ಭಾರತೀಯರಿಗೆ ಹೆಮ್ಮೆ: ತಬಲಾ ಪಟು ಸಂದೀಪ್ ದಾಸ್‌ಗೆ ಗ್ರ್ಯಾಮಿ ಪ್ರಶಸ್ತಿ

ಲಾಸ್‌ ಏಂಜಲಿಸ್‌ : ಖ್ಯಾತ ತಬಲಾ ವಾದಕ ಸಂದೀಪ್‌ ದಾಸ್‌ ಅವರು ಭಾರತೀಯರೆಲ್ಲ ಹೆಮ್ಮೆ ಪಡುವಂತಹ ರೀತಿಯಲ್ಲಿ ಪ್ರತಿಷ್ಠೆಯ ಗ್ರ್ಯಾಮಿ ಪ್ರಶಸ್ತಿಯನ್ನು ಜಯಿಸಿದ್ದಾರೆ.

ಲಾಸ್‌ ಏಂಜಲಿಸ್‌ ನಲ್ಲಿ ನಿನ್ನೆ ಭಾನುವಾರ ನಡೆದಿದ್ದ ಗ್ರ್ಯಾಮಿ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಸಂದೀಪ್‌ ದಾಸ್‌ ಅವರು ತಮ್ಮ ಸಿಲ್ಕ್ ರೋಡ್‌ ಎನ್‌ಸೆಂಬಲ್‌ ತಂಡದೊಂದಿಗೆ ಬೆಸ್ಟ್‌ ಗ್ಲೋಬಲ್‌ ಮ್ಯೂಸಿಕ್‌ ಗ್ರ್ಯಾಮಿ ಪ್ರಶಸ್ತಿಯನ್ನು ಪಡೆದುಕೊಂಡಿದ್ದಾರೆ. 

ಪ್ರತಿಷ್ಠೆಯ ಗ್ರ್ಯಾಮಿ ಪ್ರಶಸ್ತಿ ಸ್ವೀಕರಿಸಿ ಪ್ರತಿಕ್ರಿಯಿಸಿರುವ ಸಂದೀಪ್‌ ದಾಸ್‌ ಅವರು, “ಗ್ರ್ಯಾಮಿ ಪ್ರಶಸ್ತಿ ಪಡೆದಿರುವುದು ನನಗೆ ಅತೀವ ಹೆಮ್ಮೆ ಎನಿಸಿದೆ; ಏಕೆಂದರೆ ನಾನು ಜಾಗತಿಕ ವೇದಿಕೆಯಲ್ಲಿ ಭಾರತವನ್ನು ಪ್ರತಿನಿಧಿಸುತ್ತಿದ್ದೇನೆ. ಗ್ರ್ಯಾಮಿ ಪ್ರಶಸ್ತಿಗೆ ನಾನು ನಾಮಾಂಕನ ಪಡೆಯುತ್ತಿರುವುದು ಇದು ಮೂರನೆ ಬಾರಿ. ಆದರೆ ಈ ಬಾರಿ ನಾವದನ್ನು ಸಾಧಿಸಿರುವುದಕ್ಕೆ ಅಪಾರವಾದ ಹೆಮ್ಮೆ, ಸಂತೋಷ, ಸಂಭ್ರಮವಿದೆ. ಪ್ರಶಸ್ತಿ ಸ್ವೀಕರಿಸಲು ವೇದಿಕೆಗೆ ಹೋದವರಲ್ಲಿ ಭಾರತೀಯ ಕುರ್ತಾ, ಪೈಜಾಮಾ ತೊಟ್ಟಿದ್ದವನು ನಾನೊಬ್ಬನೇ ಎಂಬ ಬಗ್ಗೆಯೂ ನನಗೆ ಹೆಮ್ಮೆ ಇದೆ’ ಎಂದು ಹೇಳಿದರು.

ತಬಲಾ ಮಾಂತ್ರಿಕ ಝಾಕೀರ್‌ ಹುಸೇನ್‌ ಬಳಿಕದಲ್ಲಿ ವಿಶ್ವ ಮಟ್ಟದಲ್ಲಿ ತಬಲಾ ಪ್ರತಿಭೆ ಎಂದೇ ಗುರುತಿಸಲ್ಪಟ್ಟಿರುವ ಸಂದೀಪ್‌ ದಾಸ್‌ ಅವರಿಗೆ ಭಾರತೀಯ ಮಾಧ್ಯಮಗಳಲ್ಲಿ ಸಿನೇಮಾ ಮತ್ತು ಕ್ರಿಕೆಟಿಗೆ ಮಾತ್ರವೇ ನಿರಂತರ ಪ್ರೋತ್ಸಾಹ, ಪ್ರಚಾರ ಸಿಗುತ್ತಿರುವ ಬಗ್ಗೆ ಖೇದವಿದೆ.