ಗೂಗಲ್‌ ಸ್ಟ್ರೀಟ್‌ ವ್ಯೂಗೆ ಕೇಂದ್ರ ಸರ್ಕಾರ ನಕಾರ

ನವದೆಹಲಿ: ಇಂಟರ್ನೆಟ್‌ ದೈತ್ಯ ಗೂಗಲ್‌ ನ ಪ್ರಸ್ತಾವಿತ ಗೂಗಲ್‌ ಸ್ಟ್ರೀಟ್‌ ವ್ಯೂಗೆ ಅನುಮತಿ ನೀಡಲು ಕೇಂದ್ರ ಸರ್ಕಾರ ನಿರಾಕರಿಸಿದೆ. ಈ ಬಗ್ಗೆ ಕೇಂದ್ರ ಗೃಹ ಖಾತೆ ಸಹಾಯಕ ಸಚಿವ ಹಂಸರಾಜ ಅಹಿರ್‌ ಲೋಕಸಭೆಗೆ ನೀಡಿದ ಲಿಖಿತ ಉತ್ತರದಲ್ಲಿ ತಿಳಿಸಿದ್ದಾರೆ. 2015ರಲ್ಲಿ ಗೂಗಲ್‌ ಈ ಬಗ್ಗೆ ಕೇಂದ್ರ ಸರ್ಕಾರಕ್ಕೆ ಅನುಮತಿ ಕೋರಿ ಪ್ರಸ್ತಾಪ ಸಲ್ಲಿಸಿತ್ತು. ಗೂಗಲ್‌ ಸ್ಟ್ರೀಟ್‌ ವ್ಯೂನಲ್ಲಿ ದೇಶದ ನಗರ ಮತ್ತು  ಪ್ರವಾಸಿ ಸ್ಥಳಗಳು, ಜನಪ್ರಿಯ ತಾಣಗಳು, ನದಿಗಳ ಬಗ್ಗೆ 360 ಡಿಗ್ರಿ ಮಾಹಿತಿಯನ್ನು ಕಲಾವಿದನ ಕಲ್ಪನೆಯಲ್ಲಿ ಹೇಗಿರಲಿದೆ ಎಂಬ ಬಗೆಗಿನ ವಿವರಣೆ ಇರುತ್ತದೆ. ಅದು 3ಡಿ ಮಾದರಿಯಲ್ಲಿ ಇದ್ದು, ಅಮೆರಿಕ, ಕೆನಡಾ ಮತ್ತು ಐರೋಪ್ಯ ರಾಷ್ಟ್ರಗಳಲ್ಲಿ ಅದನ್ನು ಧಾರಾಳವಾಗಿ ಬಳಕೆ ಮಾಡಲಾಗುತ್ತಿದೆ. ಆದರೆ, ಇದಕ್ಕೆ ಭಾರತ ಸರ್ಕಾರ ಒಪ್ಪಿಗೆ ನೀಡಿಲ್ಲ.

370ನೇ ವಿಧಿ ರದ್ದು ಇಲ್ಲ: ಇದೇ ವೇಳೆ, ಜಮ್ಮು-ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ ಒದಗಿಸುವ ಸಂವಿಧಾನದ 370ನೇ ವಿಧಿಯನ್ನು ರದ್ದು ಮಾಡುವ ಪ್ರಸ್ತಾಪವಿಲ್ಲ ಎಂದೂ ಸಚಿವ ಅಹಿರ್‌ ಸ್ಪಷ್ಟಪಡಿಸಿದ್ದಾರೆ.