ಕೇರಳದಲ್ಲಿ ಬುರಾರಿ ಮಾದರಿ ಪ್ರಕರಣ

ತಿರುವನಂತಪುರ: ದಿಲ್ಲಿಯ ಬುರಾರಿಯಲ್ಲಿ ಒಂದೇ ಕುಟುಂಬದ 11 ಮಂದಿಯ ಆತ್ಮಹತ್ಯೆ ಇಡೀ ದೇಶವನ್ನು ಬೆಚ್ಚಿಬೀಳಿಸಿದ ಬೆನ್ನಲ್ಲೇ ಕೇರಳದ ಇಡುಕ್ಕಿಯಲ್ಲೂ ಅದೇ ಮಾದರಿಯ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಇಲ್ಲಿನ ಒಂದೇ ಕುಟುಂಬದ ನಾಲ್ವರ ಮೃತದೇಹ ಹೂತಿರುವ ಸ್ಥಿತಿಯಲ್ಲಿ ಪತ್ತೆಯಾಗಿದೆ.

4 ದಿನಗಳ ಹಿಂದೆ ಕಾಣೆಯಾಗಿದ್ದ ಕೃಷ್ಣನ್‌, ಪತ್ನಿ ಸುಶೀಲಾ, ಪುತ್ರಿ ಅರ್ಷಾ ಹಾಗೂ ಪುತ್ರ ಅರ್ಜುನ್‌ ಮೃತ ದೇಹ ಒಂದರ ಮೇಲೊಂದರಂತೆ ಇಟ್ಟು ಹೂಳಲಾಗಿದೆ. ಈ ಸಾವಿನ ಹಿಂದೆ ಮಾಟ-ಮಂತ್ರದ ನೆರಳಿರುವ ಶಂಕೆ ಯಿದೆ. ಕೃಷ್ಣನ್‌ ಜ್ಯೋತಿಷಿಯಾಗಿದ್ದು, ಅವರ ಮನೆಗೆ ಕೆಲವು ಸಿನಿಮಾ ನಟರು ಸೇರಿದಂತೆ ಅನೇಕರು ಬರುತ್ತಿದ್ದರು ಎಂದು ನೆರೆಹೊರೆಯವರು ತಿಳಿಸಿದ್ದಾರೆ. ಮನೆಯಲ್ಲಿ ಸುತ್ತಿಗೆ , ಚಾಕು ಸಿಕ್ಕಿದ್ದು, ಆ ಸುತ್ತಿಗೆಯಿಂದ ತಲೆಗೆ ಹೊಡೆದು ಕೊಂದಿರುವಂತೆ ಕಾಣುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.