ಜಪಾನ್‌ ಮಹಿಳೆಯೊಂದಿಗೆ ಅನುಚಿತ ವರ್ತನೆ: ಇಬ್ಬರ ಸೆರೆ

ಬೆಂಗಳೂರು: ವಿನಾಕಾರಣ ಜಗಳ ತೆಗೆದು ಜಪಾನ್‌ ಮೂಲದ  ಮಹಿಳೆಯ ಜೊತೆ ಅಸಭ್ಯವಾಗಿ  ವರ್ತಿಸಿದ್ದ ಇಬ್ಬರು ಆರೋಪಿಗಳು ಪೊಲೀಸರ ಬಲೆಗೆ ಬಿದ್ದಿದ್ದಾರೆ. ನಂದಿನಿ ಲೇಔಟ್‌ ನಿವಾಸಿಗಳಾದ ರಾಜು ಹಾಗೂ ನರಸಿಂಹ ಬಂಧಿತರು.

ಆರೋಪಿಗಳಿಬ್ಬರು ಗುರುವಾರ ಸಂಜೆ ಎಲೆಕ್ಟ್ರಾನಿಕ್‌ ಸಿಟಿ ಸಮೀಪದ ನೈಸ್‌ ರಸ್ತೆಯ ಟೋಲ್‌ಗೇಟ್‌ ಬಳಿ ಕಾರಿನಲ್ಲಿ ಹೋಗುತ್ತಿದ್ದಾಗ, ಅದೇ ಮಾರ್ಗದಲ್ಲಿ ಜಪಾನ್‌ ಮೂಲದ ಮಹಿಳೆಯೂ ಕಾರಿನಲ್ಲಿ ಬರುತ್ತಿದ್ದರು. ಆರೋಪಿಗಳು ಏಕಾಏಕಿ ಮಹಿಳೆಯ ಕಾರನ್ನು ಅಡ್ಡಗಟ್ಟಿ, ಓವರ್‌ ಟೇಕ್‌ ಮಾಡುತ್ತೀಯಾ ಎಂದು ತರಾಟೆಗೆ ತೆಗೆದುಕೊಳ್ಳುವ ನೆಪದಲ್ಲಿ ಅಸಭ್ಯವಾಗಿ ವರ್ತಿಸಿದ್ದಾರೆ.

ಈ ಘಟನೆ ನೋಡಿದ ಇತರೆ ವಾಹನ ಸವಾರರು ಕಂಟ್ರೋಲ್‌ ರೂಂ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ. ಇನ್ನು ಕೆಲ ಹೊತ್ತಿನ ಜಗಳದ ಬಳಿಕ ಮಹಿಳೆ ಹೊರಟು ಹೋಗಿದ್ದಾರೆ. ಆರೋಪಿಗಳಿದ್ದ ಕಾರು ನಂದಿನಿಲೇಔಟ್‌ ಕಡೆ ಹೋಗುತ್ತಿರುವುದಾಗಿ ದೊರೆತ ಮಾಹಿತಿ ಮೇರೆಗೆ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ.