ಉತ್ತರ ಕರ್ನಾಟಕದ ಮಂದಿ ಸೇರಿ ಸಿನಿಮಾ ಮಾಡುತ್ತಿರುವುದು ಹೊಸ ಬೆಳವಣಿಗೆಯೇನಲ್ಲ. ಆದರೆ, ಬಹುತೇಕ ಉತ್ತರ ಕರ್ನಾಟಕದ ಮಾಧ್ಯಮ ಮಿತ್ರರು ಸೇರಿ ಒಂದು ಸಿನಿಮಾ ಮಾಡಿ, ಈಗ ತೆರೆಗೆ ತರುತ್ತಿರುವುದು ಹೊಸ ವಿಷಯ. ಹೌದು, “ಜಯಸೂರ್ಯ’ ಸಿನಿಮಾ ಮೂಲಕ ಸಂತೋಷ್‌ ಶ್ರೀರಾಮುಡು ನಾಯಕ, ನಿರ್ದೇಶಕರಾಗುತ್ತಿದ್ದಾರೆ. ಬೆಳಗಾವಿಯಲ್ಲಿ ವಾಹಿನಿಯೊಂದರ ಪತ್ರಕರ್ತರಾಗಿರುವ ಸಂತೋಷ್‌ಗೆ ಇದು ಮೊದಲ ಚಿತ್ರ.
ಕಥೆ, ಚಿತ್ರಕಥೆ, ಸಂಭಾಷಣೆ, ಸಾಹಿತ್ಯವನ್ನು ಇವರೇ ಬರೆದಿದ್ದಾರೆ. ಅಷ್ಟೇ ಅಲ್ಲ, ಅವರೇ ಈ ಚಿತ್ರದ ನಿರ್ಮಾಪಕರು. ಚಿಕ್ಕಂದಿನಿಂದಲೂ ಅವರಿಗೆ ಸಿನಿಮಾ ಮೇಲೆ ಆಸಕ್ತಿ ಇದ್ದುದರಿಂದ, ಈಗ ಚಿತ್ರ ಮಾಡೋಕೆ ಸಾಧ್ಯವಾಗಿದೆ. ಅವರ ತಾಯಿ, ಸಹೋದರ ಅವರ ಸಹಕಾರ ಈ ಚಿತ್ರ ರೂಪುಗೊಳ್ಳಲು ಸಾಧ್ಯವಾಗಿದೆ. ಈಗ ಸಿನಿಮಾ ಮುಗಿದಿದ್ದು, ನವೆಂಬರ್‌ನಲ್ಲಿ ತೆರೆಗೆ ಬರಲು ಸಜ್ಜಾಗಿದೆ.
ಇದೊಂದು ಯೋಧನೊಬ್ಬನ ಕುರಿತಾದ ಚಿತ್ರ. ನಾಯಕನ ಹೆಸರು ಇಲ್ಲಿ ಸೂರ್ಯ. ಎಲ್ಲವನ್ನೂ ಜಯಿಸುವುದರಿಂದಲೇ ಅವನನ್ನು “ಜಯಸೂರ್ಯ’ ಅಂತ ಕರೆಯುತ್ತಾರೆ. ಇನ್ನೊಂದು ವಿಶೇಷವೆಂದರೆ, ಇಲ್ಲಿ ಜಾತಿಗಿಂತ ಪ್ರೀತಿ ದೊಡ್ಡದು, ಪ್ರೀತಿಗಿಂತ ದೇಶ ದೊಡ್ಡದು ಎಂಬ ಸಂದೇಶವಿದೆ. ಇಲ್ಲಿ ಮನಮಿಡಿಯುವ ಸನ್ನಿವೇಶಗಳಿವೆ. ಬಹುತೇಕ ಇಲ್ಲಿ ಉತ್ತರ ಕರ್ನಾಟಕ ಭಾಷೆಯೇ ಇದೆ.
ಸುಮಾರು 40 ದಿನಗಳ ಕಾಲ ಬೆಳಗಾವಿ, ಗೋಕಾಕ್‌, ಎಂ.ಮಲ್ಲಾಪುರ, ದಾಸನಹಟ್ಟಿ, ಗೋಕಾಕ್‌ ಫಾಲ್ಸ್‌ ಸೇರಿದಂತೆ ಹಲವು ಸ್ಥಳಗಳಲ್ಲಿ ಚಿತ್ರೀಕರಿಸಲಾಗಿದೆ’ ಎಂದು ಮಾಹಿತಿ ಕೊಡುತ್ತಾರೆ ನಿರ್ದೇಶಕ ಕಮ್‌ ಹೀರೋ ಸಂತೋಷ್‌ ಶ್ರೀರಾಮುಡು. ಈ ಚಿತ್ರದಲ್ಲಿ ಪತ್ರಕರ್ತರಾದ ಬಯಿಬುವಾ ಕಾಂಬ್ಳೆ, ಚಂದ್ರು, ಶವಾನಂದ್‌, ಜಿತೇಂದ್ರ, ಶಂಕರ್‌ ಸೇರಿದಂತೆ ಸ್ಥಳೀಯ ಕಲಾವಿದರು ನಟಿಸಿದ್ದಾರೆ.
ಇನ್ನು, ಬೆಳಗಾವಿಯ ಅಂಜಲಿ ಈ ಚಿತ್ರದ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಚಿತ್ರಕ್ಕೆ ಸಿದ್ದು ಹಾಗು ಡಾ.ವೆಂಕಟೇಶ್‌ ಅವರು ಕ್ಯಾಮೆರಾ ಹಿಡಿದರೆ, ಮುನ್ನ ಚಿತ್ರದುರ್ಗ ಅವರು ಸಂಗೀತ ನೀಡಿದ್ದಾರೆ. ಇಲಿ ಆರು ಹಾಡುಗಳಿದ್ದು, ಜಿತೇಂದ್ರ ಹಾಗು ರಾಮ್‌ದಾಸ್‌ ಎಂಬುವರು ಎರಡು ಹಾಡು ಬರೆದರೆ, ನಿರ್ದೇಶಕ ಸಂತೋಷ್‌ ಶ್ರೀರಾಮುಡು ಅವರು ಉಳಿದ ನಾಲ್ಕು ಹಾಡುಗಳನ್ನು ಬರೆದಿದ್ದಾರೆ.
