PTI ಅಧ್ಯಕ್ಷರಾಗಿ ಕೆ.ಎನ್‌.ಶಾಂತಕುಮಾರ್‌ ನೇಮಕ

ನವದೆಹಲಿ: ಪ್ರಜಾವಾಣಿ ಮತ್ತು ಡೆಕ್ಕನ್‌ ಹೆರಾಲ್ಡ್‌ ಪ್ರತಿಕೆಗಳ ಮಾತೃ ಸಂಸ್ಥೆಯಾದ ದಿ ಪ್ರಿಂಟರ್ಸ್‌ ಪ್ರೈವೇಟ್‌ ಲಿಮಿಟೆಡ್‌ನ‌ ನಿರ್ದೇಶಕ ಕೆ.ಎನ್‌. ಶಾಂತಕುಮಾರ್‌ ಅವರು ಸುದ್ದಿಸಂಸ್ಥೆ ಪ್ರಸ್‌ ಟ್ರಸ್ಟ್‌ ಆಫ್ ಇಂಡಿಯಾದ(ಪಿಟಿಐ) ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ.

ಶುಕ್ರವಾರ ನಡೆದ ಪಿಟಿಐನ ಆಡಳಿತ ಮಂಡಳಿ ನಿರ್ದೇಶಕರ ವಾರ್ಷಿಕ ಸಭೆಯಲ್ಲಿ ಈ ಆಯ್ಕೆ ನಡೆದಿದ್ದು, ಉಪಾಧ್ಯಕ್ಷ ಸ್ಥಾನಕ್ಕೆ ಹಿಂದೂಸ್ಥಾನ್‌ ಟೈಮ್ಸ್‌ ಸಿಇಒ ಪ್ರವೀಣ್‌ ಸೋಮೇಶ್ವರ್‌ ಆಯ್ಕೆಯಾಗಿದ್ದಾರೆ. ಅಧ್ಯಕ್ಷರು ಮತ್ತು ಉಪಾಧ್ಯಕ್ಷರ ಅಧಿಕಾರಾವಧಿ 1 ವರ್ಷದ್ದಾಗಿದ್ದು, ಈ ಹಿಂದೆ ಅವೀಕ್‌ ಸರ್ಕಾರ್‌ 2 ಅವಧಿಗೆ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದರು. ಈ ಬಾರಿ ಅಧ್ಯಕ್ಷರಾಗಿರುವ ಶಾಂತಕುಮಾರ್‌ ಅವರು ಈ ಹಿಂದೆ ಪಿಟಿಐನ ಉಪಾಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದ್ದರು. ಇತ್ತೀಚಿನ ದಿನಗಳಲ್ಲಿ ಸುದ್ದಿಗಳ ಜತೆಗೆ ವಿಡಿಯೋ ಸುದ್ದಿಗಳನ್ನೂ ನೀಡುವ ಮೂಲಕ ಪಿಟಿಐ ಸಂಕ್ರಮಣ ಕಾಲದಲ್ಲಿದ್ದು, ಈ ಸಮಯದಲ್ಲಿ ತಾವು ಅಧ್ಯಕ್ಷನಾಗಿರುವುದು ಸಂತಸ ತಂದಿದೆ ಎಂದೂ ಶಾಂತಕುಮಾರ್‌ ಹೇಳಿದ್ದಾರೆ.