಣ ಮಾಡಿದ್ದು, ನಿತೀಶ್‌ ಕುಮಾರ್‌ ಸಂಕಲನ ಮಾಡಿದ್ದಾರೆ.

ದಕ್ಷಿಣ ಕನ್ನಡದ ರಂಗಭೂಮಿಯ ಕಲಾವಿದರಾದ ಚಂದ್ರಹಾಸ ಉಳ್ಳಾಲ, ರೂಪಶ್ರೀ ವರ್ಕಾಡಿ, ಪತ್ರಕರ್ತ ಆಜಾದ್‌ ಖಂಡಿಗ, ಮಾಸ್ಟರ್‌ ಧನುಷ್‌ ಮಣಿಪಾಲ, ಭವ್ಯ ಕೆ., ಸಂದೀಪ್‌ ಕುಮಾರ್‌ ಉಡುಪಿ, ಭಾಸ್ಕರ್‌ ಮಣಿಪಾಲ್‌ ಮೊದಲಾದವರು ಅಭಿನಯಿಸಿದ್ದಾರೆ.