ನೋವು ಪರಿಹರಿಸುವ ವೈದ್ಯ ವೃತ್ತಿಯ ನೋವು ನಿಮಗೆ ಎಷ್ಟು ಗೊತ್ತು?

ರೋಗಿಗಳಿಗೆ ಕ್ಲಪ್ತ ಸಮಯದ ಊಟ, ನಿಯಮಿತವಾದ ನಿದ್ದೆ, ವಿಶ್ರಾಂತಿ, ವಿರಾಮದ ಬಗ್ಗೆ ಸದಾ ಸಲಹೆ ನೀಡುವ ವೈದ್ಯರು ಮಾತ್ರ ಹೊತ್ತುಗೊತ್ತಿಲ್ಲದ ಊಟ, ನಿದ್ದೆ, ಬಿಡುವಿಲ್ಲದ ದುಡಿಮೆ, ಮನೋರಂಜನೆಯಿಲ್ಲದ ಒತ್ತಡದ ಕೆಲಸ, ಕುಟುಂಬಕ್ಕೆ ಸಮಯ ಕೊಡಲಾಗದ ದುಃಸ್ಥಿತಿಗೆ ಅನಿವಾರ್ಯವಾಗಿ ಒಗ್ಗಿಕೊಳ್ಳ ಬೇಕಾಗುತ್ತದೆ. ನಿಜ ಹೇಳಬೇಕೆಂದರೆ ವೈದ್ಯರ ಬದುಕು ಆದಿಯಿಂದ ಅಂತ್ಯದವರೆಗೂ ಒತ್ತಡದಿಂದ ಕೂಡಿರುತ್ತದೆ.

ಸ್ವಾತಂತ್ರ್ಯ ಪೂರ್ವದಲ್ಲಿ 1882, ಜುಲೆ„ 1ರಂದು ಜನಿಸಿ ಸ್ವಾತಂತ್ರ್ಯ ಕ್ಕಾಗಿ ಹೋರಾಡಿ ಸ್ವಾತಂತ್ರೊéàತ್ತರ ಭಾರತದ ಏಳಿಗೆಗೆ ಶ್ರಮಿಸಿದ ಮಹಾಮಾನವತಾವಾದಿ , ಅಪ್ರತಿಮ ವೈದ್ಯ, ಪಶ್ಚಿಮ ಬಂಗಾಲದ ಮಾಜಿ ಮುಖ್ಯಮಂತ್ರಿ, ಭಾರತ ರತ್ನ ಡಾ|ಬಿಧಾನಚಂದ್ರ ರಾಯ್‌ (ಡಾ. ಬಿ.ಸಿ. ರಾಯ್‌)ರವರ ಜನುಮದಿನ ಇಂದು. ಅವರು ವೈದ್ಯ ಪರಿವಾರಕ್ಕೆ ಮಾದರಿಯಾಗುವ ಮೇರು ವ್ಯಕ್ತಿತ್ವವನ್ನು ಹೊಂದಿದ್ದರು. ಅವರ ನೆನಪಿಗಾಗಿ ಜು.1ನ್ನು ರಾಷ್ಟ್ರೀಯ ವೈದ್ಯರ ದಿನವೆಂದು ಆಚರಿಸಲಾಗುತ್ತಿದೆ. ವೈದ್ಯಕೀಯ ಲೋಕ ಹಾಗೂ ವೈದ್ಯರ ಸ್ಥಿತಿಗತಿಯ ಕುರಿತು ಅವಲೋಕನ ನಡೆಸುವುದು ಈ ಸಂದರ್ಭದಲ್ಲಿ ಪ್ರಸ್ತುತವಾಗಬಹುದು.

ರೋಗಿಗಳಿಗೆ ಕ್ಲಪ್ತ ಸಮಯದ ಊಟ, ನಿಯಮಿತವಾದ ನಿದ್ದೆ, ವಿಶ್ರಾಂತಿ, ವಿರಾಮದ ಬಗ್ಗೆ ಸದಾ ಸಲಹೆ ನೀಡುವ ವೈದ್ಯರು ಮಾತ್ರ ಹೊತ್ತುಗೊತ್ತಿಲ್ಲದ ಊಟ, ನಿದ್ದೆ, ಬಿಡುವಿಲ್ಲದ ದುಡಿಮೆ, ಮನೋರಂಜನೆಯಿಲ್ಲದ ಒತ್ತಡದ ಕೆಲಸ, ಕುಟುಂಬಕ್ಕೆ ಸಮಯ ಕೊಡಲಾಗದ ದುಃಸ್ಥಿತಿಗೆ ಅನಿವಾರ್ಯವಾಗಿ ಒಗ್ಗಿಕೊಳ್ಳ ಬೇಕಾಗುತ್ತದೆ. ಇವೆಲ್ಲದರ ಜೊತೆಗೆ ವೃತ್ತಿಯಲ್ಲಿ ಸ್ಥಿರತೆ ಕಂಡುಕೊಳ್ಳುವ ಒತ್ತಡ, ಗಳಿಸಿದ ಹೆಸರನ್ನು ಉಳಿಸಿ ಬೆಳೆಸಿಕೊಳ್ಳುವ ಒತ್ತಡ, ಅದೆಲ್ಲದರ ಜತೆಯಲ್ಲಿ ಇತ್ತೀಚಿನ ದಿನಗಳಲ್ಲಿ ರೋಗಿಗಳು ಮತ್ತು ಅವರ ಸಂಬಂಧಿ ಕರಿಂದ ಮಾನ, ಪ್ರಾಣ, ಆಸ್ತಿಪಾಸ್ತಿಗಳನ್ನು ಉಳಿಸಿಕೊಳ್ಳುವ ಒತ್ತಡ. ಮಡದಿ ಮಕ್ಕಳಿಗೆ ಸಮಯ ಕೊಡಲಾಗದೆ ಚಡಪಡಿಸುವ, ಅವಹೇಳನಕ್ಕೆ ಗುರಿಯಾಗುವ ಒತ್ತಡ, ಹೀಗೆ ವೈದ್ಯರ ಬದುಕು ಬಹುತೇಕ ಒತ್ತಡದಿಂದಲೇ ನಡೆಯುತ್ತಿರುತ್ತದೆ.

ಸ್ವಾತಂತ್ರಾéನಂತರ ಆಧುನಿಕ ವೈದ್ಯರ ಅರ್ಪಣಾ ಭಾವದ ಸೇವೆ, ವಿವಿಧ ವೈಜ್ಞಾನಿಕ ಆವಿಷ್ಕಾರಗಳು, ವೈದ್ಯಲೋಕದ ಕ್ಷಿಪ್ರಗತಿಯ ಬೆಳವಣಿಗೆಗಳಿಂದ ಜನಸಾಮಾನ್ಯರ ಜೀವಿತಾವ ಧಿಯು ಸರಾಸರಿ ಗಣನೀಯವಾಗಿ ಏರಿಕೆಯಾಗಿದೆ. ಇಂತಹ ವೈದ್ಯರ ಮೇಲೆ ಹಲ್ಲೆಗಳು ನಡೆಯುತ್ತಿರುವುದು ದುರದೃಷ್ಟಕರ ಸಂಗತಿ.

ಡಾ| ಬಿ.ಸಿ. ರಾಯ್‌ ಜನಿಸಿ, ಪ್ರಜ್ವಲಿಸಿದ ಪಶ್ಚಿಮ ಬಂಗಾಲದಲ್ಲಿ ವೈದ್ಯರ ಮೇಲೆ ನಡೆದ ಮಾರಣಾಂತಿಕ ಹಲ್ಲೆ ವೈದ್ಯ ಲೋಕವನ್ನೇ ಬೆಚ್ಚಿಬೀಳಿಸಿದೆ. ವೈದ್ಯರ ಮೇಲಿನ ಹಲ್ಲೆಗಳು ದೇಶವ್ಯಾಪಿಯಾಗಿ ಸಾಮಾನ್ಯವಾಗಿರುವುದು ಸಮಾಜಕ್ಕೆ ಮಾರಕ ಮತ್ತು ಗಂಡಾಂತರ. ಎಲ್ಲೋ ಅವಘಡದಲ್ಲಿ ಮೃತಪಟ್ಟು ಆಸ್ಪತ್ರೆಗೆ ಬಂದ ವ್ಯಕ್ತಿಗೆ ಚಿಕಿತ್ಸೆ ಮಾಡಿದ ವೈದ್ಯರ ಮೇಲೆ ಹಲ್ಲೆ, ಮಾರಕ ವ್ಯಾಧಿಯಿಂದ ರೋಗಿ ಮೃತಪಟ್ಟಾಗ ಹಗಲಿರುಳು ಶ್ರಮಿಸಿದ ವೈದ್ಯರನ್ನೆ ಕೊಲೆಗಾರರನ್ನಾಗಿ ಬಿಂಬಿಸುವುದು ಇತ್ಯಾದಿ ಸಾಮಾನ್ಯವಾಗಿದೆ.

ವೈದ್ಯೋ ನಾರಾಯಣೋ ಹರಿಃ ಎಂಬ ಉಕ್ತಿಯ ಅಧಃಪತನದಿಂದ ವೈದ್ಯರಿಗೆ ಮಾತ್ರ ನಷ್ಟವಲ್ಲ. ಇದು ಇಡೀ ಮಾನವ ಸಂಕುಲಕ್ಕೆ ತುಂಬಲಾರದ ನಷ್ಟ. ಅಂತಿಮವಾಗಿ ಇದಕ್ಕೆ ಹೆಚ್ಚಿನ ಬೆಲೆ ತೆರಬೇಕಾದವರು ಜನಸಾಮಾನ್ಯರೇ ಆಗಿರುತ್ತಾರೆ. ಚಿಕಿತ್ಸೆ ನೀಡುವ ವೈದ್ಯನೇ ಆತಂಕ ಪರಿಸ್ಥಿತಿಯಲ್ಲಿದ್ದರೆ ರೋಗಿಗಳನ್ನು, ರೋಗಿಗಳ ಬಳಗದವರನ್ನು ಸಮರ್ಪಕವಾಗಿ ಸಂತೈಸಲು ಸಾಧ್ಯವಿಲ್ಲ.

ವೈದ್ಯ ದಿನಾಚರಣೆಯ ಈ ಹೊಸ್ತಿಲಲ್ಲಿ ಜನಸಾಮಾನ್ಯರಿಗೆ ಸಂದೇಶ ನೀಡುವುದಿದ್ದರೆ, ವೈದ್ಯರು ನಿಮ್ಮಂತೆ ಹುಲು ಮಾನವರು, ದೇವರಲ್ಲ. ಅವರು ರೋಗವನ್ನು ಗೆಲ್ಲಬಲ್ಲರೇ ಹೊರತು ನೈಸರ್ಗಿಕ ಸಾವನ್ನಲ್ಲ. ಸಾಮಾಜಿಕ ಜಾಲತಾಣಗಳನ್ನು ವೈದ್ಯರ ನಿಂದನೆಗೆ ಉಪಯೋಗಿಸಿಕೊಳ್ಳುವ ಪ್ರವೃತ್ತಿ ಸಾಮಾಜಿಕ ಸ್ವಾಸ್ಥ್ಯದ ಹಿತದೃಷ್ಟಿಯಿಂದ ಸಮಂಜಸವಲ್ಲ.

ವೈದ್ಯರಿಗೆ, ವೈದ್ಯ ಸಂಸ್ಥೆಗಳಿಗೆ ಸೂಕ್ತ ರಕ್ಷಣೆ, ಹಲ್ಲೆಕೋರರಿಗೆ ಸೂಕ್ತವಾದ ಕಠಿನ ಶಿಕ್ಷೆ ನೀಡಬೇಕು. ಸರಕಾರವು ಆರೋಗ್ಯ ಯೋಜನೆಗಳನ್ನು ರೂಪಿಸುವಾಗ ವೈದ್ಯರ ಹಿತಾಸಕ್ತಿಗಳಿಗೆ ಸೂಕ್ತ ಬೆಲೆ ಕೊಡಬೇಕು. ಸಾಮಾಜಿಕ ಜಾಲತಾಣಗಳಿಂದ ಗಳಿಸಿದ ಅಲ್ಪಜ್ಞಾನದಿಂದ ವೈದ್ಯರ ಅನುಭವ ವನ್ನು ಅಳೆಯುವ, ಸಂಶಯಿಸುವ, ಹಿಂಸಿಸುವ ಜನಸಾಮಾನ್ಯರ ಪ್ರವೃತ್ತಿಗೆ ತಿಲಾಂಜಲಿಯಿರಲಿ. ಒಟ್ಟಾರೆ ರೋಗಿ ಮತ್ತು ವೈದ್ಯರ ಸಂಬಂಧ ಹಿಂದಿನಂತೆ ಪ್ರಾಂಜಲವಾಗಿರಬೇಕು.

– ಡಾ| ಹೇಮಂತ ಕುಮಾರ್‌ ಸಾಸ್ತಾನ