ಟ್ರಂಪ್‌ ಹೊಸ ವಲಸೆ ನೀತಿಯಿಂದ ಭಾರತಕ್ಕೆ ಅನುಕೂಲ

ವಾಷಿಂಗ್ಟನ್‌: ಭಾರತದಿಂದ ಅಮೆರಿಕಕ್ಕೆ ತೆರಳುವ ಪ್ರತಿಭಾವಂತರಿಗೆ ಅನುಕೂಲ ಕಲ್ಪಿಸುವ ಮಹತ್ವದ ಪೌರತ್ವ ನೀತಿಯನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ ಪರಿಚಯಿಸಿದ್ದಾರೆ. ಮೆರಿಟ್ ಹಾಗೂ ಪಾಯಿಂಟ್ ಆಧರಿಸಿದ ವಲಸೆ ನೀತಿ ಇದಾಗಿರಲಿದ್ದು, ಈಗ ಇರುವ ಗ್ರೀನ್‌ ಕಾರ್ಡ್‌ ವೀಸಾ ನೀತಿಯನ್ನು ಬದಲಿಸಲಿದೆ. ಅಷ್ಟೇ ಅಲ್ಲ, ಯುವ ಹಾಗೂ ಹೆಚ್ಚು ಕೌಶಲ ಹೊಂದಿರುವ ನೌಕರರಿಗೆ ಹೆಚ್ಚಿನ ಆದ್ಯತೆ ನೀಡಲಿದೆ. ಈಗಿನ ವ್ಯವಸ್ಥೆಯಿಂದ ಪ್ರತಿಭಾವಂತರನ್ನು ಅಮೆರಿಕ ಉಳಿಸಿಕೊಳ್ಳಲಾಗುತ್ತಿಲ್ಲ. ಹೀಗಾಗಿ ಇದನ್ನು ಬದಲಿಸುತ್ತಿದ್ದೇವೆ ಎಂದು ಟ್ರಂಪ್‌ ಹೇಳಿದ್ದಾರೆ.

ಪ್ರಸ್ತುತ ವ್ಯವಸ್ಥೆಯು ಮೆರಿಟ್ ಆಧರಿತವಾಗಿದ್ದು, ವಯಸ್ಸು, ಜ್ಞಾನ, ಉದ್ಯೋಗ ಅವಕಾಶಗಳು ಮತ್ತು ಸಾಮಾನ್ಯ ಜ್ಞಾನವನ್ನು ಆಧರಿಸಿ ಪಾಯಿಂಟ್‌ಗಳನ್ನು ನೀಡಲಾಗುತ್ತದೆ ಎಂದು ಟ್ರಂಪ್‌ ಹೇಳಿದ್ದಾರೆ. ಅಂದರೆ ಕಡಿಮೆ ವಯಸ್ಸಿನವರಾಗಿದ್ದು, ಹೆಚ್ಚು ಸಂಬಳ ಪಡೆಯುವ ಉದ್ಯೋಗದಲ್ಲಿದ್ದರೆ ಮತ್ತು ವಿಶೇಷ ಕೌಶಲಗಳನ್ನು ಹೊಂದಿದ್ದರೆ ಅಂಥವರಿಗೆ ಅಮೆರಿಕದ ಪೌರತ್ವ ಆದ್ಯತೆಯ ಮೇರೆಗೆ ಲಭ್ಯವಾಗಲಿದೆ. ಈ ನೀತಿಯಿಂದಾಗಿ ಅಮೆರಿಕನ್ನರ ಉದ್ಯೋಗದ ಹಿತಾಸಕ್ತಿಯನ್ನೂ ರಕ್ಷಿಸಬಹುದಾಗಿದೆ. ನಾಗರಿಕ ಸಾಮಾನ್ಯ ಜ್ಞಾನ ಪರೀಕ್ಷೆ ಹಾಗೂ ಇಂಗ್ಲಿಷ್‌ ಭಾಷೆ ಪರೀಕ್ಷೆಯನ್ನು ನಡೆಸಲಾಗುತ್ತದೆ. ಈ ಪರೀಕ್ಷೆಯಲ್ಲಿ ಪಾಸಾದರೆ ಮಾತ್ರ ಪೌರತ್ವಕ್ಕೆ ಪರಿಗಣಿಸಲಾಗುತ್ತದೆ. ಯುವ ಮತ್ತು ಕೌಶಲ್ಯಯುತ ಉದ್ಯೋಗಿಗಳ ಕೋಟಾವನ್ನು ಪ್ರಸ್ತುತ ಇರುವ ಶೇ.12ರಿಂದ ಶೇ.57ಕ್ಕೆ ಏರಿಸಲಾಗಿದೆ. ಅಲ್ಲದೆ, ಗ್ರೀನ್‌ ಕಾರ್ಡ್‌ ಬದಲಿಗೆ ‘ಬಿಲ್ಡ್ ಅಮೆರಿಕ’ ಎಂಬ ಹೆಸರಿನ ವೀಸಾ ನೀಡಲಾಗುತ್ತದೆ.

ಸದ್ಯ ಭಾರತೀಯರು ಹೆಚ್ಚಿನ ಸಂಖ್ಯೆಯಲ್ಲಿ ಪೌರತ್ವಕ್ಕಾಗಿ ಕಾಯುತ್ತಿದ್ದಾರೆ. ಅಲ್ಲದೆ, ಕಾಯುತ್ತಿರುವ ಭಾರತೀಯರು ಉನ್ನತ ಕೌಶಲ ಹೊಂದಿರುವವರೇ ಆಗಿರುವುದರಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಭಾರತೀಯರಿಗೆ ಈ ಅನುಕೂಲ ಉಂಟಾಗುವ ಸಾಧ್ಯತೆಯಿದೆ.