ತವರಲ್ಲಿ100 ಟೆಸ್ಟ್‌; ಆ್ಯಂಡರ್ಸನ್‌ ದಾಖಲೆ

ಮ್ಯಾಂಚೆಸ್ಟರ್‌: ಇಂಗ್ಲೆಂಡ್‌ನ‌ ವೇಗಿ ಜೇಮ್ಸ್‌ ಆ್ಯಂಡರ್ಸನ್‌ ಟೆಸ್ಟ್‌ ಇತಿಹಾಸದಲ್ಲಿ ವಿಶಿಷ್ಟ ದಾಖಲೆಯೊಂದನ್ನು ಬರೆದಿದ್ದಾರೆ. 2,475 ಪಂದ್ಯಗಳ ಇತಿಹಾಸದಲ್ಲಿ ತವರಲ್ಲಿ 100 ಟೆಸ್ಟ್‌ ಪಂದ್ಯವಾಡಿದ ವಿಶ್ವದ ಮೊದಲ ಕ್ರಿಕೆಟಿಗನಾಗಿ ಮೂಡಿಬಂದರು.

ಗುರುವಾರ ಮ್ಯಾಂಚೆಸ್ಟರ್‌ನಲ್ಲಿ ಮೊದಲ್ಗೊಂಡ ದಕ್ಷಿಣ ಆಫ್ರಿಕಾ ಎದುರಿನ ದ್ವಿತೀಯ ಟೆಸ್ಟ್‌ ಪಂದ್ಯದಲ್ಲಿ ಆ್ಯಂಡರ್ಸನ್‌ ಈ ಮೈಲುಗಲ್ಲು ನೆಟ್ಟರು. ಇದು ಅವರ 174ನೇ ಟೆಸ್ಟ್‌ ಪಂದ್ಯ.

ತವರಲ್ಲಿ ಅತ್ಯಧಿಕ ಟೆಸ್ಟ್‌ ಆಡಿದ ದಾಖಲೆ ಸಚಿನ್‌ ತೆಂಡುಲ್ಕರ್‌ ಹೆಸರಲ್ಲಿತ್ತು. ಒಟ್ಟು 200 ಟೆಸ್ಟ್‌ಗಳಲ್ಲಿ 94 ಪಂದ್ಯಗಳನ್ನು ಅವರು ಭಾರತದಲ್ಲಿ ಆಡಿದ್ದರು.

ಸ್ವದೇಶದಲ್ಲಿ ಅತ್ಯಧಿಕ ಟೆಸ್ಟ್‌ ಆಡಿರುವ ಇತರ ಕ್ರಿಕೆಟಿಗರೆಂದರೆ ರಿಕಿ ಪಾಂಟಿಂಗ್‌ (92), ಸ್ಟುವರ್ಟ್‌ ಬ್ರಾಡ್‌ (91) ಮತ್ತು ಅಲಸ್ಟೇರ್‌ ಕುಕ್‌ (89).

ದಕ್ಷಿಣ ಆಫ್ರಿಕಾ 151:

ಇಂಗ್ಲೆಂಡ್‌ ದಾಳಿಗೆ ಸಿಲುಕಿದ ದಕ್ಷಿಣ ಆಫ್ರಿಕಾ, ಟೆಸ್ಟ್‌ ಪಂದ್ಯದ ಮೊದಲ ದಿನವೇ 151 ರನ್ನುಗಳಿಗೆ ಸರ್ವಪತನ ಕಂಡಿದೆ. 36 ರನ್‌ ಮಾಡಿದ ರಬಾಡ ಅವರದೇ ಗರಿಷ್ಠ ಗಳಿಕೆ. ಇಂಗ್ಲೆಂಡ್‌ ಪರ ಆ್ಯಂಡರ್ಸನ್‌, ಬ್ರಾಡ್‌ ತಲಾ 3 ವಿಕೆಟ್‌; ಸ್ಟೋಕ್ಸ್‌ 2 ವಿಕೆಟ್‌ ಉರುಳಿಸಿದರು.