ಇಂಡೋನೇಷ್ಯಾ ಭೂಕಂಪ: 100 ದಾಟಿದ ಮೃತರ ಸಂಖ್ಯೆ

ಬಾಲಿ: ಇಂಡೋನೇಷ್ಯಾದ ಲೊಂಬೊಕ್‌ನಲ್ಲಿ ರವಿವಾರ ಸಂಜೆ 7 ಗಂಟೆಯ ಸುಮಾರಿಗೆ ಸಂಭವಿಸಿದ ಭೀಕರ ಭೂಕಂಪಕ್ಕೆ ಬಲಿಯಾದವರ ಸಂಖ್ಯೆ 100 ದಾಟಿದೆ. ಕೆಲವು ಭೂಕಂಪ ಪೀಡಿತ ಪ್ರದೇಶಗಳನ್ನು ತಲುಪಲು ಇನ್ನೂ ಸಾಧ್ಯವಾಗದ ಕಾರಣ ಸಾವು ನೋವಿನ ಸಂಖ್ಯೆ ಹೆಚ್ಚಾಗುವ ಆತಂಕವಿದೆ. ಸೇತುವೆಗಳು ಕುಸಿದಿದ್ದರಿಂದ ರಸ್ತೆ ಸಂಪರ್ಕ ಕಡಿತಗೊಂಡಿದೆ. ಲೊಂಬೊಕ್‌ನಾದ್ಯಂತ ವಿದ್ಯುತ್‌ ಕಡಿತಗೊಂಡಿದೆ. 

230ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದು, ಸಾವಿರಾರು ಮನೆ ಮತ್ತು ಕಟ್ಟಡಗಳು ಹಾನಿಗೊಂಡಿವೆ. ಸದ್ಯ 20 ಸಾವಿರ ಜನರು ತಾತ್ಕಾಲಿಕ ಶಿಬಿರಗಳಲ್ಲಿ ಆಶ್ರಯ ಪಡೆದಿದ್ದಾರೆ. ಇಂಡೋನೇಷ್ಯಾ ಭೂಗರ್ಭಶಾಸ್ತ್ರಜ್ಞರು ಭೂಕಂಪದ ಪ್ರಮಾಣವನ್ನು 7.0 ಎಂದು ದಾಖಲಿಸಿದ್ದು, ಅಮೆರಿಕ ತಜ್ಞರು 6.9 ಎಂಬುದಾಗಿ ದಾಖಲಿಸಿದ್ದಾರೆ. ಲೊಂಬೊಕ್‌ನ ಉತ್ತರ ಭಾಗದಲ್ಲಿ 10.5 ಕಿ.ಮೀ ಆಳದಲ್ಲಿ ಭೂಕಂಪದ ಕೇಂದ್ರ ಬಿಂದುವಿತ್ತು.