ವಾಷಿಂಗ್ಟನ್:ಕಾಶ್ಮೀರದ 370ನೇ ವಿಧಿ ರದ್ದುಗೊಳಿಸಿದ್ದನ್ನು ವಿರೋಧಿಸಿ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ಮೊರೆ ಹೋಗಿ ಮುಖಭಂಗಕ್ಕೆ ಈಡಾಗಿದ್ದ ಪಾಕಿಸ್ತಾನಕ್ಕೆ ಇದೀಗ ಅಮೆರಿಕದಿಂದ ಮತ್ತೊಂದು ಭಾರೀ ಹೊಡೆತ ಬಿದ್ದಿದೆ. ಪಾಕಿಸ್ತಾನಕ್ಕೆ ಅಮೆರಿಕ ನೀಡುತ್ತಿದ್ದ 440 ಮಿಲಿಯನ್ ಡಾಲರ್ ಆರ್ಥಿಕ ನೆರವನ್ನು ಕಡಿತಗೊಳಿಸಿದೆ. ಆ ನಿಟ್ಟಿನಲ್ಲಿ ಅಮೆರಿಕದಿಂದ ಪಾಕಿಸ್ತಾನಕ್ಕೆ ದೊರೆಯುತ್ತಿದ್ದ ಹಣಕಾಸಿನ ನೆರವು 4.1 ಶತಕೋಟಿ ಡಾಲರ್ ಗೆ ಇಳಿದಂತಾಗಿದೆ.
ಪಾಕಿಸ್ತಾನ ಸಹಭಾಗಿತ್ವ ವೃದ್ದಿ ಒಪ್ಪಂದ(ಪಿಇಪಿಎ) 2010ರ ಪ್ರಕಾರ ಅಮೆರಿಕ ಪಾಕಿಸ್ತಾನಕ್ಕೆ ಹಣಕಾಸಿನ ನೆರವು ನೀಡುತ್ತಿತ್ತು ಎಂದು ಎಕ್ಸ್ ಪ್ರೆಸ್ ಟ್ರೈಬ್ಯೂನ್ ವರದಿ ಮಾಡಿದೆ.
ಪಾಕಿಸ್ತಾನ ಅಧ್ಯಕ್ಷ ಇಮ್ರಾನ್ ಖಾನ್ ವಾಷಿಂಗ್ಟನ್ ಗೆ ಭೇಟಿ ನೀಡಲು ಮೂರು ವಾರ ಇರುವಾಗಲೇ ಅಮೆರಿಕ ಆರ್ಥಿಕ ನೆರವು ಕಡಿತಗೊಳಿಸಿರುವ ಬಗ್ಗೆ ಮಾಹಿತಿ ನೀಡಿದೆ ಎಂದು ವರದಿ ವಿವರಿಸಿದೆ.
2010ರಲ್ಲಿ ಪಿಇಪಿಎ ಒಪ್ಪಂದಕ್ಕೆ ಸಹಿ ಹಾಕಿದ್ದು, ಅದರನ್ವಯ ಪಾಕಿಸ್ತಾನಕ್ಕೆ ಅಮೆರಿಕ 5 ವರ್ಷಗಳ ಕಾಲದಲ್ಲಿ 7.5 ಶತಕೋಟಿ ಡಾಲರ್ ಆರ್ಥಿಕ ನೆರವು ನೀಡಬೇಕಾಗಿತ್ತು. 2009ರಲ್ಲಿ ಕೆರ್ರಿ ಲುಗಾರ್ ಬೆರ್ಮನ್(ಕೆಎಲ್ ಬಿ) ನಿರ್ಣಯವನ್ನು ಅಮೆರಿಕ ಕಾಂಗ್ರೆಸ್ ನಲ್ಲಿ ಅಂಗೀಕಾರಗೊಂಡಿತ್ತು. ಕೆಎಲ್ ಬಿ ಪ್ರಕಾರ ಪಾಕಿಸ್ತಾನಕ್ಕೆ 4.5 ಶತಕೋಟಿ ಡಾಲರ್ ಹಣಕಾಸು ನೆರವು ಸಿಗಬೇಕಾಗಿದ್ದು, ಇದೀಗ ಕಡಿತಗೊಂಡ ಪರಿಣಾಮ 4.1 ಶತಕೋಟಿ ಡಾಲರ್ ಗೆ ಇಳಿಕೆಯಾಗಿದೆ ಎಂದು ವರದಿ ತಿಳಿಸಿದೆ.
