50 ರೂ. ಕಡಿಮೆಯಾಗಿದ್ದಕ್ಕೆ ಸ್ಕ್ಯಾನ್ ಮಾಡಲು ನಕಾರ, ಮಗು ಸಾವು!

ರಾಂಚಿ: ಕೆಳಗೆ ಬಿದ್ದು ತಲೆಗೆ ಪೆಟ್ಟು ಬಿದ್ದಿದ್ದ ಒಂದು ವರ್ಷದ ಮಗುವಿಗೆ ಸಿಟಿ ಸ್ಕ್ಯಾನ್ ಮಾಡಲು 50 ರೂಪಾಯಿ ಶುಲ್ಕ ಕಡಿಮೆಯಾಗಿದೆ ಎಂಬ ಕಾರಣಕ್ಕಾಗಿ ನಿರಾಕರಿಸಿದ್ದರಿಂದ ಮಗು ಸಾವನ್ನಪ್ಪಿರುವ ಘಟನೆ ಜಾರ್ಖಂಡ್ ಆಸ್ಪತ್ರೆಯಲ್ಲಿ ನಡೆದಿದೆ ಎಂದು ಮಾಧ್ಯಮದ ವರದಿ ತಿಳಿಸಿದೆ.

ರಾಂಚಿಯ ರಾಜೇಂದ್ರ ಇನ್ಸ್ ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸ್ (ಆರ್ ಐಎಂಎಸ್) ಆಸ್ಪತ್ರೆಗೆ ಭಾನುವಾರ ತಂದೆ ಒಂದು ವರ್ಷದ ಮಗುವನ್ನು ಕರೆತಂದಿದ್ದರು. ತಲೆಗೆ ಏಟು ಬಿದ್ದಿದ್ದರಿಂದ ಸಿಟಿ ಸ್ಕ್ಯಾನ್ ಮಾಡಿಸುವಂತೆ ವೈದ್ಯರು ಸೂಚಿಸಿದ್ದರು.

ಸಿಟಿ ಸ್ಕ್ಯಾನ್ ಶುಲ್ಕ 1,350 ರೂಪಾಯಿ, ಆದರೆ ಮಗುವಿನ ತಂದೆ ಸಂತೋಷ್ ಕುಮಾರ್ ಬಳಿ 1,300 ರೂಪಾಯಿ ಮಾತ್ರ ಇದ್ದಿತ್ತು. ಆದರೆ 50 ರೂಪಾಯಿ ಕಡಿಮೆಯಾಗಿದ್ದಕ್ಕೆ ಸ್ಕ್ಯಾನ್ ಮಾಡಲು ನಿರಾಕರಿಸಿದ್ದರು. ಏತನ್ಮಧ್ಯೆ ತಂದೆ ಮೊದಲು ಸ್ಕ್ಯಾನ್ ಮಾಡಿ ಉಳಿದ ಹಣ ಕೊಡುವುದಾಗಿ ಮನವಿ ಮಾಡಿದ್ದಾರೆಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

50 ರೂಪಾಯಿ ಹಣಕ್ಕಾಗಿ ಸಂತೋಷ್ ಕುಮಾರ್ ತನ್ನ ಗೆಳೆಯನಿಗೆ ಮೊಬೈಲ್ ಕರೆ ಮಾಡಿ ತಿಳಿಸಿದ್ದ, ಗೆಳೆಯ 50 ರೂಪಾಯಿ ಹಣದೊಂದಿಗೆ ಆಸ್ಪತ್ರೆಗೆ ಬಂದಾಗ ಮಗು ಸಾವನ್ನಪ್ಪಿರುವುದಾಗಿ ವರದಿ ವಿವರಿಸಿದೆ.