ರಹಾನೆ ಕಪ್ತಾನನ ಆಟ: ಇಂಗ್ಲಂಡ್‌ ಎದುರು ಭಾರತ 6 ವಿಕೆಟ್‌ ಜಯ

ಮುಂಬಯಿ : ಇಲ್ಲಿನ ಬ್ರೆಬೋರ್ನ್ ಸ್ಟೇಡಿಯಂನಲ್ಲಿ ಇಂದು ನಡೆದ ಎರಡನೇ ಅಭ್ಯಾಸ ಪಂದ್ಯದಲ್ಲಿ ಅಜಿಂಕ್ಯ ರಹಾನೆ ನೇತೃತ್ವದ ಭಾರತ ಎ ತಂಡ ಇಯಾನ್‌ ಮಾರ್ಗನ್‌ ನೇತೃತ್ವದ ಪ್ರವಾಸಿ ಇಂಗ್ಲಂಡ್‌ ತಂಡವನ್ನು ಆರು ವಿಕೆಟ್‌ಗಳಿಂದ ನಿಚ್ಚಳವಾಗಿ ಸೋಲಿಸಿತು. ಕಪ್ತಾನನ ಆಟವಾಡಿದ ರಹಾನೆ 91 ರನ್‌ಗಳನ್ನು ಬಾರಿಸಿ ತಂಡದ ವಿಜಯಕ್ಕೆ ಕಾರಣರಾದರು. 

ಮಹೇಂದ್ರ ಸಿಂಗ್‌ ಧೋನಿ ನೇತೃತ್ವದ ಮೊದಲ ಅಭ್ಯಾಸ ಪಂದ್ಯವನ್ನು ಭಾರತ ಸೋತಿತ್ತು. ಇಂದಿನ ಎರಡನೇ ಪಂದ್ಯದಲ್ಲಿ ಭಾರತ ಮೊದಲ ಪಂದ್ಯದ ಸೋಲಿಗೆ ಸರಿಯಾದ ರೀತಿಯಲ್ಲಿ ಮುಯ್ಯಿ ತೀರಿಸಿಕೊಂಡಿತು.

ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗ್‌ ಆಯ್ದು ಕೊಂಡ ಕಪ್ತಾನ ಮಾರ್ಗನ್‌ ಅವರ ಇಂಗ್ಲಂಡ್‌ ತಂಡ ಪಂದ್ಯ ಗೆಲ್ಲಲು ಭಾರತಕ್ಕೆ 50 ಓವರ್‌ಗಳಲ್ಲಿ 283 ರನ್‌ ತೆಗೆಯುವ ಗುರಿಯನ್ನು ನಿಗದಿಸಿದರು. ಭಾರತ ಈ ಗುರಿಯನ್ನು ಕೇವಲ 39.4 ಓವರ್‌ಗಳಲ್ಲಿ ಕೇವಲ ನಾಲ್ಕು ವಿಕೆಟ್‌ ನಷ್ಟಕ್ಕೆ ಸಾಧಿಸಿ ಪಂದ್ಯವನ್ನು ಭರ್ಜರಿಯಾಗಿ ಗೆದ್ದುಕೊಂಡಿತು. 

ಪ್ರವಾಸಿ ಇಂಗ್ಲಂಡ್‌ ಕ್ರಿಕೆಟ್‌ ತಂಡದೆದುರಿನ ಮೂರು ಪಂದ್ಯಗಳ ಏಕದಿನ ಸರಣಿಯು ಜನವರಿ 15ರಂದು ಆರಂಭಗೊಳ್ಳಲಿದೆ.