3rd WTC rankings: 5ನೇ ಸ್ಥಾನಕ್ಕೆ ಕುಸಿದ ಟೀಮ್‌ ಇಂಡಿಯಾ

ದುಬಾೖ: ಹೈದರಾಬಾದ್‌ನಲ್ಲಿ ಅನುಭವಿಸಿದ ಆಘಾತಕಾರಿ ಸೋಲೆನ್ನುವುದು ಐಸಿಸಿ ಟೆಸ್ಟ್‌ ಚಾಂಪಿ ಯನ್‌ಶಿಪ್‌ ರ್‍ಯಾಂಕಿಂಗ್‌ ಯಾದಿಯಲ್ಲಿ ಭಾರತವನ್ನು ಎರಡರಿಂದ 5ನೇ ಸ್ಥಾನಕ್ಕೆ ಕುಸಿಯುವಂತೆ ಮಾಡಿದೆ. ಟೀಮ್‌ ಇಂಡಿಯಾ ಈಗ ಬಾಂಗ್ಲಾದೇಶಕ್ಕಿಂತಲೂ ಕೆಳಸ್ಥಾನದಲ್ಲಿ ನೆಲೆಸಿದೆ.

ಆದರೆ ವೆಸ್ಟ್‌ ಇಂಡೀಸ್‌ ಎದುರಿನ ಬ್ರಿಸ್ಬೇನ್‌ ಟೆಸ್ಟ್‌ ಪಂದ್ಯವನ್ನು ಸೋತ ಹೊರ ತಾಗಿಯೂ ಆಸ್ಟ್ರೇಲಿಯ ಅಗ್ರಸ್ಥಾನ ಕಾಯ್ದು ಕೊಳ್ಳುವಲ್ಲಿ ಯಶಸ್ವಿಯಾಗಿದೆ.

ಭಾರತದ ಪರ್ಸಂಟೇಜ್‌ ಪಾಯಿಂಟ್‌ 43.33ಕ್ಕೆ ಇಳಿದಿದೆ. ತೃತೀಯ ಆವೃತ್ತಿಯ ಟೆಸ್ಟ್‌ ಚಾಂಪಿಯನ್‌ಶಿಪ್‌ನಲ್ಲಿ 5 ಟೆಸ್ಟ್‌ ಆಡಿರುವ ಭಾರತ ಎರಡನ್ನು ಗೆದ್ದು, ಎರಡರಲ್ಲಿ ಸೋಲನುಭವಿಸಿದೆ. ಒಂದು ಪಂದ್ಯ ಡ್ರಾಗೊಂಡಿದೆ.
ಆಸ್ಟ್ರೇಲಿಯ ಪ್ರತಿಶತ 55.00 ಅಂಕ ಹೊಂದಿದೆ. ದಕ್ಷಿಣ ಆಫ್ರಿಕಾ, ನ್ಯೂಜಿಲ್ಯಾಂಡ್‌ ಮತ್ತು ಬಾಂಗ್ಲಾದೇಶ ತಲಾ 50.00 ಅಂಕ ಹೊಂದಿದ್ದು, ಕ್ರಮವಾಗಿ 2ನೇ, 3ನೇ ಹಾಗೂ 4ನೇ ಸ್ಥಾನದಲ್ಲಿವೆ.

ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್‌ ಸರಣಿಯನ್ನು 1-1 ಸಮಬಲಕ್ಕೆ ತಂದಾಗ ಭಾರತ ರ್‍ಯಾಂಕಿಂಗ್‌ ಯಾದಿಯ ಅಗ್ರಸ್ಥಾನದಲ್ಲಿತ್ತು. ವೆಸ್ಟ್‌ ಇಂಡೀಸ್‌ ಎದುರಿನ ಪ್ರಥಮ ಟೆಸ್ಟ್‌ ಪಂದ್ಯವನ್ನು ಗೆದ್ದ ಬಳಿಕ ಆಸ್ಟ್ರೇಲಿಯ ಟಾಪರ್‌ ಎನಿಸಿತು. ಭಾರತ 2ನೇ ಸ್ಥಾನಕ್ಕೆ ಇಳಿಯಿತು. ಇದೀಗ ಇಂಗ್ಲೆಂಡ್‌ ವಿರುದ್ಧ ಅನುಭವಿಸಿದ ಸೋಲಿನಿಂದ ರೋಹಿತ್‌ ಪಡೆ ಭಾರೀ ಕುಸಿತಕ್ಕೆ ಸಿಲುಕಿದೆ.

ಈ ಜಯದಿಂದ ಇಂಗ್ಲೆಂಡ್‌ ಪ್ರಗತಿಯನ್ನೇನೂ ಸಾಧಿಸಿಲ್ಲ. ಅದು 8ನೇ ಸ್ಥಾನದಲ್ಲಿ ಉಳಿದುಕೊಂಡಿದೆ. ಯಾವುದೇ ಅಂಕ ಹೊಂದಿಲ್ಲದ ಶ್ರೀಲಂಕಾ ಕೊನೆಯ ಸ್ಥಾನದಲ್ಲಿದೆ.