ಅನುಜ್‌ ರಾವತ್‌ ಭವಿಷ್ಯದ ಆಟಗಾರ: ಫಾ ಡು ಪ್ಲೆಸಿಸ್‌

ಮುಂಬೈ: ಆರಂಭಿಕ ಆಟಗಾರ ಅನುಜ್‌ ರಾವತ್‌ ಅವರ ಅಮೋಘ ಆಟದಿಂದಾಗಿ ಆರ್‌ಸಿಬಿ ತಂಡವು ಶನಿವಾರದ ಪಂದ್ಯದಲ್ಲಿ ಮುಂಬೈ ವಿರುದ್ಧ ಭರ್ಜರಿ ಜಯ ಸಾಧಿಸಿತ್ತು. ರಾವತ್‌ ಅವರ ಸಂಯೋಜಿತ ಇನ್ನಿಂಗ್ಸ್‌ ಎಲ್ಲರ ಗಮನ ಸೆಳೆದಿತ್ತು. ವೈಯಕ್ತಿಕವಾಗಿ 47 ಎಸೆತಗಳಿಂದ 66 ರನ್‌ ಗಳಿಸಿದ್ದ ಅವರು ವಿರಾಟ್‌ ಕೊಹ್ಲಿ ಜತೆ 80 ರನ್ನುಗಳ ಜತೆಯಾಟ ನಡೆಸಿದ್ದರು. ಅವರ ಈ ಸಾಧನೆಗೆ ನಾಯಕ ಫಾ ಡು ಪ್ಲೆಸಿಸ್‌ ಮೆಚ್ಚುಗೆನ ಮಾತುಗಳನ್ನಾಡಿದ್ದು ಭವಿಷ್ಯದಲ್ಲಿ ಅವರ ಆಟವನ್ನು ವೀಕ್ಷಿಸಬಹುದಾಗಿದೆ ಎಂದರು.

ಪಂದ್ಯ ಆರಂಭವಾಗುವ ಮೊದಲೇ ಪ್ಲೆಸಿಸ್‌ ಅವರು ಅನುಜ್‌ ಅವರ ಸಾಮರ್ಥ್ಯದ ಬಗ್ಗೆ ಅವರಿಗೆ ಮನದಟ್ಟು ಮಾಡಿದ್ದರು. ಚೆಂಡನ್ನು ಎದುರಿಸುವ ರೀತಿ ಅಮೋಘವಾಗಿದೆ. ಅವರೊಬ್ಬ ಭವಿಷ್ಯದ ಉತ್ತಮ ಆಟಗಾರರಲ್ಲಿ ಒಬ್ಬರಾಗಲಿದ್ದಾರೆ ಎಂದು ಪ್ಲೆಸಿಸ್‌ ತಿಳಿಸಿದ್ದಾರೆ.

ಈ ಇನ್ನಿಂಗ್ಸ್‌ ಬಳಿಕ ರಾವತ್‌ ಕೂಡ ಹರ್ಷ ವ್ಯಕ್ತಪಡಿಸಿದ್ದಾರೆ. ಮ್ಯಾಚ್‌ ವಿನ್ನಿಂಗ್ಸ್‌ ಇನ್ನಿಂಗ್ಸ್‌ ಆಡಿರುವುದು ಸಂತೋಷವಾಗಿದೆ. ನನಗೆ ಬೇಕಾದ ಆಟ ಆಡಲು ನನ್ನ ಶಕ್ತಿಮೀರಿ ಪ್ರಯತ್ನಿಸುವೆ ಎಂದವರು ಹೇಳಿದ್ದಾರೆ. ರಾವತ್‌ ಈ ಹಿಂದಿನ ಪಂದ್ಯಗಳಲ್ಲಿ ನೀರಸವಾಗಿ ಆಡಿದ್ದರು.