Karnataka election ಮನೆ ಮನೆಗೆ ಕೋಳಿ ಹಂಚಿಕೆ ; ವಾಹನ ಸಮೇತ ಜಪ್ತಿ

ಕುಷ್ಟಗಿ:ನಾಮಪತ್ರ ಸಲ್ಲಿಕೆ ಹಿನ್ನೆಲೆಯಲ್ಲಿ ಭಾಗವಹಿಸಿದ್ದ ಕಾಂಗ್ರೆಸ್ ಕಾರ್ಯಕರ್ತರು ಮನೆ ಮನೆಗೆ ಕೋಳಿ ಹಂಚಿಕೆಯಲ್ಲಿ ನಿರತರಾಗಿದ್ದು, ಕೋಳಿಗಳ ಸಮೇತ ವಾಹನವನ್ನು ಫ್ಲೈಯಿಂಗ್ ಸ್ಕ್ವಾಡ್ ತಂಡ ವಶಕ್ಕೆ ತೆಗೆದುಕೊಂಡಿದೆ.

ಕುಷ್ಟಗಿ ವಿಧಾನಸಭೆ ಚುನಾವಣಾಧಿಕಾರಿಗಳ ಕಾರ್ಯಾಲಯಕ್ಕೆ ಖಚಿತ ಮಾಹಿತಿ ಹಿನ್ನೆಲೆಯಲ್ಲಿ ಸುರೇಂದ್ರ ಕಾಂಬಳೆ ನೇತೃತ್ವದ ಫ್ಲೈಯಿಂಗ್ ಸ್ಕ್ವಾಡ್ ತಂಡ ಬುಧವಾರ ರಾತ್ರಿ ದೌಡಾಯಿಸಿತು. ಸದರಿ ಗ್ರಾಮದ ಶ್ರೀ ಶರಣಬಸವೇಶ್ವರ ದೇವಸ್ಥಾನದ ಬಳಿ 80 ಕೋಳಿಗಳು ಹಾಗೂ ವಾಹನ ಸಮೇತ ವಶಕ್ಕೆ ತೆಗೆದುಕೊಳ್ಳಲಾಗಿದೆ.

ಚಾಲಕ ಶರಣಗೌಡ ರಾಮನಗೌಡ ಪಾಟೀಲ ಪರಾರಿಯಾಗಿದ್ದಾನೆ. ಸ್ಥಳೀಯರ ವಿಚಾರಣೆಯಿಂದ ಕಾಂಗ್ರೆಸ್ ಅಭ್ಯರ್ಥಿ ರೋಡ್ ಶೋದಲ್ಲಿ ಭಾಗವಹಿಸಿದವರಿಗೆ ಹಾಗೂ ಮತದಾನ ಮಾಡಲು ಆಮಿಷದ ಹಿನ್ನೆಲೆಯಲ್ಲಿ ಕೋಳಿಗಳ ಹಂಚಿಕೆ ನಿರತರಾಗಿರುವುದು ಗೊತ್ತಾಗಿದೆ. ವಾಹನದ ಅಂದಾಜು ಮೌಲ್ಯ 1.50ಲಕ್ಷ ರೂ. 80 ಕೋಳಿಗಳ ಮೌಲ್ಯ 6,400 ರೂ. ಎಂದುಅಂದಾಜಿಸಲಾಗಿದೆ. ಫ್ಲೈಯಿಂಗ್ ಸ್ಕ್ವಾಡ್ ತಂಡದಲ್ಲಿ ಎಎಸೈ ವಸಂತ, ಚಾಲಕ ಶಿವಾನಂದಪ್ಪ ತಳವಾರ ಭಾಗಿಯಾಗಿದ್ದರು.