ಕುತೂಹಲ ಘಟ್ಟದಲ್ಲಿ “ಮಾಂಗಲ್ಯಂ ತಂತುನಾನೇನ’

ಕಲರ್ಸ್‌ ಕನ್ನಡ ಹಾಗೂ ಕಲರ್ಸ್‌ ಸೂಪರ್‌ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ “ಮಾಂಗಲ್ಯಂ ತಂತುನಾನೇನ’ ಚಿತ್ರದ ವಿಶೇಷ ಸಂಚಿಕೆ ಪ್ರತಿ ಸೋಮವಾರದಿಂದ ಶುಕ್ರವಾರದವರೆಗೆ ಪ್ರಸಾರವಾಗಲಿದೆ. ಕಲರ್ಸ್‌ ಸೂಪರ್‌ನಲ್ಲಿ ರಾತ್ರಿ 7.30ಕ್ಕೆ ಹಾಗೂ ಕಲರ್ಸ್‌ ಕನ್ನಡ ವಾಹಿನಿಯಲ್ಲಿ ರಾತ್ರಿ 10.30ಕ್ಕೆ ಪ್ರಸಾರವಾಗಲಿದೆ.

ಎರಡು ವಾಹಿನಿಗಳಲ್ಲಿ ಪ್ರಸಾರವಾಗುತ್ತಿರುವ ಧಾರಾವಾಹಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಈ ಧಾರಾವಾಹಿ ಸದ್ಯ ಮದುವೆ ಘಟ್ಟ ತಲುಪಿದೆ. ಈ ಸಂದರ್ಭದಲ್ಲಿ ಅದ್ಧೂರಿಯಾಗಿ ಮೂಡಿಬರಬೇಕೆಂಬ ಕಾರಣಕ್ಕೆ ಬೃಹತ್‌ ಕಲ್ಯಾಣ ಮಂಟಪದ ಸೆಟ್‌ ಹಾಕಿಸಲಾಗಿದೆ. ಮಾನ್ಯತಾ ಟೆಕ್‌ ಪಾರ್ಕ್‌ನಲ್ಲಿ ಹಾಕಿರುವ ಈ ಕಲರ್‌ಫ‌ುಲ್‌ ಸೆಟ್‌ನಲ್ಲಿ ಶ್ರಾವಣಿ-ತೇಜಸ್ವಿಯ ಮದುವೆ ಮಂಗಳ ಕಾರ್ಯಗಳು ನಡೆಯಲಿವೆ.  

ಎರಡು ವಾರಗಳ ಕಾಲ ಈ ವಿಶೇಷ ಸಂಚಿಕೆ ಪ್ರಸಾರವಾಗಲಿದ್ದು, ವೀಕ್ಷಕರಿಗೊಂದು ಹಬ್ಬವಾಗಲಿದೆ ಎಂಬ ವಿಶ್ವಾಸ ಧಾರಾವಾಹಿ ತಂಡದ್ದು. ಮಧ್ಯಮ ಹಾಗೂ ಮೇಲ್ವರ್ಗದ ಕುಟುಂಬದ ನಡುವಿನ ಕಥಾಹಂದರವನ್ನು ಹೊಂದಿರುವ ಈ ಧಾರಾವಾಹಿಯಲ್ಲಿ ಶ್ರಾವಣಿ ಹಾಗು ತೇಜಸ್ವಿ ನಡುವಿನ ಘಟನೆಗಳೇ ಹೈಲೈಟ್‌.  

ರಾಜಶ್ರೀ ಕ್ಯಾಂಪಸ್‌ನಲ್ಲಿ ನಿರ್ಮಾಣವಾಗಿರುವ ಈ ಧಾರಾವಾಹಿಗೆ ರಘುಚರಣ್‌ ಕಥೆ, ಚಿತ್ರಕಥೆ ಹಾಗೂ ಪ್ರಧಾನ ನಿರ್ದೇಶನವಿದೆ. ಯಶವಂತ್‌ ಸಂಚಿಕೆ ನಿರ್ದೇಶಕರಾಗಿದ್ದಾರೆ. ಧಾರಾವಾಹಿಯಲ್ಲಿ ರಾಜಾರಾಂ, ಹನುಮಂತೇಗೌಡ, ಸಂಗೀತಾ, ವೀಣಾ ಸುಂದರ್‌, ಆರ್‌.ಕೆ.ಚಂದನ್‌, ದಿವ್ಯಾ, ಪವಿತ್ರಾ ಸೇರಿದಂತೆ ಅನೇಕರು ನಟಿಸುತ್ತಿದ್ದಾರೆ.