ಭಾರತ-ನೇಪಾಲ ರೈಲು ಬಂಧ

ಹೊಸದಿಲ್ಲಿ:  ಬಹು ನಿರೀಕ್ಷಿತ ಭಾರತ- ನೇಪಾಲ ನಡುವಿನ ಪ್ರಯಾಣಿಕ ರೈಲು ಸಂಚಾರಕ್ಕೆ ಇದೇ ಡಿಸೆಂಬರ್‌ನಲ್ಲಿ ಚಾಲನೆ ಸಿಗುವ ನಿರೀಕ್ಷೆಯಿದೆ. ಬಿಹಾರದ ಜಯನಗರ ಹಾಗೂ ನೇಪಾಲದ ಆಗ್ನೇಯ ಭಾಗದಲ್ಲಿರುವ ಧನುಸಾ ಜಿಲ್ಲೆಯ ಕುರ್ತಾ (34 ಕಿ.ಮೀ.) ಎಂಬ ಊರಿನ ನಡುವೆ ಮೊದಲ ಸಂಚಾರ ಆರಂಭವಾಗಲಿದೆ. 

ನೇಪಾಲದೊಂದಿಗೆ ರೈಲು ಸಂಪರ್ಕ ಬೆಸೆ ಯಲು ಚೀನ ನಡೆಸುತ್ತಿರುವ ಯತ್ನಗಳಿಗೆ ಸಡ್ಡು ಹೊಡೆಯಲು ಭಾರತ ಈ ರೈಲು ಸಂಚಾರ ಆರಂಭಿಸಲಿದೆ. ಉಭಯ ದೇಶಗಳ ನಡುವೆ ನಾಲ್ಕು ರೈಲು ಮಾರ್ಗಗಳು ಅನುಷ್ಠಾ ನಕ್ಕೆ ಬರಲಿದ್ದು, ಜಯನಗರ-ಕುರ್ತಾ ರೈಲು ಮಾರ್ಗ ಇವುಗಳಲ್ಲಿ ಮೊದಲನೆಯದ್ದು.

ಭಾರತ-ನೇಪಾಲ ರೈಲು ಮಾರ್ಗ ಬ್ರಿಟಿಷರ ಕಾಲದಲ್ಲಿ ನಿರ್ಮಾಣವಾಗಿದ್ದು, ನೇಪಾಲದ ಮಟ್ಟೊಹರಿ ಅರಣ್ಯ ವಲಯದಿಂದ ಭಾರತಕ್ಕೆ ನೇರ ಸಂಪರ್ಕವಿತ್ತು. ಆದರೆ, 15 ವರ್ಷಗಳ ಹಿಂದೆ, ಬಿ  ಸೇತುವೆಯು ಪ್ರವಾಹದಲ್ಲಿ ಕೊಚ್ಚಿ ಹೋಗಿದ್ದರಿಂದ ಈ ರೈಲು ಸಂಚಾರ ರದ್ದಾಗಿತ್ತು. ಈ ಮಾರ್ಗದ ಪುನರುತ್ಥಾನಕ್ಕಾಗಿ ಭಾರತ 550 ಕೋಟಿ ರೂ., ನೇಪಾಲ 880 ಕೋಟಿ ರೂ. ಖರ್ಚು ಮಾಡಿವೆ. ಮೊದಲ ಹಂತದಲ್ಲಿ, ಬಿಹಾರದ ಜಯನಗರ-ಕುರ್ತಾ ಮಾರ್ಗ ನಿರ್ಮಿಸಲಾಗಿದ್ದು, 2ನೇ ಹಂತದಲ್ಲಿ ಕುರ್ತಾ-ಭಂಗಹ (18 ಕಿ.ಮೀ.), 3ನೇ ಹಂತದಲ್ಲಿ ಭಂಗಹ-ಬಾರ್ಡಿಬಸ್‌ (17 ಕಿ.ಮೀ.) ಸದ್ಯದಲ್ಲೇ ನಿರ್ಮಾಣಗೊಳ್ಳಲಿವೆ. ಮಾರ್ಗದ ಒಟ್ಟಾರೆ ಉದ್ದದಲ್ಲಿ ಕೇವಲ 3 ಕಿ.ಮೀ. ಮಾತ್ರ ಭಾರತದ ಗಡಿಯೊಳಗೆ ಬರಲಿದೆ.