ಜಾರ್ಖಂಡ್ ವಿಧಾನಸಭೆ ಚುನಾವಣೆ: 17 ಕ್ಷೇತ್ರಗಳಲ್ಲಿ ಇಂದು ಮೂರನೇ ಹಂತದ ಮತದಾನ

ರಾಂಚಿ: ಜಾರ್ಖಂಡ್ ವಿಧಾನಸಭಾ ಚುನಾವಣೆಯ ಮೂರನೇ ಹಂತದ ಮತದಾನ ಪ್ರಕ್ರಿಯೆ ಇಂದು ನಡೆಯುತ್ತಿದ್ದು ,  17 ಕ್ಷೇತ್ರದ ಅಭ್ಯರ್ಥಿಗಳ ರಾಜಕೀಯ ಭವಿಷ್ಯವನ್ನು ಮತದಾರರು ಬರೆಯಲಿದ್ದಾರೆ.

ಜಾರ್ಖಂಡ್ ವಿಧಾನಸಭಾ ಚುನಾವಣೆಯು  ಒಟ್ಟಾರೆ ಐದು ಹಂತದಲ್ಲಿ ನಡೆಯಲಿದ್ದು , ಇಂದು ಮೂರನೇ ಹಂತದ ಮತದಾನವಾಗಿದೆ. ಪ್ರಮುಖವಾಗಿ ಕೋಡರ್ಮಾ, ಬರ್ಕಾಥಾ, ಬಾರ್ಹಿ, ಮಾಂಡು, ಹಜಾರಿಬಾಗ್, ಸಿಮರಿಯಾ (ಎಸ್‌ಸಿ), ಬಾರ್ಕಗಾಂವ್, ರಾಮ್ ಗಢ್ , ಧನ್ವಾರ್, ಗೋಮಿಯಾ, ಬೆರ್ಮ, ಇಚ ಗಢ್  ಸಿಲ್ಲಿ, ಖಿಜ್ರಿ (ಎಸ್‌ಟಿ), ರಾಂಚಿ, ಹಟಿಯಾ ಮತ್ತು ಕಾಂಕೆ (ಎಸ್‌ಸಿ) ಕ್ಷೇತ್ರದಗಳಿಗೆ ಮತದಾನ ನಡೆಯಲಿದೆ.

17 ಕ್ಷೇತ್ರಗಳಲ್ಲಿ 32 ಮಹಿಳಾ ನಾಮನಿರ್ದೇಶಿತರು ಸೇರಿದಂತೆ 309 ಅಭ್ಯರ್ಥಿಗಳ ಭವಿಷ್ಯವನ್ನು ಇಂದು ಮತದಾರರು ನಿರ್ಧರಿಸಲಿದ್ದಾರೆ. 26,80,205 ಮಹಿಳೆಯರು, 86 ತೃತೀಯ ಲಿಂಗ ಮತದಾರರು ಸೇರಿದಂತೆ 56,18,267 ಮತದಾರರಿದ್ದಾರೆ.

ಮೂರನೇ ಹಂತದಲ್ಲಿ, ಮಾಜಿ ಮುಖ್ಯಮಂತ್ರಿ ಬಾಬುಲಾಲ್ ಮರಂಡಿ, ಮಾಜಿ ಉಪಮುಖ್ಯಮಂತ್ರಿ ಮತ್ತು ಆಲ್ ಜಾರ್ಖಂಡ್ ವಿದ್ಯಾರ್ಥಿ ಸಂಘ (ಎಜೆಎಸ್‌ಯು) ಅಧ್ಯಕ್ಷ ಸುದೇಶ್ ಮಹ್ತೋ ಸೇರಿದಂತೆ, ಸಚಿವರಾದ – ಸಿ.ಪಿ. ಸಿಂಗ್, ರಾಮಚಂದ್ರ ಸಾಹಿಸ್ ಮತ್ತು ನೀರಾ ಯಾದವ್ ಕಣದಲ್ಲಿದ್ದಾರೆ.