ಸೋಂಕು ಪತ್ತೆ ಪ್ರದೇಶ ನಿರ್ಲಕ್ಷ್ಯ

ಮಂಡ್ಯ: ನಗರದ ಸ್ವರ್ಣಸಂದ್ರ ಬಡಾವಣೆಯಲ್ಲಿರುವ ಕೋವಿಡ್-19 ಸೋಂಕಿತ ವ್ಯಕ್ತಿಯ ನಿವಾಸವಿರುವ ಬೀದಿಗೆ ಹಾಲು ಸೇರಿದಂತೆ ಅಗತ್ಯವಸ್ತುಗಳ ಪೂರೈಕೆ ಮಾಡದೇ ನಿರ್ಲಕ್ಷ್ಯ ಮಾಡಲಾಗುತ್ತಿದೆ ಎಂದು ಸ್ಥಳೀಯ ನಿವಾಸಿಗಳು ದೂರಿದರು.

ಕೋವಿಡ್-19 ಸೋಂಕು ದೃಢಪಟ್ಟ ನಂತರದಲ್ಲಿ ಸೋಂಕಿತ ವ್ಯಕ್ತಿಯ ನಿವಾಸವಿರುವ ಬೀದಿಯನ್ನು ಅಸ್ಪೃಶ್ಯರ ರೀತಿ ಕಾಣಲಾಗುತ್ತಿದೆ. ಬಡಾವಣೆಯ ನಗರಸಭಾ ಸದಸ್ಯೆ ರಜಿನಿ ಆ ಬೀದಿಯ ಜನರಿಗೆ ಹಾಲು, ತರಕಾರಿ, ದಿನಸಿ ಪದಾರ್ಥ ದೊರಕುವಂತೆ ವ್ಯವಸ್ಥೆ ಮಾಡದೇ ಔಷಧ ಸಿಂಪಡಣೆ ಮಾಡದೇ ನಿರ್ಲಕ್ಷ್ಯ ವಹಿಸಿದ್ದಾರೆ ಎಂದು ಆರೋಪಿಸಿದರು.

ಆ ಬೀದಿಯಲ್ಲಿ ವಯಸ್ಸಾದವರು, ಮಕ್ಕಳಿದ್ದಾರೆ. ಶುಕ್ರವಾರ ಮತ್ತು ಶನಿವಾರ ಆ ಬೀದಿಯನ್ನು ಹೊರತುಪಡಿಸಿ ಉಳಿದ ಬೀದಿಗಳಿಗೆ ಹಾಲು, ತರಕಾರಿ ಹಂಚಿಕೆ ಮಾಡಿ ತಾರತಮ್ಯ ಮಾಡುತ್ತಿದ್ದಾರೆ. ಪ್ರಚಾರಕ್ಕಾಗಿ ಸರ್ಕಾರಿ ಸೌಲಭ್ಯಗಳನ್ನು ದುರುಪಯೋಗ ಪಡಿಸಿಕೊಳ್ಳುತ್ತಿದ್ದಾರೆ. ಕೊರೊನಾ ಸಂಕಷ್ಟ ಸಮಯದಲ್ಲೂ ಜನರ ನೋವಿಗೆ ಸ್ಪಂದಿಸದೇ ಅಮಾನವೀಯವಾಗಿ ವರ್ತಿಸುತ್ತಿದ್ದಾರೆ ಎಂದು ನಗರಸಭಾ ಸದಸ್ಯೆ ವಿರುದ್ಧ ಕಿಡಿಕಾರಿದರು.

ಜಿಲ್ಲಾಧಿಕಾರಿ ಸ್ಪಂದನೆ: ಕೋವಿಡ್-19 ಸೋಂಕಿತ ವ್ಯಕ್ತಿ ಬೀದಿಗೆ ಅಗತ್ಯ ವಸ್ತುಗಳು ಪೂರೈಕೆಯಾಗದಿರುವ ವಿಷಯ ತಿಳಿದ ಜಿಲ್ಲಾಧಿಕಾರಿ ಡಾ. ವೆಂಕಟೇಶ್‌ ಕೂಡಲೇ ಸ್ಪಂದಿಸಿದರು. ನಗರಸಭೆ ಆಯುಕ್ತ ಲೋಕೇಶ್‌ ಅವರ ಮೂಲಕ ಬಡಾವಣೆಯ ಜನರಿಗೆ ಹಾಲು, ತರಕಾರಿ ದೊರಕುವಂತೆ ವ್ಯವಸ್ಥೆ ಮಾಡಿದರು. ರಸ್ತೆಯುದ್ದಕ್ಕೂ ಔಷಧ ಸಿಂಪಡಣೆ ಮಾಡುವುದಕ್ಕೂ ಕ್ರಮ ವಹಿಸಿದರು.