Flight Ticket: ಇನ್ನು ವಾಟ್ಸ್‌ಆ್ಯಪ್‌ ಮೂಲಕ ಇಂಡಿಗೋ ವಿಮಾನ ಟಿಕೆಟ್‌ ಬುಕಿಂಗ್‌ ಸಾಧ್ಯ

ನವದೆಹಲಿ: ಇನ್ನು ಮುಂದೆ ನೀವು ಇಂಡಿಗೋ ವಿಮಾನ ಟಿಕೆಟ್‌ ಅನ್ನು ವಾಟ್ಸ್‌ಆ್ಯಪ್‌ ಮೂಲಕವೇ ಬುಕ್‌ ಮಾಡಬಹುದು.

ಹೌದು, ಇಂಡಿಗೋ ಏರ್‌ಲೈನ್ಸ್‌ “6ಎಸ್ಕೈ’ ಎಂಬ ಚಾಟ್‌ಬೋಟ್‌ ಅನ್ನು ಪರಿಚಯಿಸಿದೆ. ಇದರ ಸಹಾಯದಿಂದ ವಾಟ್ಸ್‌ಆ್ಯಪ್‌ ಮೂಲಕವೇ ಸುಲಭವಾಗಿ ಟಿಕೆಟ್‌ ಕಾಯ್ದಿರಿಸಬಹುದಾಗಿದೆ.

+91 7065145858 ಸಂಖ್ಯೆಗೆ ವಾಟ್ಸ್‌ಆ್ಯಪ್‌ನಲ್ಲಿ “ಹಾಯ್‌’ ಎಂಬ ಸಂದೇಶ ಕಳುಹಿಸಬೇಕು. ಆಗ ಚಾಟ್‌ಬೋಟ್‌ ನಿಮ್ಮ ಮುಂದೆ ಟಿಕೆಟ್‌ ಬುಕಿಂಗ್‌, ಚೆಕ್‌-ಇನ್‌, ಬೋರ್ಡಿಂಗ್‌ ಪಾಸ್‌ಗಳ ಆಯ್ಕೆಯನ್ನು ಇಡುತ್ತದೆ. “ಬುಕ್‌ ಫ್ಲೈಟ್‌ ಟಿಕೆಟ್‌’ ಆಯ್ಕೆಯನ್ನು ಆಯ್ದುಕೊಂಡು ಆನ್‌ಲೈನ್‌ ಮೂಲಕ ಹಣ ಪಾವತಿಸಿ, ನೀವು ಇದ್ದಲ್ಲಿಂದಲೇ ಟಿಕೆಟ್‌ ಬುಕ್‌ ಮಾಡಬಹುದು ಎಂದು ಇಂಡಿಗೋ ತಿಳಿಸಿದೆ. ಗೂಗಲ್‌ನ ರಿಯಾಫಿ ತಂತ್ರಜ್ಞಾನದ ಸಹಭಾಗಿತ್ವದೊಂದಿಗೆ ಇಂಡಿಗೋ ಸಂಸ್ಥೆ ಇದನ್ನು ಅಭಿವೃದ್ಧಿಪಡಿಸಿದ್ದು, ಇದು ಪೋರ್ಟೆಬಲ್‌ ಡಿಜಿಟಲ್‌ ಟ್ರಾವೆಲ್‌ ಏಜೆನ್ಸಿ ರೀತಿಯಲ್ಲಿ ಕಾರ್ಯನಿರ್ವಹಿಸುತ್ತದೆ.