ಹೊಸದಿಲ್ಲಿ : ಚೀನದ ಮಹತ್ವಾಕಾಂಕ್ಷೆಯ ಒನ್‌ ಬೆಲ್ಡ್‌ ಒನ್‌ ರೋಡ್‌ (OBOR) ಯೋಜನೆಗೆ ಆರಂಭದಿಂದಲೂ ವಿರೋಧ ವ್ಯಕ್ತಪಡಿಸುತ್ತಾ ಬಂದಿದ್ದ ಭಾರತ, ಈಗ ತನ್ನ ನಿಲುವನ್ನು ಸ್ವಲ್ಪ ಮಟ್ಟಿಗೆ ಸಡಿಲಿಸಿ, “ಒನ್‌ ಬೆಲ್ಟ್ ಒನ್‌ ರೋಡ್‌ ಯೋಜನೆಗೆ ಸಂಬಂಧಿಸಿದ ನಮ್ಮ ಕಳವಳಗಳನ್ನು ಸೂಕ್ತವಾಗಿ ಪರಿಹರಿಸಿದರೆ ನಾವು ಯಾವುದೇ ಸಲಹೆಗಳಿಗೆ ಮುಕ್ತವಾಗಿರುತ್ತೇವೆ” ಎಂದು ಹೇಳಿದೆ.
ಚೀನದ ಓಬಿಓಆರ್‌ ಯೋಜನೆಗೆ ಸೇರಬೇಕೆಂದು ರಶ್ಯ ಆಗ್ರಹಿಸಿರುವುದನ್ನು ಅನುಸರಿಸಿ ಭಾರತದ ವಿದೇಶ ವ್ಯವಹಾರಗಳ ಸಚಿವಾಲಯ ಈ ಹೇಳಿಕೆಯನ್ನು ನೀಡಿದೆ.
ರಶ್ಯದ ವಿದೇಶ ಸಚಿವ ಸರ್‌ಗೆಯಿ ಲಾವ್‌ರೋವ್‌ ಅವರು ಕಳೆದ ಸೋಮವಾರ ಚೀನದ ಮಹತ್ವಾಕಾಂಕ್ಷೆಯ ಒನ್‌ ಬೆಲ್ಡ್‌ ಒನ್‌ ರೋಡ್‌ ಯೋಜನೆಗೆ ಭಾರತದ ಸೇರಬೇಕೆಂದು ಕೋರಿದ್ದರು. ಈ ದಿಶೆಯಲ್ಲಿ ಭಾರತ ಯಾವುದಾದರೊಂದು ಮಾರ್ಗವನ್ನು ಕಂಡುಕೊಂಡು ಈ ಬೃಹತ್‌ ಯೋಜನೆಯ ಲಾಭವನ್ನು ಪಡೆಯಬೇಕು; ಆದರೆ ಅದು ಈ ಯೋಜನೆ ಕುರಿತ ತನ್ನ ನಿಲುವನ್ನು ತ್ಯಜಿಸಬೇಕಾಗಿಲ್ಲ ಎಂದು ಹೇಳಿದ್ದರು.
ಚೀನ – ಪಾಕಿಸ್ಥಾನ ಆರ್ಥಿಕ ಕಾರಿಡಾರ್‌ ಯೋಜನೆಯ ಬಗ್ಗೆ ಭಾರತಕ್ಕಿರುವ ಆಕ್ಷೇಪವೇ ಓಬಿಓರ್‌ ಯೋಜನೆಗೆ ತೊಡಕಾಗಿ ಪರಿಣಮಿಸಿದೆ. ಆದರೆ ಸದ್ಯಕ್ಕೆ ಚೀನ ಮತ್ತು ಪಾಕಿಸ್ಥಾನ ಈ ಯೋಜನೆಯ ಅನುಷ್ಠಾನವನ್ನು ವಿಭಿನ್ನ ಕಾರಣಗಳಿಗೆ ನಿಲ್ಲಿಸಿವೆ.
