ನವದೆಹಲಿ: ಹೊಸದಾಗಿ ಅಸ್ತಿತ್ವಕ್ಕೆ ಬಂದಿರುವ ಸಶಸ್ತ್ರ ಪಡೆಗಳ ವಿಶೇಷ ಕಾರ್ಯಾಚರಣೆ ವಿಭಾಗ (AFSOD) ಅಂಡಮಾನ್ ದ್ವೀಪ ಪ್ರದೇಶದಲ್ಲಿ ವಿಶೇಷ ಕಾರ್ಯಾಚರಣೆಯಲ್ಲಿ ನಿರತವಾಗಿದೆ. ಇಲ್ಲಿನ ಜನವಸತಿ ಇಲ್ಲದಿರುವ ದ್ವೀಪಗಳಲ್ಲಿ ನುಸುಳಿ ಕುಳಿತಿರಬಹುದಾದ ನುಸುಳುಕೋರರನ್ನು ಹಾಗೂ ಉಗ್ರರನ್ನು ಮಟ್ಟಹಾಕುವ ಉದ್ದೇಶದಿಂದ ಈ ಕಾರ್ಯಾಚರಣೆಯನ್ನು ನಡೆಸಲಾಗುತ್ತಿದೆ ಎಂದು ತಿಳಿದುಬಂದಿದೆ.
ಡಿ.ಎ.ಎನ್.ಎಕ್ಸ್. 2019 ಎಂಬ ಕೋಡ್ ನೇಮ್ ಇಟ್ಟುಕೊಂಡು ಈ ಕಾರ್ಯಾಚರಣೆಯನ್ನು ನಡೆಸಲಾಗುತ್ತಿದ್ದು ಇದರಲ್ಲಿ ಸೇನಾಪಡೆಯ ಅರೆ ವಿಶೇಷ ಪಡೆಗಳು, ನೌಕಾಪಡೆಯ ಸಾಗರ ಕಮಾಂಡೋಗಳು ಮತ್ತು ವಾಯುಪಡೆಯ ಗಾರ್ಡ್ ಕಮಾಂಡೋಗಳು ಭಾಗವಹಿಸುತ್ತಿದ್ದಾರೆ.
ದೆಹಲಿ, ಆಗ್ರಾ, ಬೆಂಗಳೂರು ಮತ್ತು ಕಲೈಕುಂಡ ಭಾಗಗಳಿಂದ ತುಕಡಿಗಳನ್ನು ಅಕ್ಟೋಬರ್ 10ರಂದು ಹೊರಡಿಸುವ ಮೂಲಕ ಈ ಕಾರ್ಯಾಚರಣೆ ಪ್ರಾರಂಭಗೊಂಡಿದೆ. ಇದೀಗ ಈ ಕಾರ್ಯಾಚರಣೆ ಪ್ರಮುಖ ಘಟ್ಟವನ್ನು ತಲುಪಿದೆ. 1987ರಲ್ಲಿ ಮಾಲ್ಡೀವ್ಸ್ ರಾಜಧಾನಿ ಮಾಲೆಯನ್ನು ತಮಿಳು ಉಗ್ರರಿಂದ ತೆರವುಗೊಳಿಸಲು ಕೈಗೊಳ್ಳಲಾಗಿದ್ದ ವಿಶೇಷ ಸೇನಾ ಕಾರ್ಯಾಚರಣೆಯ ಮಾದರಿಯಲ್ಲಿಯೇ ಈ ಕಾರ್ಯಾಚರಣೆಯೂ ನಡೆಯುತ್ತಿರುವುದು ವಿಶೇಷವಾಗಿದೆ.
ದೇಶದ ಸಾರ್ವಭೌಮತೆಗೆ ಅಪಾಯ ಒದಗಿದ ಸಂದರ್ಭಗಳಲ್ಲಿ ಜಂಟಿ ಕಾರ್ಯಾಚರಣೆಯನ್ನು ನಡೆಸುವ ಉದ್ದೇಶದಿಂದ ಅಸ್ತಿತ್ವಕ್ಕೆ ಬಂದಿರುವ ಭಾರತೀಯ ಸೇನೆಯ ಈ ವಿಶೇಷ ವಿಭಾಗವು ಸ್ಥಾಪನೆಗೊಂಡ ಬಳಿಕ ನಡೆಸಲಾಗುತ್ತಿರುವ ಎರಡನೇ ಪ್ರಮುಖ ಕಾರ್ಯಾಚರಣೆಯೂ ಇದಾಗಿದೆ ಎಂದು ತಿಳಿದುಬಂದಿದೆ. ಇದಕ್ಕೂ ಮೊದಲು ಪ್ರಥಮ ಕಾರ್ಯಾಚರಣೆಯನ್ನು ಗುಜರಾತಿನಲ್ಲಿರುವ ನಾಲಿಯಾ ಪಟ್ಟಣದಲ್ಲಿ ಪಾಕಿಸ್ಥಾನ ಗಡಿಗೆ ಸಮೀಪದಲ್ಲಿ ‘ಎಕ್ಸ್ ಸ್ಮೆಲ್ಲಿಂಗ್ ಫೀಲ್ಡ್ಸ್’ ಎಂಬ ಕೋಡ್ ನೇಮ್ ನಡಿಯಲ್ಲಿ ನಡೆಸಲಾಗಿತ್ತು.
ಈ ವಿಶೇಷ ಕಾರ್ಯಪಡೆಯನ್ನು ಅರೆ ವಿಶೇಷ ಪಡೆಗಳ ಮೇಜರ್ ಜನರಲ್ ಅವರು ಮುನ್ನಡೆಸುತ್ತಾರೆ. ಸಶಸ್ತ್ರದಳದ ವಿಶೇಷ ಕಾರ್ಯಪಡೆ ವಿಭಾಗದ ಮೊದಲ ಮುಖ್ಯಸ್ಥರಾಗಿ ಮೇಜರ್ ಜನರಲ್ ಅಶೋಕ್ ಧಿಂಗ್ರಾ ಅವರು ನೇಮಕಗೊಂಡಿದ್ದರು. ಇದು ಅಸ್ತಿತ್ವಕ್ಕೆ ಬಂದಾಗಿನಿಂದಲೂ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದೆ.
