ಪ್ರೇಯಸಿಗೆ ಸಮಾಧಿ ಕಟ್ಟಿದವ, ಹೆತ್ತವರನ್ನು ಸುಟ್ಟು ಬೂದಿ ಮಾಡಿದ್ದ!

ಭೋಪಾಲ್‌:  ಫೇಸ್‌ಬುಕ್‌ನಲ್ಲಿ ಪ್ರೇಮಿಸಿ, ಲಿವ್‌ಇನ್‌ ಸಂಬಂಧದಲ್ಲಿದ್ದ ಪ್ರೇಯಸಿಯನ್ನು ಕೊಂದು ಸಮಾಧಿ ಕಟ್ಟಿದ್ದ ಉದಯನ್‌ ದಾಸ್‌ ಈಗ ಭಸ್ಮಾಸುರ ಎಂಬುದೂ ತಿಳಿದುಬಂದಿದೆ! ಆರು ವರ್ಷದ ಹಿಂದೆಯೇ ಈತ ತನ್ನ ತಂದೆ- ತಾಯಿಯನ್ನು ಕೊಂದು ರಾಯ್‌ಪುರದ ತನ್ನ ಮನೆಯಲ್ಲಿ ಭಸ್ಮ ಮಾಡಿದ್ದ!

ಪಶ್ಚಿಮ ಬಂಗಾಳದ ಮೂಲದ ಪ್ರೇಯಸಿ ಆಕಾಂಕ್ಷಾಳ ಕತ್ತು ಹಿಸುಕಿ, ಭೋಪಾಲ್‌ನ ಮೊದಲನೇ ಮಹಡಿಯ ಮನೆಯಲ್ಲಿ ಸಮಾಧಿ ಮಾಡಿದ್ದ ಉದಯನ್‌ನನ್ನು ಪೊಲೀಸರು ತೀವ್ರ ವಿಚಾರಣೆ ನಡೆಸಿದಾಗ ಈ ಬೆಚ್ಚಿ ಬೀಳಿಸುವ ಸಂಗತಿಗಳು ಹೊರಬಿದ್ದವು. 2010-11ರಲ್ಲಿ ಈತ ತಂದೆ-ತಾಯಿಯನ್ನು ಕೊಂದು ಮನೆಯ ಕಾಂಪೌಂಡ್‌ ಒಳಗೆ ಸುಟ್ಟು ಹಾಕಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. 

“ಮೊದಲ ವಿಚಾರಣೆಯಲ್ಲಿ ತಂದೆ ಪಿಕೆ ದಾಸ್‌ ಕಾರ್ಖಾನೆ ನಡೆಸುತ್ತಿದ್ದರು. 2010ರಲ್ಲಿ ರಾಯ್‌ಪುರ ಆಸ್ಪತ್ರೆಯಲ್ಲಿ ಹೃದಯಾಘಾತದಿಂದ ಮೃತಪಟ್ಟರು ಎಂದು ಹೇಳಿದ್ದ. ಬಳಿಕ ತನ್ನ ತಂದೆ- ತಾಯಿಯನ್ನು ಕಾಂಪೌಂಡ್‌ ಒಳಗೆ ಸುಟ್ಟಿದ್ದೇನೆ ಎನ್ನುತ್ತಿದ್ದಾನೆ. ಉದಯ್‌ ಚಾಣಾಕ್ಷನಾಗಿದ್ದು, ತನ್ನ ಇಂಗ್ಲಿಷ್‌ನಿಂದ ಯಾರನ್ನಾದರೂ ಓಲೈಸಿಕೊಳ್ಳುವಂಥವನು. ಈತನ ಹೇಳಿಕೆ ಆಧರಿಸಿ ರಾಯ್‌ಪುರಕ್ಕೆ ಪೊಲೀಸ್‌ ತಂಡವನ್ನು ಕಳುಹಿಸಿಕೊಡಲಾಗಿದೆ’ ಎಂದು ಭೋಪಾಲ್‌ನ ಗೋವಿಂದಪುರ ಸಿಎಸ್ಪಿ ವಿರೇಂದ್ರ ಮಿಶ್ರಾ ಹೇಳಿದ್ದಾರೆ.