ಯಶ್‌ ʼToxicʼ ನಲ್ಲಿ ಕರೀನಾ,ಕಿಯಾರಾ ನಟಿಸುವುದು ಪಕ್ಕಾ: ಮೂರನೇ ನಟಿ ಯಾರು?

ಬೆಂಗಳೂರು: ರಾಕಿಂಗ್‌ ಸ್ಟಾರ್‌ ಯಶ್‌ ʼಕೆಜಿಎಫ್‌ʼ ಸರಣಿ ಬಳಿಕ ಕಾಣಿಸಿಕೊಳ್ಳುತ್ತಿರುವ ಬಹು ನಿರೀಕ್ಷಿತ ʼಟಾಕ್ಸಿಕ್‌ʼ ಸಿನಿಮಾ ಅನೌನ್ಸ್‌ ಆದ ಬಳಿಕ ಇದೀಗ ಸಿನಿಮಾದ ಕುರಿತು ಲೇಟೆಸ್ಟ್‌ ಅಪ್ಡೇಟ್ಸ್‌ ಗಳಿಗಾಗಿ ಫ್ಯಾನ್ಸ್‌ ಕಾಯುತ್ತಿದ್ದಾರೆ.

ಒಂದಲ್ಲ ಒಂದು ಕಾರಣದಿಂದ ಟ್ರೆಂಡ್‌ ನಲ್ಲಿರುವ ಗೀತು ಮೋಹನ್‌ ದಾಸ್‌ ʼಟಾಕ್ಸಿಕ್‌ʼ ಕಲಾವಿದರ ಆಯ್ಕೆಯ ವಿಚಾರದಲ್ಲಿ ಕಳೆದ ಕೆಲ ದಿನಗಳಿಂದ ಸುದ್ದಿಯಲ್ಲಿದೆ. ಸಿನಿಮಾದಲ್ಲಿ ಮಲ್ಟಿಸ್ಟಾರ್ಸ್‌ ಗಳಿರಲಿದ್ದಾರೆ ಎನ್ನುವ ಸುದ್ದಿಯೊಂದು ಸಿನಿವಲಯದಲ್ಲಿ ಹರಿದಾಡುತ್ತಿದೆ.

ಪಾತ್ರವರ್ಗದ ವಿಚಾರದಲ್ಲಿ ನಟಿ ಕರೀನಾ ಕಪೂರ್‌ ಖಾನ್‌ ಅವರು ʼಟಾಕ್ಸಿಕ್‌ʼ ನಟಿಸುವುದು ಪಕ್ಕಾ ಎನ್ನುವ ಮಾತುಗಳು ಈಗಾಗಲೇ ಪ್ಯಾನ್ ಇಂಡಿಯಾದಲ್ಲಿ ಸಖತ್‌ ಸುದ್ದಿಯಾಗಿದೆ.

ಇದೀಗ ಬಂದಿರುವ ಮಾಹಿತಿ ಪ್ರಕಾರ ಸಿನಿಮಾದಲ್ಲಿ ಕರೀನಾ ಕಪೂರ್‌ ಹಾಗೂ ಕಿಯಾರಾ ಅಡ್ವಾಣಿ ಅವರು ಕಾಣಸಿಕೊಳ್ಳುವುದು ಪಕ್ಕಾವೆಂದು ಇನ್‌ ಸೈಡರ್ ಮೂಲವೊಂದು ತಿಳಿಸಿರುವುದಾಗಿ ಎಕ್ಸ್‌ ಕ್ಲೂಸಿವ್‌ ಆಗಿ ʼಪಿಂಕ್‌ ವಿಲ್ಲಾʼ ವರದಿ ಮಾಡಿದೆ. ‌

ಇತ್ತೀಚೆಗೆ ಬಂದಿರುವ ವರದಿಗಳ ಪ್ರಕಾರ ಕರೀನಾ ಕಪೂರ್‌ ಅವರು ಯಶ್‌ ಗೆ ನಾಯಕಿಯಾಗಿ ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಿಲ್ಲ, ಬದಲಾಗಿ ಅವರು ಸಹೋದರಿಯ ಪಾತ್ರವನ್ನು ಮಾಡಲಿದ್ದಾರೆ ಎಂದು ಹೇಳಲಾಗಿದೆ.

ಕಿಯಾರಾ ಹಾಗೂ ಕರೀನಾ ನಟಿಸುವುದು ಪಕ್ಕಾ ಆಗಿದ್ದು, ಇನ್ನೊಬ್ಬ ನಟಿಯೂ ಸಿನಿಮಾದಲ್ಲಿ ಪ್ರಧಾನ ಪಾತ್ರದಲ್ಲಿ ನಟಿಸಲಿದ್ದಾರೆ ಎನ್ನಲಾಗಿದೆ.

ಶ್ರುತಿ ಹಾಸನ್‌ ಕೂಡ ʼಟಾಕ್ಸಿಕ್‌ʼ ನಲ್ಲಿ ನಟಿಸಲಿದ್ದಾರೆ ಎನ್ನಲಾಗಿದೆ. ಆದರೆ ಈ ಬಗ್ಗೆ ಅಧಿಕೃತವಾಗಿ ಮಾಹಿತಿ ಹೊರಬಿದ್ದಿಲ್ಲ.

ಇನ್ನು ಕಿಯಾರಾ – ಕರೀನಾ ನಟಿಸುವ ಬಗ್ಗೆ ಶೀಘ್ರದಲ್ಲಿ ಸಿನಿಮಾತಂಡ ಅಧಿಕೃತವಾಗಿ ಮಾಹಿತಿಯನ್ನು ಹಂಚಿಕೊಳ್ಳಲಿದೆ ಎಂದು ವರದಿ ತಿಳಿಸಿದೆ.

ಕೆವಿಎನ್ ಪ್ರೊಡಕ್ಷನ್ ಅಡಿಯಲ್ಲಿ ವೆಂಕಟ್ ಕೆ ನಾರಾಯಣ್‌ ʼಟಾಕ್ಸಿಕ್‌ʼ ನಿರ್ಮಾಣ ಮಾಡಲಿದ್ದು, 2025 ರ ಏ.10 ರಂದು ಸಿನಿಮಾ ರಿಲೀಸ್‌ ಆಗಲಿದೆ.