IPL: ಪ್ರಮುಖ ಆಲ್‌ರೌಂಡರ್‌ ಈ ಬಾರಿ ಆಡುವುದಿಲ್ಲ ಎಂದ ಚೆನ್ನೈ ಸೂಪರ್‌ ಕಿಂಗ್ಸ್

ಚೆನ್ನೈ: ಕೆಲಸದ ಒತ್ತಡದಿಂದಾಗಿ ಇಂಗ್ಲೆಂಡಿನ ಪ್ರಮುಖ ಆಲ್‌ರೌಂಡರ್‌ ಬೆನ್‌ ಸ್ಟೋಕ್ಸ್‌ ಅವರು ಈ ಬಾರಿಯ ಐಪಿಎಲ್‌ನಲ್ಲಿ ಆಡುವುದಿಲ್ಲ ಎಂದು ಚೆನ್ನೈ ಸೂಪರ್‌ ಕಿಂಗ್ಸ್‌ ಪ್ರಕಟನೆಯಲ್ಲಿ ತಿಳಿಸಿದೆ.

2023ರ ಐಪಿಎಲ್‌ಗಿಂತ ಮೊದಲೇ ಸ್ಟೋಕ್ಸ್‌ ಚೆನ್ನೈ ತಂಡವನ್ನು ಸೇರಿಕೊಂಡಿದ್ದರು. ಆದರೆ ಎರಡು ತಿಂಗಳ ಸುದೀರ್ಘ‌ ಆಟದ ಅವಧಿಯ ವೇಳೆ ಮೊಣಕಾಲಿನ ಗಾಯದ ಸಮಸ್ಯೆಯಲ್ಲಿ ಸಿಲುಕಿದ್ದ ಅವರು ಕೇವಲ ಎರಡು ಪಂದ್ಯಗಳನ್ನಾಡಲು ಸಮರ್ಥರಾಗಿದ್ದರು.

ಇಂಗ್ಲೆಂಡ್‌ ಟೆಸ್ಟ್‌ ತಂಡದ ನಾಯಕ, ಆಲ್‌ರೌಂಡರ್‌ ಬೆನ್‌ ಸ್ಟೋಕ್ಸ್‌ ತನ್ನ ಕೆಲಸದ ಒತ್ತಡ ಮತ್ತು ಫಿಟ್‌ನೆಸ್‌ ಅನ್ನು ನಿರ್ವಹಿಸುವ ಸಲುವಾಗಿ ಐಪಿಎಲ್‌ಗೆ ಲಭ್ಯವಾಗುವುದಿಲ್ಲ ಎಂದು ತಿಳಿಸಿದ್ದಾರೆ ಎಂದು ಚೆನ್ನೈ ಫ್ರಾಂಚೈಸಿ ತಿಳಿಸಿದೆ. ಸ್ಟೋಕ್ಸ್‌ ಅವರ ಈ ನಿರ್ಧಾರಕ್ಕೆ ಚೆನ್ನೈ ಫ್ರಾಂಚೈಸಿ ಬೆಂಬಲ ಸೂಚಿಸಿದೆ. ಐಪಿಎಲ್‌ ಮೊದಲು ಇಂಗ್ಲೆಂಡ್‌ ತಂಡ ಭಾರತದಲ್ಲಿ ಐದು ಪಂದ್ಯಗಳ ಟೆಸ್ಟ್‌ ಸರಣಿ ಆಡಲಿದೆ ಮತ್ತು ಐಪಿಎಲ್‌ ಮುಗಿದ ಬಳಕಿ ಟಿ20 ವಿಶ್ವಕಪ್‌ನಲ್ಲಿ ತಂಡ ಪಾಲ್ಗೊಳ್ಳಬೇಕಿದೆ.