ಇಂಡಿಯಾ ಓಪನ್‌ ಬ್ಯಾಡ್ಮಿಂಟನ್‌: ಫೈನಲ್‌ಗೇರಿದ ಸಿಂಧು

ನವದೆಹಲಿ: ಇಂಡಿಯಾ ಓಪನ್‌ ಬ್ಯಾಡ್ಮಿಂಟನ್‌ನಲ್ಲಿ ಪಿ.ವಿ.ಸಿಂಧು ಫೈನಲ್‌ಗೇರಿದ್ದಾರೆ. ಅವರು ಸೆಮಿಫೈನಲ್‌ನಲ್ಲಿ ರಾಚನಾಕ್‌ ಇಂಟನಾನ್‌ ವಿರುದ್ಧ 21-13, 21-15 ಗೇಮ್‌ಗಳ ಅಂತರದಿಂದ ಜಯ ಸಾಧಿಸಿದರು.

ಇಲ್ಲಿನ ಸಿರಿ ನ್ಪೋರ್ಟ್ಸ್ ಕಾಂಪ್ಲೆಕ್ಸ್‌ನಲ್ಲಿ ನಡೆದ ಪಂದ್ಯದಲ್ಲಿ ಸಿಂಧು ಥಾಯ್ಲೆಂಡ್‌ ಆಟಗಾರ್ತಿ ವಿರುದ್ಧ ಸುಲಭ ಗೆಲುವು ಸಂಪಾದಿಸಿದರು. ಪಂದ್ಯದ ಆರಂಭದಲ್ಲಿಯೇ ಸಿಂಧು ಮಿಂಚಿನ ಆಟ ಪ್ರದರ್ಶಿಸಿದರು. ಮೊದಲ ಗೇಮ್‌ನಲ್ಲಿ 21-13 ಅಂಕಗಳ ಅಂತರದಿಂದ ಗೇಮ್‌ ತನ್ನದಾಗಿಸಿಕೊಂಡರು. ಎರಡನೇ ಗೇಮ್‌ನಲ್ಲಿ 21-15 ಅಂಕಗಳ ಅಂತರದಿಂದ ಗೆಲುವು ಸಾಧಿಸಿ ನೇರ ಗೇಮ್‌ಗಳ ಅಂತರದಿಂದ ಜಯಗಳಿಸಿದರು. ಥಾಯ್ಲೆಂಡ್‌ ಆಟಗಾರ್ತಿ 2013ರಲ್ಲಿ ವಿಶ್ವ ಚಾಂಪಿಯನ್‌ ಆಗಿದ್ದರು. ಪ್ರಬಲ ಎದುರಾಳಿಯನ್ನು ಸಿಂಧು ಸುಲಭವಾಗಿ ಮಣಿಸಿದರು. ಸಿಂಧು ಮುಂಬರುವ ಫೈನಲ್‌ನಲ್ಲಿ ಚೀನಾದ ಝಾಂಗ್‌ ಬೈವೆನ್‌ ಅವರನ್ನು ಎದುರಿಸಲಿದ್ದಾರೆ.