ಮಹಿಳಾ ಕೋಚ್‌ ಆಯ್ಕೆ ಸಮಿತಿಯಲ್ಲಿ ಕಪಿಲ್‌?

ಮುಂಬಯಿ: ಭಾರತ ಮಹಿಳಾ ಕ್ರಿಕೆಟ್‌ ತಂಡಕ್ಕೆ ನೂತನ ಕೋಚ್‌ ಹುಡುಕಾಟದಲ್ಲಿರುವ ಬಿಸಿಸಿಐ ಸಣ್ಣ ಇಕ್ಕಟ್ಟಿನಲ್ಲಿದೆ. ತರಬೇತುದಾರರ ಆಯ್ಕೆ ಹೊಣೆ ಹೊತ್ತುಕೊಳ್ಳಬೇಕಾಗಿದ್ದ ಉನ್ನತ ಸಲಹಾ ಸಮಿತಿ ಸದಸ್ಯರಾದ ಸಚಿನ್‌ ತೆಂಡುಲ್ಕರ್‌, ಸೌರವ್‌ ಗಂಗೂಲಿ, ವಿವಿಎಸ್‌ ಲಕ್ಷ್ಮಣ್‌ ಈ ಬಾರಿ ಆ ಕರ್ತವ್ಯ ನಿರ್ವಹಿಸುವ ಸಾಧ್ಯತೆಯಿಲ್ಲ. ಇವರ ಬದಲಿಗೆ ಕಪಿಲ್‌ ದೇವ್‌ ಈ ಕಾರ್ಯ ನಿರ್ವಹಿಸುವ ಸಾಧ್ಯತೆಯಿದೆ ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.

ನ. 30ಕ್ಕೆ ಹಂಗಾಮಿ ತರಬೇತುದಾರ ರಮೇಶ್‌ ಪೊವಾರ್‌ ತಮ್ಮ ಸ್ಥಾನ ಕಳೆದುಕೊಂಡಿದ್ದರು. ಡಿ. 15ರ ಒಳಗೆ ಹೊಸ ತರಬೇತುದಾರರನ್ನು ನೇಮಿಸಬೇಕಾಗಿದೆ.

ಸಚಿನ್‌, ಸೌರವ್‌, ಲಕ್ಷ್ಮಣ್‌ ತಮ್ಮ ವೈಯಕ್ತಿಕ ಹೊಣೆಗಾರಿಕೆಯಿಂದ ಈ ಜವಾಬ್ದಾರಿ ಹೊರಲು ಸಾಧ್ಯವಿಲ್ಲ ಎನ್ನಲಾಗಿದೆ. ಆಗ ಹೊಸ ಸಮಿತಿ ರಚಿಸಿ ಆ ಮೂಲಕ ತರಬೇತುದಾರರ ಆಯ್ಕೆಯಾಗಲಿದೆ. ಸದ್ಯ ಕಪಿಲ್‌ದೇವ್‌, ಸುನೀಲ್‌ ಗಾವಸ್ಕರ್‌, ಅಂಶುಮನ್‌ ಗಾಯಕ್ವಾಡ್‌, ಶುಭಾಂಗ್‌ ಕುಲಕರ್ಣಿ, ಶಾಂತಾ ರಂಗಸ್ವಾಮಿ ಹೆಸರು ಪರಿಶೀಲನೆಯಲ್ಲಿದೆ. ಇವರ ಲಭ್ಯತೆಯನ್ನು ಪರಿಶೀಲಿಸಿ ಸಮಿತಿ ರಚಿಸಲಾಗುವುದು ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.