Italian Open ಟೆನಿಸ್‌: ಮೂರನೇ ಪ್ರಶಸ್ತಿ ಗೆದ್ದ ಇಗಾ ಸ್ವಿಯಾಟೆಕ್‌

ರೋಮ್‌: ಪೋಲೆಂಡ್‌ನ‌ ಇಗಾ ಸ್ವಿಯಾಟೆಕ್‌ 3ನೇ ಬಾರಿಗೆ ಇಟಾಲಿಯನ್‌ ಓಪನ್‌ ಟೆನಿಸ್‌ ಪ್ರಶಸ್ತಿ ಜಯಿಸಿದ್ದಾರೆ. ಫೈನಲ್‌ನಲ್ಲಿ ಅವರು ಅರಿನಾ ಸಬಲೆಂಕಾ ವಿರುದ್ಧ 6-2, 6-3 ಅಂತರದ ಗೆಲುವು ಸಾಧಿಸಿದರು.

ಇದು ವಿಶ್ವದ ನಂ.1 ಮತ್ತು ನಂ.2 ಆಟಗಾರ್ತಿಯರ ನಡುವಿನ ಕದನವಾಗಿತ್ತು. ಒಂದೂವರೆ ಗಂಟೆಯ ಕಾಲ ಇವರ ಸ್ಪರ್ಧೆ ಸಾಗಿತು. 2021 ಮತ್ತು 2022ರಲ್ಲೂ ಸ್ವಿಯಾಟೆಕ್‌ ರೋಮ್‌ನಲ್ಲಿ ಚಾಂಪಿಯನ್‌ ಆಗಿದ್ದರು. ಅರ್ಥಾತ್‌, 4 ವರ್ಷಗಳಲ್ಲಿ 3 ಸಲ ಪ್ರಶಸ್ತಿ ಗೆದ್ದ ಹಿರಿಮೆ ಪೋಲೆಂಡ್‌ ಆಟಗಾರ್ತಿಯದ್ದಾಯಿತು. ಇದು ಸಬಲೆಂಕಾ ವಿರುದ್ಧ ಆಡಿದ 11 ಪಂದ್ಯಗಳಲ್ಲಿ ಸ್ವಿಯಾಟೆಕ್‌ ಸಾಧಿಸಿದ 8ನೇ ಗೆಲುವು.

22 ವರ್ಷದ ಸ್ವಿಯಾಟೆಕ್‌ಗೆ ಒಲಿದ 21ನೇ ಟೆನಿಸ್‌ ಪ್ರಶಸ್ತಿ ಇದಾಗಿದೆ. ಅವರೀಗ ಫ್ರೆಂಚ್‌ ಓಪನ್‌ ಪಂದ್ಯಾವಳಿಗೆ ಹೊಸ ಸ್ಫೂರ್ತಿ ಪಡೆದಿದ್ದಾರೆ.