ಬೆಂಬಲ ಬೆಲೆಯಲ್ಲಿ ಕಡಲೆ ಖರೀದಿ ಶುರು

ಇಂಡಿ: ಪಟ್ಟಣದ ಪಿಕೆಪಿಎಸ್‌ ಗೋದಾಮಿನಲ್ಲಿ ಶುಕ್ರವಾರ ಸರಕಾರದ ಅಶ್ರಯದಲ್ಲಿ ಕಡಲೆ ಖರೀದಿ ಕೇಂದ್ರ ಆರಂಭಿಸಲಾಯಿತು. ಕ್ವಿಂಟಲ್‌ ಕಡಲೆಗೆ 4830 ರೂ.ದಂತೆ ಖರೀದಿಸಲಾಗುತ್ತದೆ. ಕಡಲೆ ಬೆಳೆ ಖರೀದಿ ಕೊಡಲು ಪಿಕೆಪಿಎಸ್‌ ಇಂಡಿಯಲ್ಲಿ ಹೆಸರು ನೋಂದಾಯಿಸಿದಂತೆ ಸರದಿಯಲ್ಲಿ ಕಡಲೆ ಬೆಳೆಯನ್ನು ಖರೀದಿಸಲಾಗುವುದು. ನಂತರ ಸಂಘದಿಂದ ಕರೆ ಬಂದ ಕೂಡಲೆ ರೈತರು ತಾವು ಬೆಳೆದ ಕಡಲೆಯನ್ನು ಸಂಘಕ್ಕೆ ತರಬೇಕೆಂದು ಸಂಘದ ಅಧ್ಯಕ್ಷ ಸಂಜೀವಕುಮಾರ ಭೈರಶೆಟ್ಟಿ ತಿಳಿಸಿದ್ದಾರೆ.

ಕೊರೊನಾ ವೈರಸ್‌ ನಿಯಂತ್ರಿಸಲು ಸರಕಾರ ಲಾಕ್‌ಡೌನ್‌ ಜಾರಿಗೊಳಿಸಿದೆ. ಕಾರಣ ಕಡಲೆ ಖರೀದಿಸುವ ಮುನ್ನ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವ ವ್ಯವಸ್ಥೆ ಮಾಡಲಾಗಿದೆ. ರೈತರು ಸರಕಾರದ ನಿಯಮ ಪಾಲಿಸಬೇಕು ಎಂದು ಸಲಹೆ ನೀಡಿದ ಅವರು, ತಾಲೂಕಿನ ಎಲ್ಲ ರೈತರ ಕಡಲೆ ಖರೀದಿಸಲಾಗುವುದು. ತಾವು ಸಂಘದಲ್ಲಿ ಹೆಸರು ನೋಂದಾಯಿಸಿದಂತೆ ರೈತರಿಗೆ ಸರದಿಯಂತೆ ಕರೆ ಬರುತ್ತವೆ. ಕರೆ ಬಂದ ನಂತರ ರೈತರು ಕಡಲೆ ತರಬೇಕೆಂದು ಮನವಿ ಮಾಡಿಕೊಂಡಿದ್ದಾರೆ. ಬುದ್ದುಗೌಡ ಪಾಟೀಲ, ಪ್ರದೀಪ ಮುರಗುಂಡಿ, ಮಹಾದೇವ ಬಾರಿಕಾಯಿ, ಶಾಂತುಗೌಡ ಬಿರಾದಾರ, ಜಟ್ಟೆಪ್ಪ ರವಳಿ ಇದ್ದರು