ಈ ಕಾಲೇಜುಗಳಲ್ಲಿ ಕನಿಷ್ಟ ಸೌಲಭ್ಯಗಳೂ ಇಲ್ಲ!

ವಿಜಯಕುಮಾರ ಕಲ್ಲಾ
ಜೇವರ್ಗಿ: ನಮ್ಮದು ಶೇ. 100 ಫಲಿತಾಂಶ ಪಡೆಯುವ ಕಾಲೇಜು, ಎಸ್‌ಎಸ್‌ಎಲ್ಸಿಯಲ್ಲಿ ಉತ್ತಮ ರ್‍ಯಾಂಕ್‌ ಪಡೆದ ವಿದ್ಯಾರ್ಥಿಗಳಿಗೆ ಮಾತ್ರ ಪ್ರವೇಶ, ಶುಲ್ಕದಲ್ಲಿ ಡಿಸ್ಕೌಂಟ್ ಕೂಡಾ ಇದೆ. ತಾಲೂಕಿನಲ್ಲಿಯೇ ನಂ.1 ಕಾಲೇಜು ನಮ್ಮದೇ…!

ಪ್ರತಿ ಶೈಕ್ಷಣಿಕ ವರ್ಷದಲ್ಲಿ ತರಗತಿಗಳು ಆರಂಭಗೊಳ್ಳುವಾಗ ಶಾಲಾ-ಕಾಲೇಜುಗಳು ಇಂತಹ ಪ್ರಕಟಣೆ ನೀಡುವುದು ಹೊಸತೇನಲ್ಲ. ಆದರೆ ಯಾವುದೇ ಸೌಲಭ್ಯ ಒದಗಿಸದ ಹತ್ತಾರು ಕಾಲೇಜುಗಳು ಇಂತಹ ನಯನಾಜೂಕಿನ ಪ್ರಚಾರ ಮಾಡುತ್ತಿವೆ. ಈ ಕುರಿತು ಪದವಿಪೂರ್ವ ಶಿಕ್ಷಣ ಇಲಾಖೆ ಮಾತ್ರ ಮೌನಕ್ಕೆ ಜಾರಿರುವುದು ಪೋಷಕರಲ್ಲಿ ಗೊಂದಲ ಮೂಡಲು ಕಾರಣವಾಗಿದೆ.

ತಾಲೂಕಿನಲ್ಲಿ ಒಟ್ಟು 12ಕ್ಕಿಂತ ಹೆಚ್ಚು ಖಾಸಗಿ ಕಾಲೇಜುಗಳಿವೆ. ಫಲಿತಾಂಶದಲ್ಲಿ ಉತ್ತಮ ಸಾಧನೆ ತೋರುವಲ್ಲಿ ವಿಫಲವಾಗಿದ್ದರೂ ತಾಲೂಕಿನಲ್ಲಿಯೇ ನಾವೇ ಉತ್ತಮ ಎಂದು ಹೇಳುವ ಮೂಲಕ ಕಾಲೇಜುಗಳು ವಿದ್ಯಾರ್ಥಿಗಳನ್ನು ಆಕರ್ಷಿಸಲು ಯತ್ನಿಸುತ್ತಿವೆ. ಕಾಲೇಜುಗಳ ಮುಖ್ಯಸ್ಥರು ಹೇಳುತ್ತಿರುವುದು ನಿಜವೇ ಎನ್ನುವುದನ್ನು ಅರಿಯಲಾಗದೇ ಪೋಷಕರು ಗೊಂದಲ ಅನುಭವಿಸುವಂತಾಗಿದೆ.

ತಾಲೂಕಿನ ಶೇ. 80 ರಷ್ಟು ಖಾಸಗಿ ಕಾಲೇಜುಗಳಲ್ಲಿ ಮೂಲಸೌಕರ್ಯ ಇಲ್ಲದಿದ್ದರೂ ಅನುಮತಿ ನೀಡಲಾಗಿದೆ ಎನ್ನುವುದು ಖುದ್ದು ಪರಿಶೀಲನೆಯಿಂದ ಬಹಿರಂಗವಾಗಲಿದೆ. ಸರ್ಕಾರದ ನಿಯಮಗಳನ್ನು ತಾಲೂಕಿನ ಬಹುತೇಕ ಕಾಲೇಜುಗಳು ಗಾಳಿಗೆ ತೂರಿ ಗ್ರಾಮೀಣ, ನಗರ ಎನ್ನುವ ಭೇದವಿಲ್ಲದೆ ಮಕ್ಕಳ ಪೋಷಕರಿಂದ ಶುಲ್ಕದ ಹೆಸರಿನಲ್ಲಿ ಸುಲಿಗೆ ಮಾಡುತ್ತಿವೆ. ಆದರೂ ಜಿಲ್ಲಾಡಳಿತವಾಗಲಿ, ಪದವಿ ಪೂರ್ವ ಶಿಕ್ಷಣ ಇಲಾಖೆಯಾಗಲಿ ಇತ್ತ ಗಮನ ಹರಿಸಿದ ಉದಾಹರಣೆಗಳೇ ಇಲ್ಲ.

ಸರ್ಕಾರ ಮತ್ತು ಪದವಿಪೂರ್ವ ಶಿಕ್ಷಣ ಇಲಾಖೆಯೇ ಹೇಳುವಂತೆ ಯಾವುದೇ ಕಾಲೇಜಿನ ಪ್ರತಿ ಕೊಠಡಿಯ ವಿಸ್ತೀರ್ಣ ಇಷ್ಟೆ ಇರಬೇಕು ಎನ್ನುವ ನಿಯಮವಿದೆ. ಪ್ರಾಂಶುಪಾಲರ ಕೊಠಡಿ, ಉಪನ್ಯಾಸಕರು ಮತ್ತು ಸಿಬ್ಬಂದಿ ಕೊಠಡಿ, ಕಡ್ಡಾಯವಾಗಿ ವಿದ್ಯಾರ್ಥಿ-ವಿದ್ಯಾರ್ಥಿನಿಯರಿಗೆ ಪ್ರತ್ಯೇಕ ಶೌಚಾಲಯಗಳು, ಆಟದ ಮೈದಾನ, ಪ್ರತಿ ವಿಭಾಗಕ್ಕೆ ಒಂದರಂತೆ ಪ್ರಯೋಗಾಲಯ (ಲ್ಯಾಬ್‌ಗಳು), ಶುದ್ಧ ಕುಡಿಯುವ ನೀರು ಹೀಗೆ ಅನೇಕ ನಿಯಮಗಳಿವೆ. ಶೇ. 80ರಷ್ಟು ಕಾಲೇಜುಗಳಲ್ಲಿ ಆಟದ ಮೈದಾನವೇ ಇಲ್ಲ. ಶೇ. 50ಕ್ಕೂ ಹೆಚ್ಚು ಕಾಲೇಜುಗಳಿಗೆ ಶೌಚಾಲಯಗಳಿಲ್ಲ. ಶೇ. 70ರಷ್ಟು ಕಾಲೇಜುಗಳಲ್ಲಿ ಲ್ಯಾಬ್‌ಗಳಿಲ್ಲ. ಶೇ. 90 ಕಾಲೇ ಜುಗಳಿಗೆ ಸ್ವಂತ ಕಟ್ಟಡವೇ ಇಲ್ಲ. ಇನ್ನು ಗಾಳಿ, ಬೆಳಕು ಬಾರದ ರೀತಿಯಲ್ಲಿ ಕಿಟಕಿಗಳೇ ಇಲ್ಲದ ಕೊಠಡಿಗಳಲ್ಲಿ ಮಕ್ಕಳಿಗೆ ಪಾಠ ಮಾಡುವ ದುಸ್ಥಿತಿ ಇದ್ದರೂ ಪದವಿ ಪೂರ್ವ ಶಿಕ್ಷಣ ಇಲಾಖೆ ಇತ್ತ ಗಮನವನ್ನೇ ಹರಿಸಿಲ್ಲ. ಯಾವುದೇ ಕಾಲೇಜು ಅನುಮತಿ ಪಡೆಯುವ ವೇಳೆ ಹಲವು ಮೂಲಸೌಲಭ್ಯಗಳಿಲ್ಲ ಎನ್ನುವುದು ಸಾಬೀತಾದರೆ ಒಂದು ವರ್ಷದಲ್ಲಿ ಎಲ್ಲಾ ಮೂಲಸೌಕರ್ಯ ಒದಗಿಸಲಾಗುವುದು ಎಂದು ಇಲಾಖೆಗೆ ಮುಚ್ಚಳಿಕೆ ಬರೆದು ಕೊಡಬೇಕಾಗುತ್ತದೆ. ಈ ಒಂದು ಅಂಶವನ್ನು ಅಂಕುಶವಾಗಿಬಳಸುತ್ತಿರುವ ಖಾಸಗಿ ಕಾಲೇಜುಗಳು ಒಂದು ವರ್ಷದಲ್ಲಿ ಮೂಲ ಸೌಲಭ್ಯ ಒದಗಿಸಲಾಗುವುದು ಎಂದು ಪ್ರತಿ ವರ್ಷ ಹೇಳುತ್ತಲೇ ಕಾಲೇಜಿನ ನವೀಕರಣ ಪಡೆಯುತ್ತಿವೆ.

ಪ್ರತಿ ವರ್ಷ ಖಾಸಗಿ ಕಾಲೇಜುಗಳು ನಾಯಿಕೊಡೆಗಳಂತೆ ತಲೆ ಎತ್ತುತ್ತಿದ್ದು, ಹಲವು ಕಾಲೇಜುಗಳ ಮುಖ್ಯಸ್ಥರು ಹೆಚ್ಚಿನ ವಿದ್ಯಾಭ್ಯಾಸ ಮಾಡದಿದ್ದರೂ ಕಾಲೇಜುಗಳನ್ನು ತೆರೆದು ಪೋಷಕರಿಂದ ಹಣ ಸುಲಿಗೆ ಮಾಡುತ್ತಿದ್ದಾರೆ. ಎಸ್‌ಎಸ್‌ಎಲ್ಸಿ ಪರೀಕ್ಷೆ ನಂತರ ಕಾಲೇಜು ಸಿಬ್ಬಂದಿ ಆಯಾ ಪ್ರೌಢಶಾಲೆಗಳಿಗೆ ತೆರಳಿ ಕೆಲವು ಶಿಕ್ಷಕರಿಗೆ ಹಣ ಹಾಗೂ ಗಿಫ್ಟ್‌ ನೀಡುವ ಆಮಿಷವೊಡ್ಡಿ ವಿದ್ಯಾರ್ಥಿಗಳನ್ನು ಸೆಳೆದು ದಾಖಲಾತಿ ಮಾಡಿಕೊಳ್ಳುತ್ತಿವೆ. ಕೆಲವರು ಮಾತ್ರ ಹಳ್ಳಿ-ಹಳ್ಳಿಗಳಲ್ಲಿ ಮನೆ ಮನೆಗೆ ತೆರಳಿ ಇಲ್ಲ ಸಲ್ಲದ್ದನ್ನು ಹೇಳಿ ದಾಖಲಾತಿ ಮಾಡಿಕೊಳ್ಳುತ್ತಿದ್ದಾರೆ. ಗಲ್ಲಿಗಲ್ಲಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಕಾಲೇಜುಗಳಲ್ಲಿ ಅಗತ್ಯ ಮೂಲಸೌಲಭ್ಯಗಳನ್ನು ಒದಗಿಸಲಾಗಿದೆಯೇ, ಇಲ್ಲವೇ ಎಂಬ ಬಗ್ಗೆ ಪದವಿ ಪೂರ್ವ ಶಿಕ್ಷಣ ಇಲಾಖೆ ಉಪನಿರ್ದೇಶಕರು ಪರಿಶೀಲನೆ ನಡೆಸಿದ ಉದಾಹರಣೆಗಳೂ ಇಲ್ಲ.

ಜೇವರ್ಗಿ ತಾಲೂಕಿನ ಮೂರು ಖಾಸಗಿ ಕಾಲೇಜುಗಳಿಗೆ ಭೇಟಿ ಕೊಟ್ಟಿದ್ದೆವು. ಈ ವೇಳೆ ಶೌಚಾಲಯ, ತರಗತಿ ಕೋಣೆಗಳನ್ನು ಪರಿಶೀಲಿಸಿದ್ದೆವು. ಅಲ್ಲದೇ ಮೂಲಸೌಕರ್ಯಗಳ ಕೊರತೆ ಬಗ್ಗೆ ಪಿಯು ಬೋರ್ಡ್‌ ನಿರ್ದೇಶಕರಿಗೆ ದೂರು ನೀಡಿದ್ದೇವೆ. ಈಗ ನಡೆಯುತ್ತಿರುವ ಪೂರಕ ಪರೀಕ್ಷೆ ಮುಗಿದ ತಕ್ಷಣ ಜಿಲ್ಲೆಯ ಒಟ್ಟು 57 ಖಾಸಗಿ ಕಾಲೇಜುಗಳಿಗೆ ಭೇಟಿ ನೀಡಿ ಪರಿಶೀಲಿಸಲಾಗುತ್ತದೆ. ಮೂಲ ಸೌಕರ್ಯಗಳ ಕೊರತೆ ಕಂಡುಬಂದರೆ ಸೂಕ್ತ ಕ್ರಮ ಕೈಗೊಳ್ಳಲಾಗುತ್ತದೆ.
•ಶಿವಶರಣಪ್ಪ ಮೂಳೆಗಾಂವ,
ಉಪ ನಿರ್ದೇಶಕರು, ಪಿಯು ಬೋರ್ಡ್‌, ಕಲಬುರಗಿ