8, 9ಕ್ಕೂ ಪ್ರಶ್ನೆಪತ್ರಿಕೆ ಮಾದರಿ ಬದಲು

ಬೆಂಗಳೂರು: ಎಸೆಸೆಲ್ಸಿ ವಾರ್ಷಿಕ ಪರೀಕ್ಷೆಯ ಪ್ರಶ್ನೆಪತ್ರಿಕೆಗಳ ಸ್ವರೂಪದಲ್ಲಿ ಅಳವಡಿಸಿರುವ ಅಲ್ಪ ಬದಲಾವಣೆಯನ್ನು 8 ಮತ್ತು 9ನೇ ತರಗತಿಗಳಿಗೂ ಅಳವಡಿಸಿಕೊಳ್ಳುವಂತೆ ಸಾರ್ವಜನಿಕ ಶಿಕ್ಷಣ ಇಲಾಖೆ ನಿರ್ದೇಶಿಸಿದೆ.

ಇದರಿಂದ 10ನೇ ತರಗತಿಯಲ್ಲಿ ಪರೀಕ್ಷೆ ಬರೆಯಲು ಅವರಿಗೆ ಅನುಕೂಲ ಆಗಲಿದೆ. ಬದಲಾದ ಈ ಪ್ರಶ್ನೆಪತ್ರಿಕೆ ಕ್ರಮವನ್ನು ಎಲ್ಲ ಪ್ರೌಢಶಾಲೆಗಳಲ್ಲೂ ಅಳವಡಿಸಿಕೊಳ್ಳಬೇಕು ಎಂದು ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿ ಸುತ್ತೋಲೆ ಹೊರಡಿಸಿದೆ.

ಎಸೆಸೆಲ್ಸಿ ವಾರ್ಷಿಕ ಪರೀಕ್ಷೆ ಪ್ರಶ್ನೆಪತ್ರಿಕೆಗಳ ಸ್ವರೂಪದಲ್ಲಿ ಈ ಸಾಲಿನಿಂದ ಅಲ್ಪಪ್ರಮಾಣದ ಬದಲಾವಣೆ ಮಾಡಲಾಗಿದೆ. ಬದಲಾಗುವ ಅಂಶಗಳು ಮತ್ತು ಅಂಕ ವಿವರ, ಭಾಷಾ ಹಾಗೂ ಕೋರ್‌ ವಿಷಯದ ಅಂಕ ಹಂಚಿಕೆಯನ್ನು ಈಗಾಗಲೇ ಮಂಡಳಿಯಿಂದ ಸ್ಪಷ್ಟಪಡಿಸಲಾಗಿದೆ.

ಬದಲಾವಣೆ ಏನು?
ಬಹು ಆಯ್ಕೆ ಪ್ರಶ್ನೆಯ ಜತೆಗೆ ಬರವಣಿಗೆಯೂ ಇರಬೇಕು ಎನ್ನುವುದು ಬದಲಾವಣೆಗೆ ಕಾರಣ. 3 ಅಂಕದ ಪ್ರಶ್ನೆಗಳ ಸಂಖ್ಯೆಯನ್ನು 6ರಿಂದ 9ಕ್ಕೆ ಏರಿಸಲಾಗಿದೆ. ಹಾಗೆಯೇ ಹೊಸದಾಗಿ 5 ಅಂಕದ ಒಂದು ಪ್ರಶ್ನೆಯನ್ನು ಸೇರಿಸಲಾಗಿದೆ. ಆದರೆ ಪರೀಕ್ಷೆಯ ಕಾಠಿನ್ಯದ ಮಟ್ಟದಲ್ಲಿ ಬದಲಾವಣೆ ಮಾಡಿಲ್ಲ.