ಗುರ್ಮಿತ್‌ ದತ್ತು ಪುತ್ರಿ ಹನಿಪ್ರೀತ್‌ ಇನ್ಸಾನ್‌ ನೇಪಾಲದಲ್ಲಿ ?

ಹೊಸದಿಲ್ಲಿ : ವಿವಾದಿತ ಡೇರಾ ಸಚ್ಚಾ ಸೌಧಾ ಮುಖ್ಯಸ್ಥ ಗುರ್ಮಿತ್‌ ರಾಮ ರಹೀಮ್‌ ಸಿಂಗ್‌ಗೆ  ಅತ್ಯಾಚಾರ ಅಪರಾಧಕ್ಕಾಗಿ 20 ವರ್ಷಗಳ ಜೈಲು ಶಿಕ್ಷೆಯ ತೀರ್ಪಾದ ದಿನದಿಂದ ಇವತ್ತಿನ ವರೆಗೂ ತಲೆಮರೆಸಿಕೊಂಡಿರುವ ಆತನ ದತ್ತು ಪುತ್ರಿ ಹನಿಪ್ರೀತ್‌ ಇನ್ಸಾನ್‌ ನೆರೆಯ ನೇಪಾಲ ದೇಶದಲ್ಲಿ  ಕಂಡು ಬಂದಿರುವುದಾಗಿ ವರದಿಗಳು ತಿಳಿಸಿವೆ.

ಗುರ್ಮಿತ್‌ಗೆ ಜೈಲು ಶಿಕ್ಷೆಯ ತೀರ್ಪಾದ ದಿನ ಆತನನ್ನು ಕೋರ್ಟ್‌ ರೂಮಿನಿಂದಲೇ ಅಪಹರಿಸಿ ಒಯ್ಯುವ ಸಂಚು ರೂಪಿಸಿದ್ದ ಹನಿಪ್ರೀತ್‌ ಇನ್ಸಾನ್‌ ವಿರುದ್ಧ ಪೊಲೀಸರು ಅಪಹರಣ ಯತ್ನದ ಕೇಸನ್ನು ಮಾತ್ರವಲ್ಲದೆ, ಪಂಚಕುಲದಲ್ಲಿ  ಆ.28ರಂದು ಹಿಂಸೆಯನ್ನು ಭಡಕಾಯಿಸಿದ ಕೇಸನ್ನು ಕೂಡ ಹಾಕಿದ್ದಾರೆ. 

ನೇಪಾಲದ ಪೋಖರಾ ಎಂಬಲ್ಲಿ ಹನಿಪ್ರೀತ್‌ ಇತರ ಮೂವರೊಂದಿಗೆ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದುದು ಪತ್ತೆಯಾಗಿದೆ ಎಂದು ಮಾಧ್ಯಮ ವರದಿಗಳು ಹೇಳಿವೆ. 

ಈ ನಡುವೆ ಹರಿಯಾಣ ಮತ್ತು ನೇಪಾಲ ಪೊಲೀಸರು, ಗುರ್ಮಿತ್‌ಗೆ ಕಳೆದ ಆ.28ರಂದು ಜೈಲು ಶಿಕ್ಷೆಯ ತೀರ್ಪಾದ ದಿನದಿಂದ ಭೂಗತಳಾಗಿರುವ ಆತನ ದತ್ತು ಪುತ್ರಿ ಹನಿಪ್ರೀತ್‌ ಗಾಗಿ ವ್ಯಾಪಕ ಶೋಧ ಕಾರ್ಯ ನಡೆಸುತ್ತಿದ್ದಾರೆ.