ಲಂಡನ್‌: ವಿಶ್ವಕಪ್ ತಂಡಕ್ಕೆ ಆಯ್ಕೆಯಾಗುವಲ್ಲಿ ಯಶಸ್ವಿಯಾದ ಇಂಗ್ಲೆಂಡಿನ ವೇಗಿ ಜೋಫ್ರಾ ಆರ್ಚರ್‌ ಈಗ ಭಾರೀ ಖುಷಿಯಲ್ಲಿದ್ದಾರೆ. ಈ ಸಂದರ್ಭದಲ್ಲಿ ಪ್ರತಿಕ್ರಿಯಿಸಿದ ಅವರು, ವಿಶ್ವಕಪ್‌ನಲ್ಲಿ ಭಾರತದ ನಾಯಕ ವಿರಾಟ್‌ ಕೊಹ್ಲಿ ಅವರ ವಿಕೆಟ್‌ ಉರುಳಿಸುವುದು ತನ್ನ ಗುರಿ ಎಂಬುದಾಗಿ ಹೇಳಿದ್ದಾರೆ.
ಆರ್ಚರ್‌ ಕಳೆದೆರಡು ಐಪಿಎಲ್‌ನಲ್ಲಿ ಆಡಿದರೂ ಕೊಹ್ಲಿಗೆ ಎಸೆದದ್ದು 2 ಎಸೆತ ಮಾತ್ರ. ಒಂದರಲ್ಲಿ ಕೊಹ್ಲಿ ಸಿಂಗಲ್‌ ತೆಗೆದರೆ, ಇನ್ನೊಂದು ಲೆಗ್‌ಬೈ ಆಗಿತ್ತು.
“ವಿಶ್ವಕಪ್‌ನಲ್ಲಿ ವಿರಾಟ್‌ ಕೊಹ್ಲಿ ವಿಕೆಟ್‌ ಉರುಳಿಸುವುದು ನನ್ನ ಗುರಿ. ಏಕೆಂದರೆ ನನಗೆ ಐಪಿಎಲ್‌ನಲ್ಲಿ ಅವರನ್ನು ಔಟ್‌ ಮಾಡಲು ಸಾಧ್ಯವಾಗಿರಲಿಲ್ಲ’ ಎಂದು ಸ್ಕೈ ನ್ಪೋರ್ಟ್ಸ್ ಜತೆ ಆರ್ಚರ್‌ ತಮಾಷೆಯಾಗಿ ಹೇಳಿದ್ದಾರೆ.
“ಇಂಗ್ಲೆಂಡ್‌ ವಿಶ್ವಕಪ್ ತಂಡಕ್ಕೆ ನನ್ನನ್ನು ಸೇರಿಸಿದ ಸಿಹಿ ಸುದ್ದಿ ಬಂದಾಗ ನಾನು ಡ್ರೈವಿಂಗ್‌ನಲ್ಲಿದ್ದೆ. ಫೋನ್‌ ವೈಬ್ರೇಟ್‌ ಮೋಡ್‌ನ‌ಲ್ಲಿತ್ತು. ಅದು ಆಯ್ಕೆ ಮಂಡಳಿ ಸದಸ್ಯ ಎಡ್‌ ಸ್ಮಿತ್‌ ಕರೆಯಾಗಿತ್ತು. ಆಗಲೇ ನನಗೆ ವಿಶ್ವಕಪ್ ಆಯ್ಕೆ ಖಾತ್ರಿಯಾಗಿತ್ತು’ ಎಂದರು.
