ಸ್ಕಿಲ್‌ ಇಂಡಿಯಾದಷ್ಟೇ ಸೇಫ್ ಇಂಡಿಯಾ ಮುಖ್ಯ

ಮುಂಬಯಿ:  ಲೈಂಗಿಕ ಕಿರುಕುಳ, ದೌರ್ಜನ್ಯದಿಂದ ಮಕ್ಕಳನ್ನು ಪಾರು ಮಾಡಲು ಪ್ರತಿಯೊಬ್ಬರೂ ಸಂಘಟಿತ ಪ್ರಯತ್ನ ಮಾಡಬೇಕಿದೆ. ಸ್ಕಿಲ್‌ ಇಂಡಿಯಾ(ಕೌಶಲ ಭಾರತ)ದಷ್ಟೇ ಸೇಫ್ ಇಂಡಿಯಾ(ಸುರಕ್ಷ ಭಾರತ)ವೂ ಮುಖ್ಯ ಎಂದು ನೊಬೆಲ್‌ ಶಾಂತಿ ಪ್ರಶಸ್ತಿ ಪುರಸ್ಕೃತ ಕೈಲಾಶ್‌ ಸತ್ಯಾರ್ಥಿ ಹೇಳಿದ್ದಾರೆ.

ತಮ್ಮ 35 ದಿನಗಳ ರಾಷ್ಟ್ರವ್ಯಾಪಿ “ಭಾರತ್‌ ಯಾತ್ರೆ’ ಕಾರ್ಯ ಕ್ರಮದ ಅಂಗವಾಗಿ ಗುರುವಾರ ಮುಂಬೈ ಷೇರು ಮಾರುಕಟ್ಟೆಯಲ್ಲಿ ಅವರು ಕಾರ್ಪೊರೇಟ್‌ಗಳನ್ನು ಉದ್ದೇಶಿಸಿ ಮಾತನಾಡಿದರು. ದೇಶವು ಸಮಗ್ರ ಪ್ರಗತಿ ಸಾಧಿಸಿ ನಿಜವಾದ ಅರ್ಥದಲ್ಲಿ ಸಾಧನೆ ಮಾಡಿದೆ ಎಂಬ ಮಾತಿಗೆ ಬೆಲೆ ಬರಬೇಕಾದರೆ, ಮಕ್ಕಳು ಎಲ್ಲ ರೀತಿ ಶೋಷಣೆಗಳಿಂದ ಮುಕ್ತರಾಗಿ ಬದುಕುವ ವಾತಾವರಣ ನಿರ್ಮಾಣವಾಗಬೇಕು. ಅದನ್ನು ನಿರ್ಮಿಸುವ ಹೊಣೆ ನಮ್ಮದು ಎಂದವರು ಪ್ರತಿಪಾದಿಸಿದ್ದಾರೆ.

ಭಾರತವು ಕೇವಲ ಸ್ಕಿಲ್‌ ಇಂಡಿಯಾ ಆದರೆ ಸಾಲದು. ಸೇಫ್ ಇಂಡಿಯಾ ಕೂಡ ಆಗಬೇಕು. ಅದಕ್ಕಾಗಿ ನಿಮ್ಮ ಅಧಿಕಾರ, ಪ್ರಭಾವ ಮತ್ತು ಕೌಶಲವನ್ನು ಬಳಸಿ ಎಂದೂ ಸತ್ಯಾರ್ಥಿ ಅವರು ಉದ್ಯಮಿಗಳಿಗೆ ಕರೆ ನೀಡಿದ್ದಾರೆ. ನಮ್ಮ ಮಕ್ಕಳಿಗೆ ಉಚಿತ ಶಿಕ್ಷಣ ಮತ್ತು ಸುರಕ್ಷಿತ ಬಾಲ್ಯ ಸಿಕ್ಕರೆ ಭಾರತದ ಜಿಡಿಪಿ ಶೇ.9ಕ್ಕೇರಿದ್ದಕ್ಕಿಂತಲೂ ದೊಡ್ಡ ದಾದ ಸಾಧನೆ ಮಾಡಿದಂತಾಗುತ್ತದೆ ಎಂದೂ ಅವರು ಹೇಳಿದ್ದಾರೆ.

ಕರ್ನಾಟಕ ಸೇರಿ 22 ರಾಜ್ಯಗಳಲ್ಲಿ ಯಾತ್ರೆ
ಮಕ್ಕಳ ಕಳ್ಳ ಸಾಗಣೆ ಮತ್ತು ಅವರ ಮೇಲಿನ ಲೈಂಗಿಕ ದೌರ್ಜನ್ಯಗಳ ವಿರುದ್ಧ ದೇಶಾದ್ಯಂತ ಜಾಗೃತಿ ಮೂಡಿಸುವ ಸಲುವಾಗಿ ಸತ್ಯಾರ್ಥಿ ಅವರು 35 ದಿನಗಳ “ಭಾರತ ಯಾತ್ರೆ’ ಕೈಗೊಂಡಿದ್ದಾರೆ. ತಮಿಳುನಾಡಿನ ಕನ್ಯಾ ಕುಮಾರಿಯಿಂದ ಸೆ.11ರಂದು ಆರಂಭವಾ ಗುವ ಯಾತ್ರೆ ಕರ್ನಾಟಕ ಸೇರಿದಂತೆ 22 ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶ ಗಳನ್ನು ಪ್ರದಕ್ಷಿಣೆ ಹಾಕಿ(ಒಟ್ಟು 15 ಸಾವಿರ ಕಿ.ಮೀ.), ಅಕ್ಟೋಬರ್‌ 15 ರಂದು ದೆಹಲಿ ಯಲ್ಲಿ ಸಮಾರೋಪಗೊಳ್ಳಲಿದೆ. ಈ ಯಾತ್ರೆಯಲ್ಲಿ ಲೈಂಗಿಕ ದೌರ್ಜನ್ಯದ ಸಂತ್ರಸ್ತರು, ವಿದ್ಯಾರ್ಥಿಗಳು, ರಾಜಕೀಯ ನಾಯಕರು ಹಾಗೂ ಜನಸಾಮಾನ್ಯರು ಭಾಗವಹಿಸಲಿದ್ದಾರೆ.