ಪಾಕಿಸ್ಥಾನದಲ್ಲಿ ಭಾರತೀಯ ರಾಜತಾಂತ್ರಿಕರಿಗೆ ಕೀಟಲೆ, ಕಿರುಕುಳ

ಹೊಸದಿಲ್ಲಿ : ಪಾಕಿಸ್ಥಾನದಲ್ಲಿ  ಕರ್ತವ್ಯದ ಮೇಲೆ ವಾಸವಾಗಿರುವ ಅನೇಕ ಭಾರತೀಯ ರಾಜತಾಂತ್ರಿಕರಿಗೆ ನೆರೆಯ ದೇಶದಲ್ಲಿ ಕಿರುಕುಳ ನೀಡಲಾಗುತ್ತಿರುವ ಬಗ್ಗೆ  ಅನೇಕ ದೂರುಗಳು ಬರುತ್ತಿವೆ. 

ಭಾರತೀಯ ರಾಜತಾಂತ್ರಿಕರ ನಿವಾಸಗಳಿಗೆ ಹೊಸ ಗ್ಯಾಸ್‌ ಕನೆಕ್ಷನ್‌ ನಿರಾಕರಿಸುವುದು; ಅವರನ್ನು ಭೇಟಿಯಾಗಲು ಬರುವ ಅತಿಥಿಗಳಿಗೆ ಕಿರುಕುಳ ನೀಡುವುದು; ಕೆಲವು ಹಿರಿಯ ಅಧಿಕಾರಿಗಳ ಇಂಟರ್‌ನೆಟ್‌ ಸಂಪರ್ಕವನ್ನು ತಡೆಯುವುದು – ಇವೇ ಮೊದಲಾದ ರೀತಿಯಲ್ಲಿ ಭಾರತೀಯ ರಾಜತಾಂತ್ರಿಕರಿಗೆ ಪಾಕ್‌ ಅಧಿಕಾರಿಗಳು ಕಿರುಕುಳ ನೀಡುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ. 

ಕಳೆದ ಡಿ.10ರಂದು ಭಾರತೀಯ ರಾಜತಾಂತ್ರಿಕರೋರ್ವರ ಅಧಿಕೃತ ನಿವಾಸಕ್ಕೆ ಆಗಂತುಕನೋರ್ವ ಯಾವುದೇ ಬಗೆಯ ಭದ್ರತೆಯ ಅಡೆತಡೆಗಳಿಲ್ಲದೆ ನೇರವಾಗಿ ನುಗ್ಗಿ ಬಂದಿದ್ದ. 

ಈ ಎಲ್ಲ ವಿದ್ಯಮಾನಗಳನ್ನು ಗಂಭೀರವಾಗಿ ಪರಿಗಣಿಸಿರುವ  ವಿದೇಶ ವ್ಯವಹಾರಗಳ ಸಚಿವಾಲಯ ಈ ವಿಷಯವನ್ನು ಪಾಕ್‌ ಉನ್ನತರಲ್ಲಿ ಎತ್ತಿದೆ. ಈ ರೀತಿಯ ತೊಂದರೆಗಳನ್ನು ನೀಡಕೂಡದೆಂದು ಅದು ಸ್ಪಷ್ಟವಾಗಿ ತಿಳಿಸಿದೆ.

ಹಾಗೆ ನೋಡಿದರೆ ಪಾಕಿಸ್ಥಾನದಲ್ಲಿನ ಭಾರತೀಯ ರಾಜತಾಂತ್ರಿಕರಿಗೆ ಪಾಕ್‌ ಅಧಿಕಾರಿಗಳು ಕಿರುಕುಳ ನೀಡುವುದು ಇದೇ ಮೊದಲಲ್ಲ. ಈ ವರ್ಷ ಮಾರ್ಚ್‌ನಲ್ಲೂ ಪಾಕ್‌ ಅಧಿಕಾರಿಗಳು ಭಾರತೀಯ ರಾಜತಾಂತ್ರಿಕರಿಗೆ ಕಿರುಕುಳ ನೀಡಿದ್ದರು. 

ವಿಚಿತ್ರವೆಂದರೆ ದಿಲ್ಲಿಯಲ್ಲಿನ ಪಾಕ್‌ ದೂತಾವಾಸದ ಅಧಿಕಾರಿಗಳು ಕೂಡ ತಮಗೆ ಕೂಡ ಭಾರತೀಯ ಅಧಿಕಾರಿಗಳು ಇದೇ ರೀತಿಯ ಕಿರುಕುಳ ನೀಡುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ. 

ಈ ಹಿನ್ನೆಲೆಯಲ್ಲಿ ಕಳೆದ ಮಾರ್ಚ್‌ 30ರಂದು ಉಭಯ ದೇಶಗಳು ಉನ್ನತ ಮಟ್ಟದ ಚರ್ಚೆ ನಡೆಸಿ ರಾಜತಾಂತ್ರಿಕರಿಗೆ ಸಂಬಂಧಿಸಿದ 1992ರ ನೀತಿ ಸಂಹಿತೆಗೆ ಅನುಗುಣವಾಗಿ ಈ ಸಮಸ್ಯೆಗಳನ್ನು ಸೌಹಾರ್ದಯುತವಾಗಿ ಬಗೆಹರಿಸಲು ಒಪ್ಪಿಕೊಂಡಿದ್ದವು. ಆದರೆ  ಪಾಕ್‌ ಚಾಳಿ ಮಾತ್ರ ಅಂತೆಯೇ ಮುಂದುವರಿರಿದೆ ಎಂದು ಭಾರತೀಯ ದೂತಾವಾಸದ ಮೂಲಗಳು ಹೇಳಿವೆ.