ಮಡಿಕೇರಿ: ಶಾಲಾ ಮುಖ್ಯಸ್ಥೆಯೊಬ್ಬರು ತನ್ನ ಮೇಲೆ ಮಹಾಕಾಳಿ ಆವಾಹನೆಯಾಗಿದೆ ಎಂದು ಕೈಯಲ್ಲಿ ತ್ರಿಶೂಲ ಹಿಡಿದು ವಿಚಿತ್ರವಾಗಿ ವರ್ತಿಸಿದ ಘಟನೆ ಕುಶಾಲನಗರದ ಪಟ್ಟಣ ಪಂಚಾಯತಿಯ ಎದುರು ಶುಕ್ರವಾರ ನಡೆದಿದೆ.
ಬ್ರಿಲಿಯಂಟ್‌ ಬ್ಲೂಮ್‌ ಎಂಬ ಶಾಲೆಯ ಮುಖ್ಯಸ್ಥೆಯಾಗಿರುವ ಮುಬಿನ್‌ ತಾಜ್‌ ಎಂಬ ಮಹಿಳೆ ವಿಚಿತ್ರ ವರ್ತನೆ ತೋರಿದ್ದು , ಮೈಮೇಲೆ ದೇವಿ ಬಂದಂತೆ ಮುಖಭಾವ ತೋರಿ ನಮ್ಮ ಶಾಲೆಯ ಕೊಠಡಿಯ ಭೂಮಿಯ ಆಳದಲ್ಲಿ 7 ಅಡಿಯಷ್ಟು ದೊಡ್ಡದಾದ ಮಹಾಕಾಳಿಯ ವಿಗ್ರಹವಿದೆ. 10 ಕೈಗಳಿವೆ . ಆ ವಿಗ್ರಹ ಮೇಲೆಕ್ಕತ್ತಲು ಅಡತಡೆಗಳಿವೆ, ಅದನ್ನು ಪರಿಹರಿಸಿ ಎಂದು ಒತ್ತಾಯಿಸಿದರು.
ಮಹಿಳೆಯ ಈ ವರ್ತನೆ ಕೆಲವರಿಗೆ ಪುಕ್ಕಟೆ ಮನೊರಂಜನೆ ನೀಡಿದರೆ ಇನ್ನು ಕೆಲವರಿಗೆ ನಗು ತಡೆಯಲಾಗಲಿಲ್ಲ.
ಮಾಧ್ಯಮ ಪ್ರತಿನಿಧಿಗಳ ಎದುರೂ ಪೋಸ್‌ ನೀಡಿದ ಮುಬಿನ್‌ ತಾಜ್‌ ದೇವಿ ಆವಾಹನೆಯಾದಂತೆ ವಿಚಿತ್ರ ವರ್ತನೆ ಮುಂದುವರಿಸಿ ಹಹಹಹಹಾ..ಎಂದು ನಾಲಿಗೆ ಹೊರಹಾಕಿ,ನಾನು ಮಹಾಕಾಳಿ…ನಾನು ಚಪ್ಪಲಿ ಹಾಕ್‌ಕೊಳ್ಬಾರ್ದಾ…ನೀನು ಹಾಕಿಲ್ವಾ..ಬೇಕಾ ನನ್‌ ಚಪ್ಪಲಿ . ಈ ಪ್ರಪಂಚದಲ್ಲಿ ಎಂಥಹವರನ್ನೆಲ್ಲಾ ಸೃಷ್ಟಿ ಮಾಡಿದ್ದೇನೆ ಗೊತ್ತಾ ? ಎಂದರು
ಸ್ಥಳಕ್ಕಾಗಮಿಸಿದ ಕುಶಾಲನಗರದ ಮಹಿಳಾ ಠಾಣಾ ಪೊಲೀಸರು ಆಕೆಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿ ಬಿಡುಗಡೆಗೊಳಿಸಿದ್ದಾರೆ. ಈ ಸುದ್ದಿ ಈಗ ವೈರಲ್ ಆಗಿದೆ.
