ಬಾಹುಬಲಿ-2 ಬಿಡುಗಡೆಗೆ ತಡೆ ಸರಿಯಲ್ಲ: ರಾಜಮೌಳಿ

ಬೆಂಗಳೂರು: ಎ.28ಕ್ಕೆ “ಬಾಹುಬಲಿ-2′ ಸಿನೆಮಾ ತೆರೆ ಕಾಣಲಿದೆ. “ಕಟ್ಟಪ್ಪ’ ಪಾತ್ರಧಾರಿ ನಟ ಸತ್ಯರಾಜ್‌ ಕ್ಷಮೆ ಕೋರಬೇಕು. ಇಲ್ಲದಿದ್ದರೆ ಸಿನೆಮಾ ಬಿಡುಗಡೆಗೆ ಅವಕಾಶ ಕೊಡುವುದಿಲ್ಲ ಎಂದು ಕನ್ನಡ ಸಂಘಟನೆಗಳು ಹೇಳಿರುವುದು ಸರಿಯಲ್ಲ ಎಂದಿದ್ದಾರೆ ನಿರ್ದೇಶಕ ರಾಜಮೌಳಿ. ಸತ್ಯರಾಜ್‌ 9 ವರ್ಷಗಳ ಹಿಂದೆ ಆಕ್ಷೇಪಾರ್ಹ  ಮಾತುಗಳನ್ನಾಡಿದ್ದರೆಂದು ಕನ್ನಡ ಸಂಘಟನೆಗಳ ಆಕ್ಷೇಪವಾಗಿದೆ. 

ಸತ್ಯರಾಜ್‌ ಜತೆಗೆ 5 ವರ್ಷಗಳಿಂದ ಕೆಲಸ ಮಾಡಿದ್ದೇನೆ. ಅವರು ಮತ್ತೂಬ್ಬರ ಭಾವನೆಗಳಿಗೆ ಧಕ್ಕೆಯಾಗುವಂತೆ ಮಾತನಾಡುತ್ತಾರೆಂದರೆ ನಂಬಲು ಸಾಧ್ಯವಿಲ್ಲ ಎಂದಿದ್ದಾರೆ ರಾಜಮೌಳಿ. 9 ವರ್ಷಗಳ ಹಿಂದಿನ ಮಾತುಗಳ ಬಳಿಕ ಅವರ 30 ಸಿನೆಮಾಗಳು ಕರ್ನಾಟಕದಲ್ಲಿ ಬಿಡುಗಡೆಯಾಗಿವೆ. ಬಾಹುಬಲಿ 1 ಬಿಡುಗಡೆಯಾದ ಸಂದರ್ಭದಲ್ಲಿಯೂ ಆಕ್ಷೇಪಾರ್ಹ ಮಾತುಗಳ ಬಗ್ಗೆ ಯಾರೂ ಪ್ರಶ್ನಿಸಲಿಲ್ಲ. ಈಗ ಏಕಾಏಕಿ ಹಳೆಯ ವಿವಾದ ಯಾವ ಕಾರಣಕ್ಕಾಗಿ ಪ್ರಸ್ತಾವವಾಗುತ್ತಿದೆ ಎಂದು ಪ್ರಶ್ನಿಸಿದ್ದಾರೆ ರಾಜಮೌಳಿ. ಜತೆಗೆ ವಿವಾದಕ್ಕೂ ನಮಗೂ ಏನೂ ಸಂಬಂಧವಿಲ್ಲ ಎಂದಿದ್ದಾರೆ.