ಆನ್‌ಲೈನ್‌ ತರಗತಿ ಕೈಬಿಡಿ: ಮಂಜುನಾಥ್‌

ಜಗಳೂರು: ಆನ್‌ಲೈನ್‌ ತರಗತಿ ನಡೆಸುವುದಾದರೆ ಎಲ್ಲ ವರ್ಗದ ವಿದ್ಯಾರ್ಥಿಗಳಿಗೂ ಸರ್ಕಾರ ಆರೋಗ್ಯ ಸೇವೆ ಮತ್ತು ಲ್ಯಾಪ್‌ಟಾಪ್‌ ವಿತರಿಸಬೇಕು ಎಂದು ಒತ್ತಾಯಿಸಿ ಎಐಎಸ್‌ಎಫ್‌ ತಾಲೂಕು ಘಟಕದ ವತಿಯಿಂದ ಪ್ರತಿಭಟನೆ ನಡೆಸಿ ತಹಶೀಲ್ದಾರರಿಗೆ ಮನವಿ ಸಲ್ಲಿಸಲಾಯಿತು.

ಈ ವೇಳೆ ಮಾತನಾಡಿದ ಎಐಎಸ್‌ಎಫ್‌ ರಾಜ್ಯ ಸಹಕಾರ್ಯದರ್ಶಿ ಮಾದಿಹಳ್ಳಿ ಮಂಜುನಾಥ್‌, ರಾಜ್ಯದಲ್ಲಿ ಕೋವಿಡ್‌ -19ನಿಂದ ಶಾಲಾ- ಕಾಲೇಜುಗಳಿಗೆ ದಿಢೀರ್‌ ರಜೆ ಘೋಷಣೆ ಮಾಡಲಾಗಿದೆ. ಇದರಿಂದ ವಿದ್ಯಾರ್ಥಿಗಳ ಶೈಕ್ಷಣಿಕ ಪ್ರಗತಿ ಕುಂಠಿತವಾಗಿದ್ದು, ಪರ್ಯಾಯವಾಗಿ ಖಾಸಗಿ ಸಂಸ್ಥೆಗಳು ಆನ್‌ಲೈನ್ ತರಗತಿಗಳನ್ನು ಝೂಮ್‌ ಆ್ಯಪ್‌ ಮೂಲಕ ನಡೆಸುತ್ತಿವೆ. ಗ್ರಾಮಿಣ ಭಾಗದ ಬಡವರಿಗೆ ಲ್ಯಾಪ್‌ಟಾಪ್‌, ಮೊಬೈಲ್‌ ಇಲ್ಲದ್ದರಿಂದ ತೊಂದರೆ ಎದುರಿಸುವಂತಾಗಿದೆ. ಖಾಸಗಿ ಸಂಸ್ಥೆಗಳು ಹಣ ವಸೂಲಿಗೆ ಇಳಿದಿವೆ. ಆದ್ದರಿಂದ ಕೂಡಲೇ ಆನ್‌ಲೈನ್‌ ತರಗತಿ ಕೈಬಿಡಬೇಕೆಂದು ಒತ್ತಾಯಿಸಿದರು.

ಎಐಎಸ್‌ಎಫ್‌ ತಾಲೂಕು ಅಧ್ಯಕ್ಷ ಯುವರಾಜ್‌ ಎಚ್‌.ಎಂ. ಹೊಳೆ, ಮುಖಂಡರಾದ ಮಂಜುನಾಥ್‌ ದೊಡ್ಡಬೊಮ್ಮನಹಳ್ಳಿ, ಬೋರೇಶ್‌, ರಘು ಧಮಾನಿ, ಪರಶುರಾಮ್‌, ಕರಿಬಸಪ್ಪ ರಾಜಪ್ಪ, ಗುಡದೇಶ್‌ ಇದ್ದರು.