ವಾತಾವರಣ ತಿಳಿಯಾದರಷ್ಟೇ ಐಪಿಎಲ್‌ ಪಂದ್ಯಾವಳಿ: ರಿಜಿಜು

ಹೊಸದಿಲ್ಲಿ: ಕೋವಿಡ್ 19 ವಿಶ್ವವ್ಯಾಪಿ ತಾಂಡವವಾಡುತ್ತಿರುವ ಈ ಹೊತ್ತಿನಲ್ಲಿ ಭಾರತದ ಅತ್ಯಂತ ಜನಪ್ರಿಯ ಕ್ರಿಕೆಟ್‌ ಲೀಗ್‌ ಆಗಿರುವ ಐಪಿಎಲ್‌ ಟಿ20 ಕೂಟ ಮುಂದೂಡಲ್ಪಟ್ಟಿದೆ. ಎ. 15ರ ಅನಂತರ ಈ ಕೂಟವನ್ನು ನಡೆಸಲು 5 ದಿನಾಂಕಗಳನ್ನು ಬಿಸಿಸಿಐ ಸೂಚಿಸಿದ್ದು ತುಸು ಹಳೆಯ ಸುದ್ದಿ. ಇದನ್ನು ಜುಲೈ-ಸೆಪ್ಟಂಬರ್‌ನಲ್ಲಿ ನಡೆಸಲು “ಬಿ ಪ್ಲ್ರಾನ್‌’ ಸಿದ್ಧಗೊಂಡಿದೆ ಎಂಬುದು ಒಂದು ದಿನದ ಹಿಂದಿನ ಸುದ್ದಿಯಾಗಿತ್ತು. ಆದರೆ ಗುರುವಾರ ಈ ಕುರಿತು ಹೇಳಿಕೆ ನೀಡಿರುವ ಕೇಂದ್ರ ಕ್ರೀಡಾ ಸಚಿವ ಕಿರಣ್‌ ರಿಜಿಜು, ಕೊರೊನಾ ಭೀತಿ ದೂರವಾಗಿ ವಾತಾವರಣ ತಿಳಿಯಾದರಷ್ಟೇ ಐಪಿಎಲ್‌ಗೆ ಅನುಮತಿ ನೀಡಲಾಗುವುದು ಎಂದಿದ್ದಾರೆ.