ಆಸೀಸ್‌-ಭಾರತ ಚೆನ್ನೈ ಏಕದಿನ ಟಿಕೆಟ್‌ ಬೆಲೆ ಗಗನಕ್ಕೆ

ಚೆನ್ನೈ: ಜಿಎಸ್‌ಟಿ ಮತ್ತು ಚೆನ್ನೈ ಮಹಾನಗರ ಪಾಲಿಕೆಯ ತೆರಿಗೆಯಿಂದ ಚೆನ್ನೈನಲ್ಲಿ ನಡೆಯಲಿರುವ ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಮೊದಲ ಏಕದಿನ ಪಂದ್ಯದ ಟಿಕೆಟ್‌ ಬೆಲೆ ಗಗನಕ್ಕೇರಿದೆ. ಆದರೂ ಟಿಕೆಟ್‌ಗಾಗಿ ಭಾರೀ ಬೇಡಿಕೆ ಇದೆ.  

ಚೆನ್ನೈನಲ್ಲಿ ಕ್ರಿಕೆಟ್‌ ಪಂದ್ಯವೇ ಅಪರೂಪವಾಗಿರುವುದು, ಅದರಲ್ಲೂ ಇಂತಹ ಬಲಿಷ್ಠ ತಂಡಗಳ ನಡುವಿನ ಪಂದ್ಯವಿರುವುದರಿಂದ ಅಭಿಮಾನಿಗಳು ಹಣ ಹೋದರೂ ಪರವಾಗಿಲ್ಲ ಟಿಕೆಟ್‌ ಖರೀದಿಸಲೇಬೇಕೆಂಬ ಹಟ ತೊಟ್ಟಿದ್ದಾರೆ. ಜುಲೈನಲ್ಲಿ ಕೇಂದ್ರ ಸರಕಾರ ಜಿಎಸ್‌ಟಿ ಜಾರಿಗೆ ತಂದಿದೆ. ಜಿಎಸ್‌ಟಿ ಮತ್ತು ಚೆನ್ನೈ ಪಾಲಿಕೆಯ ಒಟ್ಟು ತೆರಿಗೆ ಶೇ.53 ಆಗುತ್ತದೆ. ಈ ಕಾರಣ ಟಿಕೆಟ್‌ ಬೆಲೆಯಲ್ಲಿ ತಾರಾಮಾರಾ ಏರಿಕೆಯಾಗಿದೆ. ಸಾಮಾನ್ಯ ಗ್ಯಾಲರಿಯ ಟಿಕೆಟ್‌ ಬೆಲೆ ಕನಿಷ್ಠ 1200 ರೂ.ಗೆ ಏರಿದೆ.