ಖೇಲೋ ಇಂಡಿಯಾ: 6ನೇ ದಿನ ರಾಜ್ಯಕ್ಕಿಲ್ಲ ಪದಕ

ನವದೆಹಲಿ: ಖೇಲೋ ಇಂಡಿಯಾ ಶಾಲಾ ಕ್ರೀಡಾಕೂಟದಲ್ಲಿ ಕರ್ನಾಟಕ ತಂಡ ಆರನೇ ದಿನ ಯಾವುದೇ ವಿಭಾಗದಲ್ಲಿ ಪದಕ ಗೆಲ್ಲಲಿಲ್ಲ.

ಸದ್ಯ ರಾಜ್ಯದ ಸ್ಪರ್ಧಿಗಳು ಒಟ್ಟಾರೆ ಕೂಟದಲ್ಲಿ 15 ಚಿನ್ನ, 11 ಬೆಳ್ಳಿ, 13 ಕಂಚಿನ ಪದಕ ಗೆದ್ದುಕೊಂಡಿದ್ದಾರೆ. ಗೆದ್ದ ಪದಕಗಳ ಪೈಕಿ ಹೆಚ್ಚಿನ ಪದಕಗಳು ಈಜು ಕೂಟದಲ್ಲಿಯೇ ಬಂದಿದೆ ಎನ್ನುವುದು ವಿಶೇಷ. ಹರ್ಯಾಣ ಪದಕ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲೇ ಮುಂದುವರಿದಿದೆ. ದಿಲ್ಲಿ, ಮಹಾರಾಷ್ಟ್ರ ನಂತರದ ಸ್ಥಾನದಲ್ಲಿವೆ.

ಅಸ್ಸಾಂನ ಸಿದ್ಧಾಂತ್‌ಗೆ ಚಿನ್ನ: ಬಾಲಕರ ವಿಭಾಗದ 56 ಕೆ.ಜಿ ವೇಟ್‌ಲಿಫ್ಟಿಂಗ್‌ನಲ್ಲಿ ಸಿದ್ಧಾಂತ್‌ ಚಿನ್ನದ ಪದಕ ಪಡೆದುಕೊಂಡರು. 48 ಕೆ.ಜಿ ವಿಭಾಗದ ಮಹಿಳಾ ವೇಟ್‌ಲಿಫ್ಟಿಂಗ್‌ನಲ್ಲಿ ಪಶ್ಚಿಮ ಬಂಗಾಳದ ಶರ್ಬಾನಿ ದಾಸ್‌ ಚಿನ್ನದ ಪದಕ ಗೆದ್ದರು. 50 ಕೆ.ಜಿ ವಿಭಾಗದ ಬಾಲಕರ ವೇಟ್‌ಲಿಫ್ಟಿಂಗ್‌ನಲ್ಲಿ ತಮಿಳುನಾಡಿನ ಸಿ.ದಿನೇಶ್‌ ಚಿನ್ನದ ಪದಕ ಪಡೆದುಕೊಂಡರು.

ವಾಲಿಬಾಲ್‌ ದಿಲ್ಲಿಗೆ ಚಿನ್ನ: ಉತ್ತರ ಪ್ರದೇಶ ವಿರುದ್ಧ ನಡೆದ ಬಾಲಕರ ವಾಲಿಬಾಲ್‌ ಫೈನಲ್‌ನಲ್ಲಿ 2-3 ಅಂತರದಿಂದ ಗೆದ್ದ ದಿಲ್ಲಿ ಚಿನ್ನದ ಪದಕ ಗೆದ್ದಿತು. ಇನ್ನು ಬಾಲಕಿಯರ ವಾಲಿಬಾಲ್‌ ಕೂಟದಲ್ಲಿ ವೆಸ್ಟ್‌ ಬೆಂಗಾಲ್‌ ತಂಡ 3-0 ಅಂತರದಿಂದ ಮಹಾರಾಷ್ಟ್ರ ತಂಡವನ್ನು ಮಣಿಸಿ ಸ್ವರ್ಣ ಪದಕಕ್ಕೆ ಮುತ್ತಿಕ್ಕಿತು.