ಚಿನ್ನದ ನಿರೀಕ್ಷೆಯಲ್ಲಿ ಭಾರತ ತಂಡ

ಡೆನ್‌ ಬೋಶ್‌ (ನೆದರ್ಲೆಂಡ್‌): ಟೋಕಿಯೊ ಒಲಿಂಪಿಕ್‌ ಅರ್ಹತೆ ಸಂಪಾದಿಸಿದ ಬೆನ್ನಲ್ಲೇ ಭಾರತದ ಪುರುಷರ ರಿಕರ್ವ್‌ ತಂಡ ಇಲ್ಲಿ ನಡೆಯುತ್ತಿರುವ ವರ್ಲ್ಡ್ ಆರ್ಚರಿ ಚಾಂಪಿಯನ್‌ಶಿಪ್‌ನಲ್ಲಿ ಫೈನಲ್‌ ಪ್ರವೇಶಿಸುವಲ್ಲಿ ಯಶಸ್ವಿಯಾಗಿದೆ. ಗುರುವಾರ ಬಲಿಷ್ಠ ಹಾಗೂ ಆತಿಥೇಯ ನೆದರ್ಲೆಂಡ್‌ ತಂಡಕ್ಕೆ ಆಘಾತವಿಕ್ಕುವ ಮೂಲಕ ಭಾರತ ತಂಡ ಅಮೋಘ ಸಾಧನೆಗೈದಿತು.

ರವಿವಾರ ನಡೆಯಲಿರುವ ಫೈನಲ್‌ನಲ್ಲಿ ಭಾರತದ ಬಿಲ್ಗಾರರು ಚೀನವನ್ನು ಎದುರಿಸಲಿದ್ದು, ಈ ಕೂಟದ ಇತಿಹಾಸಲ್ಲಿ ಮೊದಲ ಚಿನ್ನದ ಪದಕದ ಮೇಲೆ ಕಣ್ಣಿಟ್ಟಿದ್ದಾರೆ. ದಿನದ ಇನ್ನೊಂದು ಸೆಮಿಫೈನಲ್‌ನಲ್ಲಿ ಚೀನ 6-2 ಅಂತರದಿಂದ ಅಗ್ರ ಶ್ರೇಯಾಂಕದ ಕೊರಿಯಾವನ್ನು ಮಣಿಸಿತು.

ಜಿದ್ದಾಜಿದ್ದಿ ಶೂಟೌಟ್‌
ಕೂಟದ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸುವ ಮೂಲಕ 2020ರ ಟೋಕಿಯೊ ಒಲಿಂಪಿಕ್‌ ಅರ್ಹತೆ ಸಂಪಾದಿಸಿದ ಒಂದೇ ದಿನದಲ್ಲಿ 3 ಸದಸ್ಯರ ಭಾರತ ತಂಡ ಚಿನ್ನಕ್ಕೆ ಹತ್ತಿರವಾಗಿದೆ. ತರುಣ್‌ದೀಪ್‌ ರಾಯ್‌, ಅತನು ದಾಸ್‌ ಮತ್ತು ಪ್ರವೀಣ್‌ ಜಾಧವ್‌ ರೋಚಕ ಶೂಟೌಟ್‌ನಲ್ಲಿ 29-28ರಿಂದ ಮೇಲುಗೈ ಸಾಧಿಸಿದರು. ಅಂತಿಮ ಗೆಲುವಿನ ಅಂತರ 5-4. ಕ್ವಾರ್ಟರ್‌ ಫೈನಲ್‌ನಲ್ಲಿ ಭಾರತ 6-0 ಅಂತರದಿಂದ ಚೈನೀಸ್‌ ತೈಪೆಗೆ ಆಘಾತವಿಕ್ಕಿತ್ತು.

ಭಾರತದ ಪುರುಷರ ರಿಕರ್ವ್‌ ತಂಡ ಈ ಕೂಟದಲ್ಲಿ ಪ್ರಶಸ್ತಿ ಸುತ್ತು ಪ್ರವೇಶಿಸಿದ್ದು ಇದು ಎರಡನೇ ಸಲ. 2005ರ ಮ್ಯಾಡ್ರಿಡ್‌ ಕೂಟದಲ್ಲಿ ಮೊದಲ ಸಲ ಈ ಸಾಧನೆ ಮಾಡಿತ್ತು. ಅಂದಿನ ತರುಣ್‌ದೀಪ್‌ ರಾಯ್‌, ಜಯಂತ್‌ ತಾಲೂಕಾªರ್‌ ಮತ್ತು ಗೌತಮ್‌ ಸಿಂಗ್‌ ಅವರನ್ನೊಳಗೊಂಡ ತಂಡ ಕೊರಿಯಾ ವಿರುದ್ಧ 232-244 ಅಂತರದಿಂದ ಸೋತು ಬೆಳ್ಳಿಗೆ ಸಮಾಧಾನಪಟ್ಟಿತ್ತು. ಭಾರತವ ವನಿತೆಯರ ಕಂಪೌಂಡ್‌ ತಂಡ ಕೂಡ ಪದಕದ ರೇಸ್‌ನಲ್ಲಿದೆ. ಕಂಚಿನ ಪದಕದ ಪ್ಲೇ-ಆಫ್ ಸ್ಪರ್ಧೆಯಲ್ಲಿ ಟರ್ಕಿಯನ್ನು ಎದುರಿಸಲಿದೆ.