ಬೆಂಗಳೂರು: ರಿಷಬ್‌ ಶೆಟ್ಟಿ ಅವರ ʼಕಾಂತಾರʼ ಚಿತ್ರ ವಿಶ್ವದೆಲ್ಲೆಡೆ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಪ್ಯಾನ್‌ ಇಂಡಿಯಾದಲ್ಲಿ ಡಬ್‌ ಆಗಿ ಚಿತ್ರ ಶೀಘ್ರದಲ್ಲಿ ರಿಲೀಸ್ ಆಗಲಿದೆ.
ಭಾನುವಾರ ( ಅ.9 ರಂದು) ʼಕಾಂತಾರʼ ಸಿನಿಮಾ ಪ್ಯಾನ್‌ ಇಂಡಿಯಾದಲ್ಲಿ ರಿಲೀಸ್ ಆಗಲಿರುವ ಭಾಷೆಗಳಲ್ಲಿ ಪೋಸ್ಟರ್‌ ಹಾಗೂ ಟ್ರೇಲರ್‌ ರಿಲೀಸ್ ಮಾಡಿದೆ. ಹಿಂದಿಯಲ್ಲಿ ಡಬ್‌ ಆಗಿರುವ ʼಕಾಂತಾರʼ ಅಕ್ಟೋಬರ್‌ 14 ರಂದು ಥಿಯೇಟರ್‌ ನಲ್ಲಿ ಬಿಡುಗಡೆ ಆಗಲಿದೆ. ಇನ್ನು ತೆಲುಗಿನಲ್ಲಿ ಚಿತ್ರ ಅಕ್ಟೋಬರ್‌ 15 ರಂದು ಬಿಡುಗಡೆ ಆಗಲಿದೆ. ಉಳಿದ ಭಾಷೆಯಲ್ಲಿ ಡಬ್‌ ಆಗಿರುವ ಚಿತ್ರದ ರಿಲೀಸ್ ಡೇಟ್‌ ಶೀಘ್ರದಲ್ಲಿ ಹೊರ ಬರಲಿದೆ.
ತುಳುನಾಡಿನ ಆಚಾರ- ವಿಚಾರವನ್ನು ಹೇಳಿರುವ ʼಕಾಂತಾರʼ ದಲ್ಲಿ ರಿಷಬ್‌ ಕ್ಯಾಪ್ಟನ್‌ ಆಫ್‌ ದಿ ಶಿಪ್‌ ಆಗಿ, ಇಡೀ ಚಿತ್ರದಲ್ಲಿ ಪ್ರೇಕ್ಷಕರ ಮನ ಗೆಲ್ಲುತ್ತಾರೆ. ರಿಷಬ್‌ ನಿರ್ದೇಶನ ಹಾಗೂ ನಟನೆ , ಅಜನೀಶ್‌ ಸಂಗೀತ, ಅರವಿಂದ್‌ ಕಶ್ಯಪ್‌ ಕ್ಯಾಮರಾ ವರ್ಕ್‌ ʼಕಾಂತಾರʼದ ಕುತೂಹಲವನ್ನು ಕಡೆಯೂವರೆಗೂ ಕುಳಿತು ನೋಡುವಂತೆ ಮಾಡುತ್ತದೆ.
ಇದೀಗ ಕೆಲ ವರದಿಗಳ ಪ್ರಕಾರ, ʼಕಾಂತಾರʼ ಓಟಿಟಿಯಲ್ಲಿ ರಿಲೀಸ್ ಆಗುವ ಮಾತುಗಳು ಕೇಳಿ ಬಂದಿದೆ. ನವೆಂಬರ್‌ 4ರಂದು ಅಮೆಜಾನ್‌ ಪ್ರೈಮ್‌ ನಲ್ಲಿ ಚಿತ್ರ ಓಟಿಟಿ ಮೂಲಕ ರಿಲೀಸ್ ಆಗಲಿದೆ. ಈಗಾಗಲೇ ಸ್ಟಾರ್‌ ಸುವರ್ಣ ಚಾನೆಲ್‌ ಗೆ ಟಿವಿ ರೈಟ್ಸ್ ಮಾರಾಟವಾಗಿದೆ ಎಂದು ಓಟಿಟಿ ಪ್ಲೇ ವರದಿ ಹೇಳಿದೆ.
ಆದರೆ ಇದು ಅಧಿಕೃತವಾಗಿಲ್ಲ. ಹೊಂಬಾಳೆ ಫಿಲ್ಮ್ಸ್‌ ಆಗಲಿ, ಚಿತ್ರತಂಡದಿಂದಾಗಲಿ ಅಧಿಕೃತವಾಗಿ ಮಾಹಿತಿ ಹೊರ ಬಿದ್ದಿಲ್ಲ. ರಿಷಭ್‌ ಶೆಟ್ಟಿ, ಸಪ್ತಮಿ ಗೌಡ, ಅಚ್ಯುತ್‌ ಕುಮಾರ್‌, ಕಿಶೋರ್‌, ಪ್ರಮೋದ್‌ ಶೆಟ್ಟಿ, ಸ್ವರಾಜ್‌ ಶೆಟ್ಟಿ ಮುಂತಾದವರು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ.
