ಎರಡು ವಾರಗಳ ಭಾರತ-ಲಂಕಾ ಮಿತ್ರ ಶಕ್ತಿ – 6 ಜಂಟಿ ಸೇನಾ ಕವಾಯತು ಆರಂಭ

ಕೊಲಂಬೋ : ಉಗ್ರ ನಿಗ್ರಹವೂ ಸೇರಿದಂತೆ ಉಭಯ ಸೇನೆಗಳ ನಡುವೆ ಸಹಕಾರ ಮತ್ತು ಹೊಂದಾಣಿಕೆಯನ್ನು ಸಾಧಿಸುವ ನಿಟ್ಟಿನಲ್ಲಿ ಭಾರತ ಮತ್ತು ಶ್ರೀಲಂಕಾ ಸೇನೆಗಳು ಇಂದು ಬುಧವಾರದಿಂದ ಎರಡು ವಾರಗಳ ಜಂಟಿ ಸೇನಾ ಕವಾಯತನ್ನು ಈ ದ್ವೀಪ ರಾಷ್ಟ್ರದಲ್ಲಿ ಆರಂಭಿಸಿವೆ.

ವಾರ್ಷಿಕ ನೆಲೆಯಲ್ಲಿ ನಡೆಯುವ ಈ ಜಂಟಿ ಕವಾಯತು “ಮಿತ್ರ ಶಕ್ತಿ – 6” ನಾಮಾಂಕಿತವಾಗಿದೆ.

ಭಾರತ – ಲಂಕಾ ಸೇನೆಗಳ ಸಂಬಂಧ ಮತ್ತು ಸಾಮರ್ಥ್ಯ ವೃದ್ದಿಯೇ ಮೊದಲಾದ ಗುಣಾತ್ಮಕ ಅಂಶಗಳನ್ನು ಸಾಧಿಸುವ ನಿಟ್ಟಿನಲ್ಲಿ ಈ ಜಂಟಿ ಕವಾಯತನ್ನು ಕೈಗೊಳ್ಳಲಾಗುತ್ತಿದೆ ಎಂದು ಲಂಕಾ ಸೇನೆ ಹೇಳಿದೆ.

ಎರಡು ವಾರಗಳ ಈ ಸೇನಾ ಕವಾಯತಿನಲ್ಲಿ ಭಾರತದ ಮತ್ತು ಲಂಕೆಯ ತಲಾ 120 ಸೈನಿಕರು ಪಾಲ್ಗೊಳ್ಳುತ್ತಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.