Karnataka Government: 7ನೇ ವೇತನ ಆಯೋಗ: ಪರಿಷ್ಕೃತ ವೇತನ ಶ್ರೇಣಿ ಪ್ರಕಟ

ಬೆಂಗಳೂರು: ಏಳನೇ ವೇತನ ಆಯೋಗದ ಶಿಫಾರಸಿನಂತೆ ಆಗಸ್ಟ್‌ 1ರಿಂದ ಸರಕಾರಿ ನೌಕರರ ವೇತನ ಶ್ರೇಣಿ, ಪಿಂಚಣಿ ಮತ್ತು ಕುಟುಂಬ ಪಿಂಚಣಿಯು ಪರಿಷ್ಕರಣೆಗೊಳ್ಳಲಿದ್ದು 2022ರಲ್ಲಿದ್ದ ಮೂಲ ವೇತನವನ್ನು ಪರಿಗಣಿಸಿ, ಬೆಲೆ ಸೂಚ್ಯಂಕ ಆಧರಿಸಿ ಶೇ. 31ರಷ್ಟು ತುಟ್ಟಿಭತ್ತೆ, ಶೇ. 27.50ರಷ್ಟು ಫಿಟ್‌ಮೆಂಟ್‌ ಸೌಲಭ್ಯವನ್ನು ಹೆಚ್ಚಿಸಲಾಗಿದೆ.

ಈ ಕುರಿತು ಹಣಕಾಸು ಇಲಾಖೆ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಎಲ್‌.ಕೆ. ಅತೀಕ್‌ ಸೊಮವಾರ ಸರಕಾರದ ನಡಾವಳಿ ಪ್ರಕಟಿಸಿದ್ದು ಮುಖ್ಯವೇತನ ಶ್ರೇಣಿ ಹಾಗೂ 25 ಸ್ಥಾಯೀ ವೇತನ ಶ್ರೇಣಿಗಳೂ 7ನೇ ವೇತನ ಆಯೋಗದ ಶಿಫಾರಸಿನಂತೆ ಪರಿಷ್ಕರಣೆಗೊಳ್ಳಲಿದೆ.

ಮುಖ್ಯ ವೇತನ ಶ್ರೇಣಿಯು ಕನಿಷ್ಠ 27 ಸಾವಿರ ರೂ. ಇರಲಿದ್ದು ಗರಿಷ್ಠ 2.41 ಲಕ್ಷ ರೂ. ಇರಲಿದೆ. ಅದೇ 25 ಸ್ಥಾಯೀ ವೇತನ ಶ್ರೇಣಿಯೂ ಪರಿಷ್ಕರಣೆಗೊಳ್ಳಲಿದೆ. ಜತೆಗೆ ಮಾಸಿಕ ಕನಿಷ್ಠ 13,500 ರೂ.ಗಳಿಂದ ಗರಿಷ್ಠ 1,20,600 ರೂ. ವರೆಗೆ ಇರಲಿದ್ದು ಕುಟುಂಬ ಪಿಂಚಣಿಯ ಮೊತ್ತವನ್ನು 80,400 ರೂ.ಗೆ ಮಿತಿಗೊಳಿಸಲಾಗಿದೆ.