ಮುಂದಿನ ವರ್ಷವೂ ಒಲಿಂಪಿಕ್ಸ್‌ ಅನುಮಾನ?

ಟೋಕಿಯೊ: ಕೋವಿಡ್-19 ಮಹಾಮಾರಿಯ ಹಾವಳಿಯಿಂದ ಒಂದು ವರ್ಷಕ್ಕೆ ಮುಂದೂಡಲ್ಪಟ್ಟಿರುವ ಒಲಿಂಪಿಕ್ಸ್‌ಗೆ ಇದೀಗ ಆಯೋಜಕರು ಸಿದ್ಧಗೊಳ್ಳುತ್ತಿದ್ದರೆ ಇತ್ತ ಜಪಾನಿನ ವೈರಾಣು ತಜ್ಞ ಕೆಂಟಾರೊ ಇವಾಟ ಮುಂದಿನ ವರ್ಷವೂ ಕೋವಿಡ್-19 ವೈರಸ್‌ ಒಲಿಂಪಿಕ್ಸ್‌ ಕೂಟವನ್ನು ಕಾಡಲಿದೆ ಎಂದು ಎಚ್ಚರಿಸಿದ್ದಾರೆ.

ಒಲಿಂಪಿಕ್ಸ್‌ ಕೂಟಕ್ಕೆ ಬೇರೆ ಬೇರೆ ದೇಶಗಳಿಂದ ಕ್ರೀಡಾಪಟುಗಳು ಬರುತ್ತಾರೆ. ಲಕ್ಷಾಂತರ ಪ್ರೇಕ್ಷಕರು ಸೇರುತ್ತಾರೆ. ಹೀಗಾಗಿ ಕೂಟ ಆರಂಭವಾಗುವ ಮೊದಲು ಆತಿಥ್ಯ ವಹಿಸುವ ರಾಷ್ಟ್ರದಲ್ಲಿ ವೈರಸ್‌ ನಿಯಂತ್ರಣಕ್ಕೆ ಬರಬೇಕಾಗಿದೆ ಇಲ್ಲವಾದಲ್ಲಿ ಪರಿಸ್ಥಿತಿ ಕೈಮೀರಿ ಹೋಗಲಿದೆ ಎಂದು ಕೋಬೆ ವಿಶ್ವವಿದ್ಯಾಲಯದ ಸೋಂಕು ರೋಗಗಳ ವಿಭಾಗದ ಪ್ರಾಧ್ಯಾಪಕರೂ ಆಗಿರುವ ಕೆಂಟಾರೊ ಮಾಧ್ಯಮ ಪ್ರಕಟನೆಯಲ್ಲಿ ಹೇಳಿದ್ದಾರೆ.

ಮುಂದಿನ ಬೇಸಿಗೆಯ ಒಳಗೆ ಜಪಾನ್‌ನಲ್ಲಿ ರೋಗ ನಿಯಂತ್ರಣಕ್ಕೆ ಬರುತ್ತದೆ ಎಂದುಕೊಳ್ಳೋಣ. ಆದರೆ ಬೇರೆ ದೇಶಗಳಲ್ಲಿ ಅದು ಸಾಧ್ಯವೇ ಎಂಬುದು ಪ್ರಶ್ನೆಯಾಗಿಯೇ ಉಳಿಯಲಿದೆ. ಎಲ್ಲ ಕಡೆಯೂ ವೈರಾಣು ನಿಯಂತ್ರಣಕ್ಕೆ ಬಾರದೆ ಕೂಟ ಆಯೋಜಿಸುವುದರಿಂದ ಅಪಾಯದ ಸಾಧ್ಯತೆ ಹೆಚ್ಚು ಎಂದು ಅವರು ಹೇಳಿದ್ದಾರೆ.

ಸಂಘಟನಾ ಅಧಿಕಾರಿಗೆ ಕೋವಿಡ್-19 ಸೋಂಕು
ಟೋಕಿಯೊ ಒಲಿಂಪಿಕ್‌ ಸಂಘಟನ ಸಮಿತಿಯ ಅಧಿಕಾರಿಯೊಬ್ಬರಿಗೆ ಕೋವಿಡ್‌-19 ಸೋಂಕು ದೃಢಪಟ್ಟಿದೆ ಎಂದು ಕಾರ್ಯಕಾರಿ ಸಮಿತಿ ಬುಧವಾರ ಖಚಿತ ಪಡಿಸಿದೆ.30 ವರ್ಷದ ಪುರುಷ ಅಧಿಕಾರಿಯೊಬ್ಬರಿಗೆ ಸೋಂಕು ಇರುವುದು ಖಚಿತವಾಗಿದೆ. ಮುಖ್ಯ ಕಚೇರಿಯ ಭಾಗವಾದ ಟೋಕಿಯೊದ ಹರೂಮಿ ಎನ್ನುವ ಸ್ಥಳದಲ್ಲಿ ಈ ಅಧಿಕಾರಿ ಕಾರ್ಯ ನಿರ್ವಹಿಸುತ್ತಿದ್ದರು ಎಂದು ತಿಳಿದು ಬಂದಿದೆ.